Kristu vdòng Vpø’ íwe pèmè vnvmchvngmaq, dèsháng Pvlàcè nònggùn lùshì lvm Gvray móngkà nø Yohan 15:9-11 vdòng taqkèní íē. Mongkà taq;-
Vpèí Ngà svng èshòng dø, Ngàí gø namaq svng shù:ngìe. Ngà shóngnøt vdòng taq namaq v́ldv̀ng èwànø̀ng. Vpè dvkv́mkà Ngàí cv̀nò nø, Ang shóngnøt vdòng taq v̄l dø tiqdvchá, namaq gø Ngà dvkv́mkà cv́n èdøngnøng kvt nø, Ngà shóngnøt vdòng taq v́ldv̀ng èwà lóngnønge. Ngà dvbù nøt namaq vdòng taq vl yv́ng kèní namaq dvbùnøt dv̀n zø̀nglv́m dvpvt, Ngàí namaq svng yadv́ng pv̀n dvtá bǿshà we íe,.. wàe.
Kristu vdòng taq Vpø’ íwe pèmè vnvmchvngmaq, Vpè Gvray gvsang ínø Vkangpè Yesu Kristu kaq svng shóngò pàdø, Vkangpè Yesu Kristu ígø Angò lvmboqrì svng shù:ngìe, wā shø’n yangì. Shóngnøntní nø Dvzvrìo Nønt mvsøn bvngka rì svng tánào nø Kristu nvng nitvp dvzvrè. Vkangpè Yesu Kristu nvng tiqdø vl dvzvrè. Angpè angmèmaq svng jø’ngjøngni shóngshì we angcø angcèrì nø angpè angmèmaq shvngøt Kà svng tāshìe. Vsvng tiqgø’ kaq èshóngshì dvgvp àng Kà svng vpø’ nø ta íe. Nønt dvshà dø, Nønt mvbyō dø mvwàì.
Wè pàdø Gvray gvsang kaq svng nøngmaq jø’ngjøngni shóngshàì nìnø, Gvray gvsangò shvngøt dvtú dvkv’m Kà svng nøngmaqí cvndvgøm nø vpø’ shvring v-dùe. Ya zv’ngø nøngmaq nø Gvray gvsangò Shóngnønt vdòng taq v-lì nìnø, Mongzøl lòng svng vtoshì lúnlvm vlē. Gvray nvng Mvra walòng nø tiqdø mà-vl walòng svng nøngmaqí síngràl lúnlvm vchvkngè. Wervt Mvra í Mvra vdòng svng shøl we Tvrà rì svng nøngmaq taqkèní vyáshì taqsórí tiqni nø tiqni Gvray vdòng taq vnvp dø cúnshì nø cvndvgøm lúnlvm rvt dvzaq dvkvngshì laqlúnì wvng dvshat nø nònggùn zí mvyø’è. Gvray gvsang shúngwámshì we rvzvngcerì wáshì laqlúni shvngbe svng oqā.
