Nøngmaqò lvpat tvrà yaklvm shìwvt døng taq ínìgø Yesuí nømaq svng mvkok nø ègvr:ìe
St. Peter noqngøm tøm taqø mvngushì ráì we rvcángcèrì kaq Yesu nø nøngmaqò mvsøn nvrøm vdòng taq køqzøl shìnø tvrà shølshú wáshì wawe mòngkà kèní Pope Leo XIV í dvshat nø shvdøm bøà we íe.
Mati 14:22-33 “Tì mvdàm diwe” mòngkà kèní Yesuí coqcvnrì kaq shvdøm uv:ngà mòngkà svng dvtit tvle nø dvshat mòngkà dvtú bøà we íe.
We mòngkà tut taq kadvngshì svre dvké we rvtø rìtaq ínìgø Yesu àng nvng tiqdø vlwe vsvng kagø ínìgø svre lvm mv-vl kámnø taq dvzaqshì ràwe svng shvdøm we íe.
Kàngpè Yesu rvgaq mvdàm tuqráì wervt lvpat gønshaqrì shvngbe nø vlíng bøì nø chutchángwe lvpat tvrà vdòng cúnshì lúnbøshà wervt Yesu vdòng nøngmaq shvngbe nø køqzøl shì ràwe dang dvkám we íe.
Mati 21:21″Yesuí angmaq svng a:lò we nø, “Ngàí namaq svng v̄la:tnìni, namaq kv́mnøt èv̀lnøng sórí, nøt mèdètiqshìnø̀ng kvt kèní nø nv̀mgwè tø̀ng svng wv̀ng bǿngà long namaqí gø wá èlúnnøng mvdv̀m mvtaq, yamvrùl svng, ‘Nàcílshì nø tìnúng svng dègupshivm,’ èv̄lnøng nìgø, wedøni í longe.” wawe mòngkà ciq taqkèní coqcvnrì ò kámnøt svng Yesuí shvdøngā ráà we svng tiqkvt vrá shvdøm wegø íe.
Vdè góng vdè gø ídøm shìwe, shádøm shìwe nøt laqyà rì gø Gvray àngmvr dàng taq mvwáshì lvm nvng kadø íwe yvklvm shìwvt rì dvhø taq ílong nìgø Gvray yvngsvng kám vløm shì taq só:rí dvzaqshì nø vle lúnwe tvrà nø Gvray àng shóngwám shìwe svng shvdøm nø nvnggwøn ziwe íe.
Yesu Kristuí nø nøngmaq kaqsvng kadvgvp gø ègur lú:ngì we møí àngyvng svng vjúrøt shàìwe tvrà kèní vtoq vtip shìlvm, cipshì we nøt laqyàrì taqkèní lvpat tvrà svng àngnvng tiq tvrà tiqdø, cúnshì lúnlvm vchvk we íe wanø Svrabín koqkvnpèí Leo XIV í dvkám we íe.
