RVA Rvwang Day Wáshì We
RVA Rvwang Day svng (18 May 2026)ni, Putao Myoqnē Lung Sha Yang Jau Gwørwang St.Joseph Noqngøm tøngnu taq vsháng ( 9:30-11:30 am ) rvtø taq Shvrúngshú pè Fr. Marko Kyi Moe nvng Fr. Peter Zang Yaw Ah Pong ní í Missa Kàgvp nóng nø Gvray kaq oqā wà Jèjú shvgùn we bóy svng wáshì bø’ì.
RVA Rvwang Day vshvtnøng (8)nøng nønggøm vhø’m Gvray kaq oqā wa bóy taq Lung Sha Yang Jau Gwørwang øp Fr. Marko Kyi Moe taqkèní Cúnshì we Gvray gvsang móngkà svng dvtit tvle dvshvng nø, RVA Rvwang Day wáshì àng mvtú mvnggá svng gø shø’n bø’à. Dèni RVA Day Gvray kaq jèjú shvgùn we bóy taq vkvtdø lúm
lúnò rvt gø gvzà dvbùngè wā shvkse wáshì taqsórí nònggùn zí Kà shøn bø’ì. Vrá nø, RVA Rvwang Shvngkà dvshvng dvp nø (2018)nøng taqkèní pvngshì lúngì nø (8)nøng nønggøm we angni gø íe, wā shø’n bø’à. RVA Rvwang bø’nbung lúngì tvrà mvshøl, mvnggá gø vlē. Wè lòng nø pa i mà?. Gvray gvsangò rvzvngcerì í Døngman we cúnshì we Gvray gvsang móngkà svng tashì lúnlvm, dvshér lúnlvm, Pvlàcè kvmnønt nònggùn kūnga lùshì lúnlvm, vrám vrá mongzøl lòng lúnlvm dvpvt íē. Yalòng RVA Rvwang tvyø svng ( 2018 )nøng Vyvng Roqshú pè Svrado Francis Daw Tang í dvtú we vdòng, Fr.John Hpung Shang Awng Htoi nvng Svra pè/me la dvzaq dvkvngshì yv’ngkèní dèni dèyaq høqshaq Dinggvng lúngì we tvrà íē wā gø shø’n bø’ì.
Vrá nø, Shvrúngshú pè Fr.Peter Zang Yaw Ah Pong taqkèní gø RVA wàwe àng lvjøm nø, Radio Veritas Asia, Dìngman we Gvray Dvbùshang móngkà svng dvshvngshì we àng lvjøm ínø, vdè pvn Tong laqya, Kàrurì svng vpøshì taqsórí Kvmnønt tvrà taq téwa vháng vlúnlvm rvt shvngømré kèní nònggùn zì we tvrà íe, wā shø’nè. Mvdøng nø, Gvray gvsangò rvzvngcerì í Døngman we Gvray gvsang móngkà svng tashì lúnlvm, dvshér lúnlvm, Pvlàcè kvmnønt nònggùn kūnga lùshì lvm nvng vrám vrá mongzøl lúnlvm dvpvt íē.
RVA Rvwang Day angni taq goshì dø tiqdvchá Lung Sha Yang wama taq vl shvngømré v-rvm yv’ngkèní Mongkà Svra rì, Nønt tøng shaqré, rvzvngcerì Svmaré, lvngaré shvngbe (180) gø’ dv’ngte lúm bø’ì lòng svng yv’nglúnshìe. RVA Rvwang Shvngkà tvyø svng tashì lún yv’ngkèní lúnshì we vjú jèjú rì svng Svra pè. John Hpung Shang Min Bai nvng Vshaq me HKang Naw Awn Tawng taqkèní gø shvkse wáshì bø’ì. Wè ni taq Lúm ra i rì shvngbe dvpvt Gønpaq ku Phone, Bela, RVA dvzik Gam jvm we bvnlì tvyø svng gø wáshì bø’ì.
Wènio lvmvng tvyø taq, Tvyø svng Svra me. Roi Ba taqkèní shøl shì nø rvtø tvle vjú svng Svra pè Francis Seng Awng, Vtō Mongkà svng Sister Nang San, Rvwang Dvcirìo móng nvng Rvwang Dvci lv’m dvtán we Lungsha Yang zilangré mvdò, RVA mvshøl svng Fr Peter Zang Yaw Ah Pong, Shvngkà tashì rì yv’ngkèní shvkse wáshì tvyø rì, Gam jvm we tvyø rì nvng lvngdøm taq Svra David Da.Chvng Ah Pong kèní vjúrøt dvtøm nø Shvrúngshú Fr. Peter Ah Pong nvng Fr. Marko Kyi Moe ní í Shvmv’n dvgø’ng Kà zi nø mongzøl dø wáshì bø’ì.
