Mòngzø̀l we mònggv̀n rvgaq svng vrang lúnlv́m dvpvt shv̀nshér pvlàcè í leqdèbang daqì wawe Pope Leo XIV ò vjúrøt mòngkà
Regina Caeli vjúrøt kùng taq Pope Leo XIV taqekèní vsvngrì kaq shv̀nshér pvlàcè kaq vjúrøt dvzaqshì lv́m dvkv́m ráà we íe. Shv̀nshér pvlàcè taqkèní nø kámnøt tvrà svng vtáāì we ínø̀ noqngø̀m svng nø vsvng kaya svng vto lúnwe shvrà tiqlòng ku dvcøpā we íe.
Vránø vdè tiqgǿò vjú dvpvt wa wáshì vsvngrì, mvnoq mvkám we tvrà, tasvng shvngō kewe rì svng shvzǿmā lv́m nvng vsvngrì dvhø̀ tasvng shóngnøt kèní vzø̀m lv́m tvrà rì svng tóngā shú íwe dang dvkv́m bǿà we íe.
Svrabín koqkv́mpè taqkèní Shv̀nshér pvlàcèí tánā we bángkà 3 lòng dang svng gø vtàn bǿà, werì taq 1 Gvray yv́ngsvng tvpní shìlv́m bángkà, 2 Yesu yv́ngkèní Gvray yv́ngsvng tuq dvzv́r we bángkà 3 ni vrv̀mò nøngmaq cún shàì we lvpat tvrà taq Gvray àngnvng tiqdø vzø̀m lúnwe tvrà svng gø ètóngāì we bangkà rì íwe dang dvtú we íe.
2 lòng wawe bángkà nø noqngø̀m tø̀ngnø bángkà íe. Shv̀nshér pvlàcè taqkèní nøngmaqò svrenøt rì svng dvshérā nø̀ noqngø̀m tø̀ngnø bángkà svng vsvng shvngbe dvpvt ílv́m dvbangā we íe. làngdø̀m bángkà lòngnø vsvngrìò dòngnøt mvsø̀n bángkà íe. Shv̀nshér pvlàcè nø vsvngrì ò mvsø̀n nvrø̀m dòng gònglv́m bángkà svng ètánāì nø màshvlawe nøt mvsø̀n rì svng dvshérā we íe.
Nøngmaqnø Gvray àngshóngshìwe àngcǿ àngcèrì íe walòng svng síngshá lúnlv́m vchvk we íe. Wekvt wa noqngø̀m tø̀ngnø wawe nø mòngzø̀l we shvrà tiqlòng íe walòng svng síngshálún vtolún lú:ngì nø̀ mòngzø̀l we mònggv̀n tiqlòng svng vrang lúnlv́m ílonge.
Regina Caeli vjúrøt kùng taq Pope Leo XIV taqekèní vsvngrì kaq shv̀nshér pvlàcè kaq vjúrøt dvzaqshì lv́m dvkv́m ráà we íe. Shv̀shér pvlàcè Gvray nø kámnøt tvrà bángkà svng tánā we ínø̀ kámnøt svng gø shvdøng shvngángā shú gø íe wervt àngyv́ng kèní gø vjúrøt dvzaqshì lv́m wàì wanø Pope Leo XIV taqkèni shvdǿm mòngkà kèní dvkv́m bǿà we íe.
