Dvyø shvlá nvng shvlepā søn shí
Kristu vdòng taq Vpø’ íwe pèmè vnvmchvngmaq Ya lvban nø, Angwa Nár (16) lvban wà lvban svng gòng bø’shà.
Rø v-du we Móngkàciq rì:-
(1) Bønya Bā Rvmi 12:13,16-19
(2) Roma 8:26-27
(3) Mati 13:34-43
Bønya Bā Rvmi 12:13.16-19 …..
Vkangpè a, Na taqkèní dvgá, vsvng shvngbe svng kùpgar we Gvray mà-vl. Nà jór nònggùn Pòngbang nø Døngman lòngò Nvmlat mvpvng íe. Na ínø ídv’ngte Pvn v-rvm shvngbe svng øp lúnè.
Roma 8:26-27 …. Vjú røtshì shvla dø tiqdvchá, kadø vjú røt ràì we svng nøngmaqí mvsháì we ínìgø, Shànshér Pvlàcè A:ngí ni, nònggø:pmí shǿn mvngu:tnì we, dòngnøt rvlà kàí shǿna dèba:ngìe.
Mahte 13:24-30 …. Vkangpè Yesu ínø, Muqlang móngdàn nø rvmá hvng Kona taq Dvyø wønò we nvng vbóngè, wā Kashvbóng mvshøl taqkèní shvngøt dvtú íe.
Dvyø shvlá nvng shvlepā søn shí
“Dvyø shvlá nvng shvlepā(søn)”
( Parable of wheat and weed) ò mvshøl Kashvbóng svng vrá tiqkvt tálúnìe. Nøngmaqò Mònggvn, nøngmaq Cúnshàì we lvpat taqø, shvla lòng nvng mà shvla lòng nø kadvgvp gø tiqdø vlē, walòng svng vsháshaq íe. Gvray nø shvlá vtv’ng nvng mvkok dvdí shóngnønt dvnzøng pè íe , walòng svng Mongkà kèní shengøt dètú íe. Gvray nø Nønt yv’ngè, dvshá zā mvkok dvdí tùbùm dvbvng shóngnønt lòng nøngmaq Bāsha vsvngrì í síngràl lúnì we mvdvmø, Téwa shø’n mvtø’mshì dv’ngte gwàe,shvdún mvlúnshì dv’ngte tēè, walòng svng shálúnshìe.
Vkangpè Yesu shø’n we Kashvbóng
Yalòng Kashvbóng mvshøl taq, Dvyø shvlá wønò pè nø, Kagø’ íe? Vpø’ íwe pèmè vnvmchvngmaq, Vkangpè Yesu Kristu àng góng kaq svng dvtúò nø shø’n Kà íe. Kona nø Mònggvn rvgaq yachang íe. Shvlepā søn wønò pè nø (Satan) pè kaq svng shø’n mvyø’ Kà íe. Shvla we dvyø rì nø Muqlang móngdànò angcø angcèrì ínø, shvlepā (søn) angshí nø (Satan)ò angcø angcèrì kaq svng dvtú nø shø’n Kà íe. Zvnggá lap wàwe nø, lvngdøm angni taq ka:ngé lv’m lòng svng shø’n mvyø’ dang íē. Zvnggá lap tuqlòng dvgvp, shvlepā svng rvzvng nø Svmi í wú:r lv’m í lungè, wàe. Vrá nø, Vm vbø svng mvng nø Angkang pè vzá taqø càng bø’òe, wàe. Vm vbø’ shvrvtrì nø, Muqlang dvzvr rì íē. Shvla rì nø màshvla rì dvhø vdòng vl ra íe, íni gø angmaqò màshvla we vjang laqyà, Nønt vjang laqyàrì svng len nø cvndvgøm lúnlvm dvpvt nø mø-í. Àngmaq nvng tiqdø v-li we íni gø, Angmaq taqkèní shvbóng shvmvtshì nø cvnshì lv’m nø mø-í. Zvnggá lap wàwe, lvngdøm angni taq Ka:ngé lv’m lòng nø Jø’ngjøngni vle, wà Kà íe. Kagø’ íni gø yalòng yv’ngkèní lutshì lúnlvm mà-vl, walòng svng gø Vkangpè Yesu Kristuí vkvtdø Kashvbóng mvshøl taqkèní shvngøt dvtúè.
Tvlíng lúnè
Vrá nø Àng dvja ku èshøn lúngò dvgvp, shvlepā nø, Vm vbø’ bø’n mvdaq. Íni gø, vsvngrì dvpvt nø màshvla vsvngrì vwv’ngshì lún nø, shvlá we vsvngrì bø’n lúnè. Wervt Vkangpè Yesuí nø, Vm nvng shvlepā tiqdø zvnggá lap høqshaq shini laqyō wā wàkà íe. Nøngmaq svng shvngøt dvtú we nø, Nønt yv’ng ràe, kvmnønt vl ràe (patience) wàkà íe. Vkvtdø íwe màshvla pvnrì svng dvshé:rà lúnlvm dvpvt nøngmaq nø vjúrøtshì ràe. “Kadø íe wani kadø vjú røt ràì we svng nøngmaqí mvsháì we ínìgø, Shànshér Pvlàcè A:ngí ni, nònggø:pmí shǿn mvngu:tnì we, dòngnøt rvlà kàí shǿna dèba:ngìe.”( Roma 8:26b).
Vpø’ íwe pèmè vnvmchvngmaq, Nøngmaq vlømshàì lòng nø, Vkangpèa, Na taqkèní dvgá, vsvng shvngbe svng kùpgar we Gvray dvgá dø mà-vl. Nàí Kà èrvtnò lòng svng màdu we pà vl ni mà?( Bønya Bā Rvmi 12:13)ciq wàwe Mongkà taq mvpvng angké vrvngò tvrà íe.
“Ya vní pv̀npv̀n nø shvrvt dvkøm rvtø̀ høqshaq tiqrárá laq yō.” wàe.(Mati 13:30a).
