Ngà mèpvng ècvnránøng: wā Kà vgo zø’m nø nònggùn zí mvyø’è.
.(14th Sunday of the year A)
Shóngshø’ng we pèmè vnvmchvngmaq Ya lvban nø Angwa Nár (14) lvban wà lvban svng gòng bø’shà.
Rø v-du we móngkà ciqrì;-
Zekaria 9:9-10
Roma 8:9,11-13
Mati 11: 25-30
Jøm Mongkà ciqrì:-
Zakaria 9:9-10 ……. Zakaria ò Kadvtutkà taq, Vpè Gvray nø Zion wama svng dì daq nø, wè yv’ngkèní øp kvng lúngòe, wā dvkv’mè.
Roma 8:9, 11-13 ….. Namaq vdòng taqø Gvray gvsangò Pvlàcè vl nìnø, Namaq nø shagóng taq mø-í, Pvlàcè taq ni evlnøngè, wā Dvzvr Polo í shvngøt dvtú nø dvkv’mè.
Mahte 11:25-30 ….. Vkangpè Yesu shøn we móngkà taq, Paqzi vl vsvngrì nvng shá vpvn Nønt vl rì yv’ngkèní, Gvray gvsangò dvkv’m Kà me rì svng màò we íni gø, cvmré rì kaq svng dvtánò rvt, Vpè Gvray kaq shvgùn shvringòe, shø’nè.
Ngà mèpvng ècvnránøng: wā Kà vgo zø’m nø nònggùn zí mvyø’è.
“Vlishì we døngjá èrínøng nø mèjòrnøng rì namaqé, Ngà yv́ng èdi ránøng; Ngàí namaq svng nārshì dvzv́ra:tnìni” wàe (Mt 11:28). Vkangpè Yesuí go we móngkà yalòng nø, Nøngmaq svng shøtshú dvnglúnce narshì dvzvr we móngkà ni íe. Nøngmaq Cúnshàì we lvpat taq mvbø’n tvrà angké rì mvmè rvt, mvjòr vhø’mìe. Wè rì yv’ngkèní ‘ Mvra svng wá vlé lú:ngì dvgvp, Vkangpè nvng vca:rìe, nøngmaqò Pvlàcè, nøngmaqò Nønt mvsøn vdòng taq shø’n mà shvla Nønt cvmì taqsórí mvjòr vhø’mìe. Wervt Nønt mvsøn vjang laqyàrì na wv’ngshìnøng nø ‘Ngà mèpvng ècvnránøng’ wā Vkangpè Yesu shø’n Kà svng, dvkv’m Kà svng tashì nø, Cìpshì we Nønt mvsøn Kvmnøntní Nønt nawvngshì we taq, Dalvm Gvray gvsangò Jèjú Gønpaq rì svng vtoshì lúnlvm vlē. Vtoshì lúnlvm i daqè.
Ngà taqkèní ècv̄nshì ránøng;
“Ngà paqdv̀ng èrínøng nø,Ngà taqkèní ècv̄nshì ránøng; pàwálv́m wani Ngà nø nøt kø̄n nø cipshø̀nge. Wekvt namaq dòngnøt mvsø̀n* dvpvt nārshìrà lá èlún lóngnønge”(Mt 11:29). Kadvtutshú Zakaria Kàru taq,
” Eyà:ngò, nà koqkv́mpè nø nà yv́ng svng di daqe. A:ngí vdu vbóng dø rvwa:nò nø, gø̀nshaq shvlutnalv́m jórnònggùn gø Ang v̄le. Ang nø nøt cipshì nø Lòzèdvcheqcè mvdv̀mø ni zúnshìe.” wā shø’n yangì. Roma Shvngømré vsvngrì kaq dvzvr Polo í shvri we Kàru taq gø, “Nàmaq nø góngsha nøt ècv̀nnøng nø ècúnshinøng kvt kèní nø, nàmaq shí ràe. Wedø ínìgø Shànshér Pvlàcè taq kèní, shagú:ngí wàò bv̀nlìrì svng nàmaqí dvshí èmvnnøng kèní nø, cúnshì èlún lóngnønge” wàe
(Roma 8:13b). Vpø’ íwe pèmè vnvmchvngmaq, Yalòng Mongkà rì svng nøngmaqí cvndvgømì nìnø, Vkangpè Yesu Kristu yv’ngkèní nøt kø̄n nø cipshì Nønt svng cvnshàì lòng nvng vbóngè, walòng svng shálúnshìe.
Shvgùn shvring we
Shvla we ídv’ngte Jèjú pvn vrvm Shvngbeo angké angkang Vpè Gvray kaq svng shvgùn shvringì.
Cvmréce dø íshà we Nøngmaq kaq Gvray gvsangò dvkv’m Kà me rì svng dvtánò rvt, dvbù Nøntshøm sórí Àng Jèjú svng shvgùn shvring ra íe.
Vkangpè Yesu shø’n yangì we taq, ” Ngà paqdv̀ng èrínøng nø,Ngà taqkèní ècv̄nshì ránøng; Ngà mèpvng ècvnránøng’.” wàe. Paqdv̀ng wàwe àng lvjøm gømlā nø, Dari lvpat taqø, Vshuq nvng Angkang dvhø taqø vzøm vzap (slave and master relationship) we taq gvlò lòng svng shálúnshìe. Vkangpè Yesu lvpat taq nø, ” Yesu nvng Dvzvrì vzøm we Tvrà”(disciple and master relationship) svng shø’n lòng íe.
Vkangpè Yesu nvng tiqdø v-li nìnø, Nøngmaqí rí mvdv’ngshì we døngja pagø mà-vl. Parishi rì nvng Dvrá Svra rì í shvngøt dvtú dvkv’m we Kà rì nvng gvzà vcārè. Yesuò Mongkà svng tashì sórí nøngmaqí cvndvgøm lúnì, narshì lún we Jèjú ìshøt rì svng vtoshì lúnlvm vlē. Gvrayò Gálong, Gvrayí zi we Mongkà lòng svng vtoshì nø, yalòng mvbø’n tvrà rì taqkèní Nønt mvsøn nònggùn kūnga àngshvr, àngshvr í vrá kūnga lùshàì nø, Mongzøl dø Cúnshì lún we Jèjú ìshøt rì svng mvng røtním tvleshì laqlúnì….
” Vl dv́ngte shvngbe nø Vpèí Ngà svng tvleshaq íe. Vpèí wa mø̀í nìnø, Angcè pè svng sháò vsvng tiq gǿ gø màvl. Vrá, Angcè pè nvng A:ngí dvtánā mvyǿ gǿ wegǿí wa mø̀í nìnø, Vpè svng sháò vsvng tiq gǿ gø màvl,” wae.(Mt 11:27)
” Vpè ínø vl dv’ngte shvngbe svng Ngà yv’ng vp tvleshaq íe “.
