Yesu taq zø’mshì nø Cúnshì lúnlvm dvkv’mè

(19th Sunday of the year, Cycle A)

Shóngshø’ng we pèmè vnvmchvngmaq, Ya lvban nø Angwa Nár (19) lvban wà lvban svng gòng bø’shà.

Ya lvban taq Rø v-du we móngkà Jømciqrì nø :–
(1) 1Koqkvm 19:9,11-13
(2) Roma 9:1-5
(3) Mati 14:22-33.

1Hkawhkam 19:9a,11-13a …

Shøm wace vl we shvra yv’ngø, Gvray nø Elia yv’ngø dvtánshì tvrà svng yv’nglúnshìe.

Roma 9: 1-5 … Israel dvcirì mvdvm yv’ngø tuq we Jèjú ìshøt rì svng, Dvzvr Polo í nø vjang nø shø’n we í shvngøt dvtúè.

Mahte 14: 22-33 …. Yesu nø tì mvdvm dvm dì lúngì. Dvzvrì ínø Àng nø Gvray gvsang Angcè pè jø’ngjøngni íe, wā kv’mè, vjangò tvrà yv’nglúnshìe.

Vpø’ íwe vnvmchvngmaq, Dènio Gvray dvbùshang Mongkà taq,
“Yesuò Dvzvrì í mvru me vhø’mòe”

Vkangpè Yesu nø dørøm rvtø taq, kùngshí zúnshì nø tìnúng kupà svng léshìe. Àng lvmboqrì yv’ng svng vrá nø tuq lúngì. Wè tìnúng nø dvgá mø-í. Galile tìnúng ni íē. Nvmbøng mvru me gvzà mut nø wà we rvtø íe. Yøm yøm wa dø ráì rvtø í rvt, nē í gø shvlá wa mvyv’ngshì. Nvmbøng mvru me mut ráì rvt nø, kùngshí gø tvnéné vkùp nø, gvzà svrē nø vnv’n we rvtø taq, Yesu nø àngmaq yv’ng svng di ráì. Dvzvrì ínø “Rvshā” íe, wa lv’nò nø gvzà svrē è. Vpø’ íwe pèmè vnvmchvngmaq, Nvmbøng mvru me yalòng nø, rvzvngcerì dvpvt, lvpatnò Nvmbøng mvru me (gømlā)í á:mì.

” Lvpatnò mvru me ” wàwe taq;–

Nøngmaq shvngbe i vhø’mì we mvru me (storm) nø Tonio dvja rvt bø’n bùng pàdø, Dvgá pvn rì gø mvme vlē. Zā yv’ng dvjáng rvnaq rvt vhø’mshì we mvru me, Tiqdvng vsvngrì nvng V-toq V-tip vzøm vzapm we tvrà taq mongzøl lòng mà-vl, rvzaq we tvrà rì, Rúng rì taq Mvdvm kèní shølshú rì nvng vzøm vzap we tvrà taq mongzøl lòng vtō mvlúnshì, àngde í wáshì we bvnlìrì kèní narshì dvzvr we, vtu vre vgám nø shøm we í dvshá vhø’mshìe. Yadø íwe mvbø’n rì rvt, dvshá mvhøt yvklvm rì vhø’m sháshìe. Yalòng gø lvpatnò mvru me, wànø gø shø’n shvlāè, mà léshì.

Kadvtutshú Elia svng gōò we

Kadvtutshú Elia nø, Àng svng vtu vgám, matōò vsvngrìo Wur taqkèní lutshì lúnlvm dvpvt, ( Horeb ) shigung mvdvm kaq yílshì á:mì nø, Longpuq tiqlòng taqø, gvzà Nønt dvt, Nønt yòr, Nønt cvm we í máshìe. ” Gvray ínø wè Longpuq yv’ngkèní èlōvm wā Elia svng a:lòe. Vrá nø, wè shigung mvdvm yv’ngø, Gvray mvrdvng taq èrip a:lòe. Wè mèpvng Nvmbøng mvru me mut ráì. Wè mèpvng vrá nvmnø’ vnvnshi daqì. Nvmnø’ vnvnshì bø’ì mèpvng, Svmi vcó:ràì. Íni gø, Gvray nø, wè Nvmbøng mvru me, nvmnø’ vnvnshì lòng nvng vcór we Svmi pùng taq mà ba.
Lvngdøm taq, nàmwace zøl we, gøng we Kà shaq svng tálúnòe. Wè nàmwace zøl we shvra kèní Gvray ínø Elia svng vtōò nø gōòe. Elia gø àng laqtun belaq yvnggúng dù:ngì àng mvr svng wv̄mshì nø, Longpuq shvnvng yv’ngø rip a:mì. Vpø’ íwe pèmè vnvmchvngmaq Yalòng Mongkà svng dvdvm taqsórí nònggùn zí mvyø’ taq, Gvray gvsangò mongzøl we Kà shaq svng tá lúnlvm dvpvt, Shøm wace zøl we rvtø rì svng gø nøngmaqí lá lúnlvm rvt, gvzà vchvkngè walòng svng shvdømè.

