Shvngbe mvdvm Vkangpè Yesu Kristuò Mvkok dvdí shóngnønt svng vtoshì laqlúnì. Shvngbe svng Pmr.
Dènio Gvray Dvbùshang móngkà taq, Vkangpè Yesuí nø Angò Vpø’ we shóngnønt Dvrá taqkèní shvbóng shvmvtshì lúnlvm rvt shèdømìe.
Vpø’ íwe pèmè vnvmchvngmaq, Dèni rø v-du we Yohan 15:12-17 vdòng taq, Tiqdvng vsvng dvpvt gønshaq vpnóngshì høqshaq tvleshì we vpø’ nø ring we shóngnønt nø mà-vl, wàwe Kristuò shvngøt dvtú Kà svng Dvdvm vjángì, Dvdvm vjang dvzvrè. Shóngnønt svng vsvngrì í nø angdèo vjang laqyàrì taqkèní dvtánòe. Vrá nø, Angpè angmèmaq, angní angnvm dvhø, rvmja dvhø, Døngman we rvmja rì dvhø yv’ng angdèo gønshaq svng vpnóngshì lvm, angdèo lvpat svng mà mvpáshì vsvngrì vlē. Shóngnønt dvnzøng vsvngrì vlē. Wè vdòng taq angcø angcèrì mvdvmø gvlshì we angpè angmèmaqo shóngnønt nø, vløm ra mvnggá mà bá we, angcø angcèrì vháng vlún lòng svng yangò sórí Nøntshøm dvbù we shóngnønt, Vpø’ nø ring we mvkok dvdí shóngnønt lòng íe.
Dènio dvbùshang Mongkà taq Vkangpè Yesuí nø Tiqdvng vsvng nvng vzøm vzap we mà-vl nigø, vsvng shvdaq tiqgø’ mvdvm tiqgø’ tāsvng tālè Vpø’ ke nø shóngnønt gvlshì lúnlvm rvt shvngøt dvtú nø shvdømè, dvkv’mè. Vkangpè Yesu nø Ang tiqgóng shvngbe gønshaq vpnóngshì tvleshì høqshaq vsvngrì mvdvmø shóngnønt vlē. Gvray gvsangí nø Bø’n mvdaq lòng svng wá dvzvr we mø-í. Gvray gvsangí nø nøngmaq svng shø’n mvtø’mshì høqshaq shóngshìe, wàwe Vkangpèo shóngnønt svng dèdvm lú:ngò dvgvp, Tiqdvng vsvng kaq svng shø’m we, shvngōshì we mø-í dø, Sher we Nønt mvsøn vjang laqyà shóngnønt taqkèní tiqgóng shvngbe vpnóng tvleshì nø shóngshì lúnlvm, shvkse wáshì lúnlvm vlē.
Wervt shóngshø’ng we pèmè vnvmchvngmaq Dènio Gvray dvbùshang Mongkà taq, Vkangpè Yesuí nø Nøngmaq kaq svng vpø’ nø ring we Angò Mvkok dvdí shóngnønt taqkèní shvbóng shvmvtshì lúnlvm rvt cvnà nø shvngøt dètú íe. Vkangpèo Sher we shóngnønt taqkèní shvbóng shvmvtshì nø Nønt mvsøn vjang laqyàrì dvzøp vdv’ngshì nø Cúnshì laqlúnì, shvkse wáshì laqlúni, shvngbe oqā.
