Yesu mv̀rshv̀m shø̀ngshang vmvtná:mì we
Kristu vdòng taq Vpø’ íwe pèmè vnvmchvngmaq, Dèni nø August shvlá Nár vbì ni svng gòng bø’shà. Dèni dvdvm vjáng nø nònggùn lùshì lvm Gvray móngkà nø Mati 17:1-9 vdòng taqkèní íē.
Mati 17:1-9 ciq taq;-
Vpø’ íwe pèmè vnvmchvngmaq Vkangpè Yesu mv̀rshv̀m shø̀ngshang vmvtná:mì we tvrà svng vkvtdø dvdvm vjáng lúnshìe. Vkangpè Yesu ínø lvmboq Piter, Yaku nvng angnv̄m pè Yohan svng shø:lò nø, vháng we shìgùng kaq angmaq wawa ngvngá:mì nø Dalvm gømlā rì dvtánòe. Kadvtutshú rì Shvngbeò tvle Elia nvng Gvray yv’ngkèní Dvrá Mongkà rì svng lu yangà we Moshi nvng tiqdø Gvray nø shigung mvdvmø Kà shø’n yangì. Kàgvp anglí bà:nò mvdøng vchvk vtv’ng íwe vní (2)pè svng Àng shvnvng yv’ngø gvlò nø mvrshvm shøngshang vmvtná:mì tvrà svng nøngmaqí yvngì taqsórí Kristu ínø Kadvtutshú rì í dvshvng yangà we chutchvng lòng, Dvrá Upvdìo angké Svra pè, Vsvng lvpat mvshøl taqø Gvrayí dvnùng lvm íwe chutchvng lungò angkang pè íe, walòng svng dvtánò lòng gø íe.
Íni gø lvmboqpè la ínø Angkang mvrshvm shøngshang vmvtná:mì lòng, àng lvjøm svng mvsíng mvràlò. Vkangpèo jór pòngbang lòng svng àngmaq nē taqkèní chaqdvp yv’ng lún bø’à kvtwā Dvzvr Piter í Vkangpè a ya shvra taqø gvzà vl byō e. Elia dvpvt shiyvt tiqchvng, Moshi dvpvt shiyvt tiqchvng, Vkangpè dvpvt shiyvt tiqchvng shiyvt Vshøm chvng wàì wā dvmvn nø shø’nè. Shigung mvdvmø Vkangpè mvrshvm shøngshang vmvtná:mì tvrà svng dvdvmò nø shigung yv’ngkèní lo mvneshì. Àngmaq vlømshì nø dvdvmò we nø, Chvngkangpè nø Muqlang rvmøtrì mvdvm zúnshì nø ídv’ngte Pvn v-rvm shvngbe svng dvtú lún gø’, jór nònggùn kūnga vl gø’ í ràe, wā dvdvmòè. Vkvtdø jór pòngbang taqkèní dì ra nø Vsvngrì shvngbe kaq svng chutchvng lúngò nìnø, shvngbe nø mongzølá:mè, vtv’ngvmè wā dvdvmòe. Íwe, Mvrshvm shøngshang màmvt we rvtø taq, Àng lvmboq pè la svng ang Pà bø’n longè, walòng svng vshø’nshaq íe. Vkangpè ínø Ngà nø menatō lòng. Shaqré shaqtáng rì Wur kaq Tele bøngè. Dvshà mvhøt vhø’m lúngòe. Vtu vre vdìp weí èshat lungè, wā vzàng kaq tvlú vshø’nàshaq íe. Jø’ngjøngni Kristu Gvray nø , Àng nø Gvray í lòng, jór pòngbang gømlā svng Mvrshvm shøngshang vmvt we, Lvmik gømlā svng shigung mvdvmø tiqlvngce wā dvtán yangà we íe. Vkangpè Yesu Kristuò Jór pòngbang Jø’ngkvp lòng nø Gogotaq shigung mvdvm Wurgang me mvdvmø vlē walòng svng vjáng taqsórí dvtàn yangà.
Vpø’ íwe pèmè vnvmchvngmaq, Nøngmaqí Gvray kaq Noqngømì rvtø, Vjú røt ì dvgvp Vpè , Angce pè, Shànshér Pvlàcè bøng taqkèní Wurgang mvsat wáshàì nø Kvmnøntní vjú røt shàì lòng nø Vkangpè Yesu Kristuò chutchvng lòng, Jór pòngbang svng dvtànì lòng, dvbù Nøntshømì weí mongzøl lòng svng vtoshàì lòng íe.
Mongkà ètashìnøng we Shvngbeí Gvray mongzøl lòng vtoshì leqlúnøng Shvngbe svng oqā.
