Dèni tashì lúnlvm Gvray Mongkà nø, Marko 11:11-26 taqkèní íē.
Yesu nø Yerusalem wamà svng tuq ráì nø, Noqngø̀m Tø̀ngnø vdòng svng gòngá:mì. Gùrhømhøm shvngbe svng A:ngí yà:ngò dá:ngí, dørø̀m høqa:tnà rvt tiqcé vní pè nvng tiqdø Ang nø Betani mvrìng svng dìá:mì.
Nv̀mgwè tø̀ng mvtá:nò we
12 Mèpvng ni angmaq nø Betani mvrìng kèní dì ráì dvgvp, Yesu svrí shì lú:ngì. 13 Vrúm yv́ng angcvp pǿng we nv̀mgwè tiqtø̀ng svng yv̀ng bǿà nø, wetø̀ng taq angshí tiq chv̀ngchv̀ng shíe má wa yv́ng nvng die. Weyv́ng tuqá:mì nìnø, nv̀mgwè zí rvtø̀ mø̀í rvt, angcvp wa mø̀íni pà gø mvyà:ngò. e 14 Wervt A:ngí wetø̀ng svng, “Akvt kèní kukaq tiq gǿí gø nà yv́ng kèní angshí laq mvlúnv́m dá:rò,” a:lòe. Wekà nø Ang coqcv́nrìí gø táòe.
Shóngshø’ng we pèmè vnvmchvngmaq, Dènio Gvray dvbùshang Mongkà taq Vkangpè Yesuò Dālvm mvshvlpvrá gømlā rì svng yv’nglúnshìe. Vkangpè Yesu ínø angshí mvzí we nvmgwè tø’ng nø Israel dvcirìo Pvlàcè tvrà nvng gø singè. Pàwálvm wàni Angmaq Kà shvdiq mvdøng we, Gvray dvkv’m Kà svng mvtā we, Vkangpè Yesu svng māò lòng nvng singè. Ne í yv’ngshì rì svng Mvdvm shvlē taqkèní wā gun dvtøpshì lòng í vsvng shvlá wā sun mvdaq, bø’n mvdaq. Lvngdøm taq Dvrá dvra we vhø’m lv’m vlē walòng svng dvtánòe.
Vní lòng walòng taq Vkangpè Yesu Kristu nø Noqngøm Chøm vdòng yv’ngø gvtnvm vsvngrì svng lùngò lòng nø, Tiqdvng vsvng mvdvm, vrá nø téwa nø dvsháhot vsvngrì mvdvm, vmyat la we, vsvng kaq mvdøng mvman dø yúmvm we vsvngrì kaq svng vchàng nø dvtàn lòng íe. Lvngdøm taq Vkangpè Yesuí nø Dvzvr pè la svng Kvmnønt vl lvm dvkv’mòe. Kvmnønt è vl nìnø bø’n mvdaq wā dvdvmshì rì shvngbe svng gø dvnúng lúnshìe, wā shø’n lòng yv’nglúnshìe. Lvpat taq nøngmaqí wàì we bvnlìrì shvla lòng nvng mà shvla lòng yv’ngkèní vjú jèjú rì svng jø’ngjøngni vtoshì lúnlvm vlē. Wervt Vpø’ íwe pèmè vnvmchvngmaq, Nøngmaq nø Kvmnønt tvrà taq vháng vlúnlvm dvpvt nvng angshí shí we, vjú jèjú rì svng dvbung lún we, shvkse wáshì lún we Kristuò dvzømshú rì wáshì lúnlvm dvpvt vjúrøt tvleshì nø Pvlàcè kūnga lùshì laqlúnì, shvngbe svng oqā.
