Shvngbe mvdvm Gvray mongzøl lòng laqtuqdaq! Shvngbe svng Pamvra.
Dèni nònggùn lùshì lvm móngkà nø, Yohan 3:31-36 vdòng taqkèní íē.
Kristu vdòng taq Shóngshø’ng we pèmè vnvmchvngmaq,..Dèni rø v-du we Gvray móngkà tiqciq taq, Tùng vdòng yv’ngø lvmik gømlā dvtánò nø lutshì bø’ì mèpvng Noqngøm tøngnu yv’ngø dvshvngò we Dvzvr pè la nø tiqkvt vrá tvp vhø’m bø’à nø, Sanhedarin wā tø’ò mvdò, (71) gø’ vbá we Dvrá Vji rúng kaq tiqkvt tvle nø zv’ng bø’à. Dvzvr pè la ínø vgámò we Vkangpè Yesu Kristuò bøng taqkèní dvbùshang móngkà svng zv’ndvtut dvshvngò we nvng Vkangpè Yesu shì bø’ì lòng svng Yuda shaqré shølshú vgo rì í Mvra shvrìo tvrà, mvdøng Mvra zíò lòng rvt íe. ( Vkangpè Yesu nvng Dvzvr rì gø Yuda vsvngrì íe.) Vkangpè Yesu Kristu shvt vhø’mò rvtø taq svre we Dvzvr pè la nø, Shànshér Pvlàcè jór nònggùn taqkèní kūnga dvnzøng lúngì nø svre lòng vmv’ng á:mì, vzaqshì Nøntní Dìngman Dvrá svng nònggùn kūnga dvnzøng taqsórí dvshvngòe. Yohan í shø’nò we taq “Dìnglòng svng namaqí èshá lúngnø’ng nø, dìng lù:ngí namaq svng shèlutnvtnønge,” wàe.(8:32) Wè Dìng lòng rvt Dvzvrì shvnip shvnar we, vtu vre we vhø’mò rì pàti mvlv’nò nø “Nøngmaq nø vsvng kà tā mvdv̀mø, Gvray kà té tá ràe.”(Dvzvr 5:29) Gvray gvsang wā Dìng lòng ínø, Gvray gvsang kaq wā Kv’m nø Shvkse wáshì lvm íe, wā vtoshì lòng íe.
Shànshér pe Thomas Pú ínø ” Koqkvm Du gamzø nø dvzømshú dvzvr shvlá tiqgø’ íe, Íni gø Gvray gvsang nø Nvmlat tiq ” íe wā shø’n rvt Henry Koqkvm kaq vtu Kà shøn rvt shvt vhø’m yangà. Àng dvpvt Gvray gvsang taqkèní dvgá dø rvzvngshì lvm mà-vl pàdø, lvpat mvshøl yv’nggúng taqø Shànshér vsvngrì gø mvme yv’nglúnshìe. Dènila lvpat taqgø Kv’m vsvng rvzvngcerì nvng dìng lòng dvpvt shvkse wáshì, dvgøqshì shvra rì yv’ngø vtu vre dvki lòng svng vhø’mòe. Àngmaqò Nønt mvsøn nø Jø’ngjøngni shangshang wace íe. Dvzvr Piter nvng dvzvrì nø Gvray gvsang kaq svng wā Kv’m nø vlømshì rì íē. Nøngmaq gø dvzvrì, Shànshér vsvngrì pàdø Gvray gvsang kaq svng wā Nvmlat tiq taq gvl nø, døngman lòng dvpvt Kvmnøntní Vsvng mvmè vjú lúnlvm rvt tiqlvpat svng Døngman dø rvzvngshì nø cúnshì lúnlvm rvt Gvray gvsangí go lòng svng vtoshì lún bø’shà.
Wervt vpø’ íwe pèmè vnvmchvngmaq, Vkangpè Døngman lòng taq Kvmnøntní sher dø Cúnshì nø Shagóng Pvlàcè nònggùn kūnga lùshì nø Shvkse wáshì laqlúni, Gvray dvgùng shvring shvta laqlúnì wvng dvshat nø nònggùn zí mvyø’è.
Rø v-du we móngkà
(Yohan 3:31-36)… Mvdv̀m kèní dì daqì pè Ang nø, shvngbe mvdv̀mø ringe. Rvgaq kèní í pè ang nø, rvgaqò pv̀n í nø, rvgaq dang wa shø̀ne. Muqlàng kèní dì daqì pè Ang mv̀ng nø, vsvng shvngbe mvdv̀mø ringe. x 32 A:ngí vyv́ngshaq vtáshaq rì shø̀:nò nìgø, A:ngí shø̀:nò kà svng kagǿí gø màtōò. y 33 Iwe A:ngí shø̀:nò kà svng vtoò gǿí nø, Gvray nø dìnge, wa lòng svng shálv́m zangkwè gā:pmò we íe. 34 Gvrayí dvzv́r daqà pè svng nø Shànshér Pvlàcè dv̀n vlim dø vzíshaq í rvt A:ngí nø Gvray kàrì shø̀:nòe. z 35 Angpèí nø Angcè pè svng shù:ngò rvtnø, vl dv́ngte nø Ang wur taq vzíshaq íe. a 36 Angcè pè svng kv́m gǿ nø dvciq lvpat gø̀nshaq lúne; Angcè pè svng mvkv́m gǿí mv̀ng nø, gø̀nshaq yv́ng mvlú:nò. Gvray shv̀mná høpnøt nø ang mvdv̀mø vhap dv̀ng wae,” a:lòe.
Mongkà ètashìnøng we Shvngbeí Gvray mongzøl lòng vtoshì leqlúnøng! Amen.
