Gvray yv́ngkèní pvlàcè kù:ngà lushàì nø tasv̀ng mvkok roqvr kelv́m wàì

Vatican taq wáshì bǿì we lìpùngmè taq Pope Leo XIV taqkèní Military Ordinariate of Portugal mvdò nvng vhømnø dvmv̀n bǿì we íe.

August 21 ni taq Pope Leo XIV taqkèní dvshá mvhøt vhǿ:mò we Vsvng tiqgǿ nvng vhømnø̀ dvbangā bǿà we mèpvng àngnvng vtoqshì we yv́ngkèní dvshá mvhøt vhǿmònø̀ lvpat zíshì bǿì we cìl tiqgǿ svng gø vjúrøt dvbangā bǿà we íe.

Wedø cìldvp nvng singwe Sasvna mvdo pv́ngshì bǿì we yv́ngkèní 60 nǿng vhøm ráì we nǿnggøm lìpùngmè svng wáshìlv́m Roma svng tuqráì wegø íe.

Svrabín koqkv́mpè Leo XIV ò dvtú mòngkà taq shvnglut we Sasvna tvra, Móngdàn vmíng vkáng svng roqgvr we tvrà, dvrá uqbvdi svng cv́n dvgøm nø móng vsvngrì kaq màdvrá we tvrà kèní roqgvrā we tvrà nø cìl nvng mónggvr vsvngrì ò dvgùng vlwe bv̀nlì tvrà tiqlòng íwe dang dvtú bǿà we íe.

Dvgùng vlwe shaqré shaqtang bv̀nlì wa vsvngrì shvngbe nø dvsháza shóngnøt, cipshì we. nvng kámnøt tvrà taq rip ràwe íe. Gvray yv́ngkèní kùngà lushì nø Epesus, dvzv́r Polo ò shvri kàru rì kàshvbóng dø cìl rì nø døngmvn we tvrà taq ripnø bv̀nlì wáràwe dang dvkám bǿà we íe.

Cil Sasvna dvp nvng singnø shølshú, shvrúngshú rì nø cìl rìnvng singwe pvlàcè dang tvrà shøl we nøt shvlø̀m we nvng Sacramento ìshøt jejú rìsvng tvrà tóngā lv́m dvzaq shìràwe dang dvtú bǿà we íe.
Pope Leo XIV nø Portugal cìl dvp nvng mónggvr dvp rì shvngbe svng Fatima àngmè Mari ò dvsháza mvkok we vdòng mòngzøl lv́m dvpvt vjúrøtā dvbangwe taqsó:rí we lìpùng svng dvdáng lún bǿì we svng shálún shìe.