Shvngbe mvdvm Gvray mongzøl lòng laqtuqdaq! Dèni Pvlàcè nònggùn lùshì lvm Gvray móngkà nø, Marko 12:35-37 vdòng taqkèní íē.
Yesuí Farisirì svng rø:tnò we
35 Yesuí Noqngø̀m Tø̀ngnø vdòngø shvngø:tnò dvgvp angmaq svng yadø rø:tnòe. “Dvrá svrarìí Kristu nø Dawi ang Pvlí pvlaq pè íe, wa nø kadø í rvt vrū yà:ngà ma? s 36 Pàwá wani Dawií ni, Shànshér Pvlàcè taqkèní shø̀n yà:ngà we nø, ‘Vkàngpèí ngà Vkàngpè svng, Nà ngv̀nshà rì svng, Nà hí lv̀ngpvngø Ngàí màyàlò dv́ngte, Nà nø Ngà vbàng pa yv́ng shini rúngdv̀ng èwa long, a:lòe,’ wae. t 37 Dawií dv́ng Kristu svng Vkàngpè, tǿ yà:ngà. I ni, Ang nø kadøwa rá ang pvlí pvlaq í ni ma?” a:lòe. Wervtø̀ taq bashà rì nø shaqshaqwa Ang kà svng tāshie, wàe.
Kristu vdòng taq Vpø’ íwe pèmè vnvmchvngmaq;….
Shànshér pè St. Boniface nø (4)yá yá-mvzøq vdòng German móngdàn taq vl shvngømré kaq Gvray Dvbùshang móngkà dvshér lvm nvng Dø’ngvng lúnlvm dvpvt Angò tiqlvpat svng vpnóngshì yangì. Vkangpè Yesu Kristu pàdø àng nø Kristuò Hang gømlā Dìngman Dvrá lòng svng Dø’ngvng dø dvshérò nø Vkangpè Yesu kaq angkang ku Tiqdvng vsvngrì í dvdut lúnlvm rvt tùbùm dvsher dvbvngshì yangì.
Nøngmaqò ni vrvm lvpat taq gø , Nøngmaq dvpvt Vkangpè Yesu nø kagø’ íe, walòng svng síngràl shálúnlvm dvpvt nvng wè síngràl Nyan Bønya Paqzi lòng svng tiqdvng vsvng kaq dvtit tvleā lúnlvm dvpvt Kristu ínø nøngmaq kaq svng ègō íē. St. Boniface í nø Kvmnønt tvrà svng àng tiqlvpatnò nònggùn kūnga taqkèní dvsher nø dvzaq dvkv’ngshì yangì pàdø Nøngmaq gø nøngmaqò Pvlàcè Kvmnønt tvrà taqø vzaqshì taqsórí shvkse wáshì laqlúni. Nøngmaqò Vkangpè Yesu Kristu nø shvlá vtv’ng í lòng svng mvsat shvdø’ng lúnlvm, Àng nø lvpat taq gvzà vchvk we rìng vtv’ng tiq pè mvshøl tiqlòng wā mø-í. Àng nø Nøngmaq dvpvt Chut chvng angkang pè íe, Vkangpè Yesu Kristu nø nøngmaqò Vkangpè ku, Chut chvng angkang pè ku, vtō nø mvsvt shvdø’ng shì weí, Tiqdvng vsvngrì kaq svng gø wè dø tiqdvchá dvnúng lúnlvm, shvkse wáshì lúnlvm dvpvt shvdømè. Shvngbe svng Pmr.
