Kamóng mamóng taq evlnøng we pèmè vnvmchvngmaq shvngbe svng Pamvra!
Dènio Gvray dvbùshang Mongkà Yohan 15:9-17 ciq vdòng taqkèní íē. Mongkà svng Dvdvm vjáng lvm mvmè vl we íni gø, Vkangpè Yesu Kristu ínø Angò dvkv’m Kà, Dvrá móngkà svng cvndvgømò gø’ svng nø rvmnvng, vnvm pè wā vlvm íe wàkà svng dvdvm vjang lvm wàì.
Shóngshø’ng we pèmè vnvmchvngmaq, Vshuq walòng yv’ngkèní lvmboq, Dvzvr pè la wàwe angnvm angchvng tøòe. Vkangpè Yesu Kristu nvng lvmboqrì dvhø taqø téwa shóngnøntní v-toq v-tip vzøm vzap lúnò pàdø, tiqnøng tiqmvyung wáshì lúnò we í dvbùshang móngkà, Sasvna bvnlì svng wálún lú:ngà. Yalòng nø, Svre lòng mvdvm, v-toq v-tip vzøm vzap yv’ngkèní Gvray gvsangò dvnúng mvnggá tvyø taqø dvshvng lúnlvm Vkangpè Yesuí nø vnvm pè la wā shøn lòng íe. Gvray gvsangí nø nøngmaq gø’ vrvm kaq svng gø, angnvm angchvng dø, jinghku ku shóngshìe, ègō íe, walòng íe. Lvpat taq Gvray gvsangí shvngøt dvtú we dvkv’m Kà rì svng nøngmaqí cvndvgømì dvgvp, Svmi móngdàn kaq svng dì v-du daq mà? mø-í ni Svre i rvt, mø-í ni Mvra dam zí lvm lòng svng svre ì rvt wàwe Nønt mvsøn í mø-í dø, Gvray gvsang kaq shóngshàì rvt, shvngøt dvtú dvkv’m Kà rì shvngbe nø Dìngman rvt íē.
Wervt vpø’ íwe pèmè vnvmchvngmaq, Gvray gvsangò Shóngnønt, Gvray gvsangí vpø’ vtv’ng dø recvng bø’shà lòng svng vpø’ shvringì taqsórí angdè nvng nítvp we Tiqdvng vsvngrì mvdvmø Gvray gvsangò mvré zā mvkok dvdí shóngnønt svng gvlshì nø Cúnshì laqlúnì shvngbe svng oqā.
(Yohan 15;9-17) Yesu nø bìmrøng mvdø̀ng í we
Vpèí Ngà svng èshòng dø, Ngàí gø namaq svng shù:ngìe. Ngà shóngnøt vdòng taq namaq v́ldv̀ng èwànø̀ng. 10 Vpè dvkv́mkà Ngàí cv̀nò nø, Ang shóngnøt vdòng taq v̄l dø tiqdvchá, namaq gø Ngà dvkv́mkà cv́n èdøngnøng kvt nø, Ngà shóngnøt vdòng taq v́ldv̀ng èwà lóngnønge. g 11 Ngà dvbù nøt namaq vdòng taq vl yv́ng kèní namaq dvbùnøt dv̀n zø̀nglv́m dvpvt, Ngàí namaq svng yadv́ng pv̀n dvtá bǿshà we íe.
Ngàí namaq svng shù:ngì dø, namaq tiq gǿ nø tiq gǿ vshòngké ràe, wvng we yakà nø Ngà dvkv́mkà íe. i 13 Vsvng tiq gǿ nø ang shóngshì rv̀mnvng dvpvt ang gø̀nshaq dvbǿmshì we yalòng mvdv̀m té ring we shóngnøt nø kagǿ gø̄ màvl. j 14 Ngàí dvká:mì dv́ngte namaq cv́n èdøngnøng kvtnø, namaq nø Ngà rv̀mnvngrì èínønge. k 15 Akvt kèní kukaq Ngàí namaq svng vshuq màa:lì. Kadø íe wani vshuqí nø angkà:ngí kapà wàò we mvsháò. Namaq svng nø Ngàí rv̀mnvng, a:lìe. Kadø íe wani Vpè yv́ng kèní Ngàí tángò rì shvngbe, Ngàí namaq svng shá dvzv́r bǿshà. 16 Namaqí Ngà svng rècv̀ngshà we mø̀í, Ngàí mv̀ng namaq svng rvcv̀ng bǿshà. Namaq èdìnøng nø mvtìn mvbøp we angshí zílv́m dvpvt Ngàí namaq svng rvcv̀ng bǿshà we íe. Wekvt namaqí Ngà bø̀ng kèní Vpè svng kapà èrøtnø̀ng nìgø A:ngí namaq svng èzí daqnø̀nge. l 17 Namaq tiq gǿ nø tiq gǿ vshòngké ràe. Yalòng nø Ngà dvkv́mkà íe.
