Yesuí ang svng a:lò we nø, “Nà svng v̄lvtnøng, shvngøt kvt wa mvtaq; shvngøt kvt lòng shvngøtcé kvt gø èchutnaò
Kristu vdòng taq Vpø’ íwe pèmè vnvmchvngmaq, Dèni nø August shvlá Nár vbì ni svng gòng bø’shà. Desháng vrá Pvlàcè nònggùn lùshì lvm Gvray móngkà jømciq nø Mati 18:21-35,19:1 vdòng taqkèní íē.
Mongkà taq;-
Vléò rì kaq svng chutnā rà we
“Vkàngpèá, ngà vnvm vchā:ngí ngà svng nàléngvt nìnø ngàí ang svng kadv́ng kvt chutnālv́m í ma? Shvngøt kvt dv́ngte nø vrv̄me ma?” a:lòe. Yesuí ang svng a:lò we nø, “Nà svng v̄lvtnøng, shvngøt kvt wa mvtaq; shvngøt kvt lòng shvngøtcé kvt gø èchutnaò, a:lòe.
Vpø’ íwe pèmè vnvmchvngmaq, Shànshér pè St.Francis a Sisi ínø Vroqā nø v-rvm vrá mongzøl lòng svng Muqlang móngdàn svng vp tvle lún we lvknak tiqlòng ku lv’ng ya:ngà. Vroq a nø v-rvm vrá mongzøl lòng í wā, Shvngømré Angmè nvng Mònggvn rvgaq yachang svng àngshvr tvlí:ngà nø vshvlà lúnè. Dèni nøngmaqò Mònggvn svng nøngmaqí mvré zā shóngnønt dvtán lúnlvm, Vsvng gø’ vrvm taq Dāwøn bvnlì vlē. Nøngmaqò Mònggvn nø tasvng tale vroq a nø v-rvm vrá mongzøl lvm rì gvzà ra bø’ì. Døngman we dvrá nvng Ngà wàwe cil mvzv’n rì dvhø taqø shóngnønt Dvrá, Mongzøl lòng, vroq a nø v-rvm vrá lv’m lòng svng mvrøt nø bø:lè. Àngde nvng vtu vgám gø dvhø taqø tasvng tale shèrv’m shèráshì lòng í wàgø bø’n mv-lúnshì. Àngde nvng gø’ mongzøl lún ra we íe.
Tiqmaq nø, Angdèo Mvra rì mà roqshìshaq Nønt mvsøn vdòng taqø tiqlvp ngvnshà rì bø’nvm nø lvpat taq Nønt mvgør lvm rì bø’n sháòe. Tiqdvng vsvngò Mvra svng mà roqa gø’ nø, àngde nø angdèo tvrà svng shø’shì gø’ íe. Wervt àngde nø angdè gø, Mvra vchángshì nø, Tiqdvng vsvng nvng gø v-rvm vrá lvm, Gvray nvng gø vzøm nø mongzøl lúnlvm ra vchvkngè. Jø’ngjøngni Vroqāe wàwe Kà svng gvzà shø’n yor we íni gø chaqdvp cvndvgøm nø dvtán lúnlvm nø, gvzà rvzaqè. Vroqā e, walòng nø wè lv’ngchàng wá shvla pvn gø mø-í. Nímzí Bønya Paqzi pàdø nāmwace cvndvgøm nø shvmonshì ra íe. Jø’ngjøngni èshøn lúngò dvgvp, Vroqā lòng nø nímzí Paqzi nvng vbóng we Talen tiqlòng gø íe. Vroqā e walòng svng vtoshì bø’ dvgvp, Nønt mvsøn tiqgóng shvngbe shangshang wa dvbù mongzøl lúnshì lòng nø pà nvng gø tvle mà shvla.. Wervt vpø’ íwe pèmè vnvmchvngmaq, Gvray gvsang yv’ngkèní Vroqā e, wàwe dvshá zā mvkok dvdí shóngnønt Gvray ìshøt svng vtoshì nø, Tiqdvng vsvngrì nvng tasvng tale vrvm vrá taqsórí Vroqā ké laqlúnì wvng dvshat nø nònggùn zí mvyøngè.
Shvngbe svng oqā.