Vrá nø, “Vkàngpèá, Ngà svng shèlutnàé,” wàe.

Galile tìnúng nø gwà nø yvnggúng kaq 13(ming), Gwà kaq 8(ming) vl we svng shálúnshìe. Yesuò lvmboqrì Vkangpè í dvzvrò dø tiqdvchá, kùngshí zúnshì nø tìnúng kupà svng léshì a:mì. Dø røm rvtø í rvt, ne í shvlá wace mvyvngshì. (8) Ming Gwà we tìnúng me tiqlòng svng rapshìe. Wè dvgvp, Nvmbøng mvru me mut lúngì nø tìma rì gø pvlòng lú:ngì. Àngmaq nø tìnúng me mvdvmø dvshà mvhøt yvklvm vhø’mòe. Wè rvtø taq Vkangpè Yesu nø tì mvdvm dvm àngmaq shvnvng kaq dì lú:ngì. Dvzvrì ínø mà mvshvlò rvt nø, Rvshā íe, lv’nò nø vnvnè, svrē è. Dvzvrì gvzà svrē rvt, vkiq è. Wè kvt Yesu ínø ” mèsèrénø:ngnì ngà øngàe” a:lòe. Piter vtánshì nø, Vkangpèa Nà è íni ngà svng shelutnà a:lòe.

Yesu í, ” èdi ra” a:lò nø Piter svng gōòe. Piter kùngshí kèní la shì daqì nø, vtì mvdvm dvm dì sórí, Yesu yv’ng dì lú:ngì. Íni gø, Nvmbøng mvru me svng yvng bø’à kvt, Àng svrē lú:ngì. Àng nø tì taq vjúmlv́m wáshì rvt vkiq sórí, “Vkàngpèá, shèlutnàé,” wā røtnímshìe.

Yesu wur zúshi nø, ang svng ta:pmò sórí, “Kv́mnøt ècv̀m pèé, pàwálv́m kv́mnøt nàwv̄lshìe?” a:lòe. Yesu nvng Piter àngní lvngà kùngshí yv’ng svng zàngshì bø’ì dvgvp, mvru me gø wè lv’ng íni zøla:mì. Wekvt kùngshí vdòng taq v̄l rì angmaqí nø Ang svng køt ngǿmshì nø noqò sórí, “Nà nø jø̀ngjǿngnì Gvray Angcè pè ni èí dá:rì,” a:lòe. Vkangpè Yesu nvng tiqdø vl dvgvp Dvzvrì ínø dvbù Nøntshøm Mongzøl lòng lúnò lòng svng vkvtdø yv’nglúnshìe.

Yesu taq zø’mshì nø Cúnshì lúnlvm dvkv’mè

Vkangpè Yesu Kristu taq zø’mshì nø Cúnshì lúnlvm nø gvzàni vchvkngè. Yalòng nø rvzvngcerìo Kvmnønt lòng íe. Nøngmaqò lvpat nø tì mà pàdø íe. Dvzvrì nø Vkangpè Yesu nvng tiqdø vl dvgvp, Nvmbøng mvru me nvng tì mà pvlòng we svrē lvm yv’ngkèní lutshì lúnò nø, mongzøl lòng svng vtoshì lúnè. Vpø’ íwe pèmè vnvmchvngmaq, Nøngmaqí gø vhø’mì we dvshà mvhøtlvm, yvklvm rì shvngbe svng dvshérà lvm, vlømshàì we taq tø’nzv’n lún we, jór lún we Jèjú ìshøt kūnga vzàm rì svng mvng Vkangpè Gvray kaq Kvmnøntní vjú vra røtním tvleshì laqlúnì, wvng dvshat taqsórí vrashì mvyø’è shvngbe svng oqā.

” Yesu kà tv́ngshì nø shø’n we taq, “Shø̀mwa èv̀lnøng, Ngà ǿngàe; mèsèrenøngni,” a:lò nø àngmaq svng dvkv’mò pàdø dèni Nøngmaq gø’ vrvm kaq svng gø dèkv’mìe…”(Mt 14:27).