Vshø̀m mvrìng ngā:nò we
Shvngbe svng pamvra deni Gvrayí ziwe rvtø shvla vdùng taqø dvdvm vjvng nø Pvlacè nvnggùn lushìlvm Gvray mòngkà
We mèpvng Yesuí nø, Ang jórnònggùn bv̀nlì té wà bǿà we mvrìng rì angmaq nøt màwv́ngshi ra rvtnø, ngv̄n pà:ngò nø yadø wae. “Korazin mvrìngé, nà nø mèhøt longe; Betsayda mvrìngé, nà gø mèhøt longe. Kadø íe wāni nàní dvhø̀ taq wv̀ng bǿngà we jórnònggùn bv̀nlì rì nø, Tiru nvng Sidon wamàní taq lā wv̀ngò pà í nìnø, cáyaqni dvnggǿ gwāshì nø, waqpú taq rūng sórí nøt dvlíngshivpni.
Ngàí nàní svng v̄lvtshìni, kàngé daq we angni taq, nàní mvhøtlv́m lòng nø, Tiru nvng Sidon wamàní mvhøtlv́m lòng mvdv̀m té vlishi longe. Kapernum mvrìngé, Nà svng nø muqlàng høq ni èhàng longe èlv́nshi ma? Zùpvng dāng svng lè dèdòr bø̄e. Kadø íe wani nà vdòng taq wv̀ng bǿngà we jórnònggùn bv̀nlì rì nø, Sodom mvrìng taq wv̀ng yv̀ngò pa í nìnø, Sodom nø dèni høq v̄lni we íe. Ngàí nà svng v̄lvtnøng, kàngé daq we angni taq, nà mvhøtlv́m lòng nø, Sodom mvhøtlv́m lòng mvdv̀m té vlishi longe,” a:lòe.
Deni mòngkà taq Kàngpè Yesuí Ang jórnònggùn bv̀nlì té wà bǿà we mvrìng rì angmaq nøt màwv́ngshi ra rvtnø, ngv̄nò we svng yvnglúnshìe. Pàlvm wani Kàngpè í wa bǿà we jórnònggùn bv̀nlì rì svng yvngò ínìgø nøt língshìlvm màvl. Gvrayí zì we dvkvmkà svng cvn nø nøt língshì rì nvng nø shvlut we lúnshì lùnge. Nøngmaq cúnshì we lvpat taq nøt língshìlvm vchvte. Nøt língshìrì nvng nø dvciq ciq cúnshìlvm gø’nshaq lúnlvm vpatlvmrì ílùnge.
