Farisi mvdòí Yesu shvtlv́m vrāshì we
Mongkà ciq vdòng taqkèní dvdvm vjáng nø nònggùn zí mvyø’ we taq;-
Vkangpè Yesuò Jór nònggùn kūnga vzàm vming vkvng taqkèní dvshvngò we móngkà, dvshá zā weí dvbanò we lvmik gømlā rì, Dvrá Svra shølshú vgo rì kaq svng shø’n vzaqshì we tvrà rì, Svri bang rì kaq svng Shv-am shv-aq we mvbø’n rì, Hí wur dv-ciq rì kaq svng vrá dvzø’m dvbanò we lvmik gømlā rì,.. Yarì taqkèní Vkangpè Yesu nø bøng té lúngì we mvdvm, Lazaru svng vrá Shì yv’ngkèní dvzún bø’à rvt Tiqdvtang vrá bøng shàng lúngì, Vsvng mvmè nø Vkangpè Yesu mèpvng cvn we dvzvrì wáshì lúngì lòng svng yvngò we Farisirì nvng Shvrúngshú vji rì nø mvwámshì, Vkangpè Yesu svng shvtlvm rvt gvsvt vjø’nòe.
Vrá nø, Vkangpè Yesuí wàò we bvnlìrì shvngbe nø Gvray gvsang yv’ngkèní dìdaq ì we Talen rì wā íe. Gvray gvsang yv’ngkèní wā mø-í ni, dvgá dø kagø’ ígø wá mvlúnò lòng svng sháò we nigø, Satan ínø Vkangpè Yesu svng dvdvm mvrø’nshì høq vløtnòe. Shø’mì lòng, mvwámshì lòng, shvngōshì lòng yarì nø Satanò lvknvk rì í āòe. Dènila nøngmaq lvpat taq gø mvgvm màshvla Nønt mvsøn vjang laqyàrì zvndvtut vl v-du we taq, Satan pèo nònggùn kūnga zaq lòng vl vdu nigø, Vkangpè Yesu Kristu kaq Kv’m nø, Àng bøng vdòng taq Kvmnøntní dvgø’shì gø’ kaq svng nø kadvgvp gø Sataní tvløt we taq krvtzø’m lvm mø-í walòng svng Yesu Kristu Shì yv’ngkèní vrá Zuná:mì lòng taq yv’nglúnshìe.
Wervt Vpø’ íwe pèmè vnvmchvngmaq, Chutchvng angkang pè Yesu Kristu taqkèní Pvlàcè kvmnønt nònggùn kūnga lùshì nø , Kristu nvng tiqdø Cúnshì lúnlvm vjúrøt tvleshì we í dvzaq dvkvngshì nònggùn kūnga lùshì laqlúnì, wvng dvshat nø nònggùn zí mvyø’è.
Yohan 11:45-56..
45 Wekvt, Mari yv́ng svng di ráì we Yuda vsvng rì mvme nø Yesuí wa bǿà lòng yà:ngò nø Yesu svng kv́m bǿì. u 46 Inìgø angmaq taqkèní tiqmaq nø Farisirì yv́ng dìá:mì nø, Yesuí wà bǿà rì angmaq svng dvtáòe.
Farisi mvdòí Yesu shvtlv́m vrāshì we
Wekvt shvrúngshú vjìrì nvng Farisirìí Shaqré lìpòngmè dvkø̀:mò nø yadø wae. “Kadø wàlv́m í ráì? Kadø íe wani vsvng yapèí nø shálv́m mvshv́lpvrá mvme wàòe. Ang svng nøngmaqí yadøni shvlángdv̀ng wàì kvt nø, vsvng shvngbe Ang svng kv́mv̄me. Wekvt Roma vsvng rì di daq nø, Nøngmaq Shanshér Tø̀ngnø nvng dvcì gø, ètølvm bǿìe,” wae. Angmaq taqkèní wenǿng taq shvrúngshú vgo wáshì pè Kayafasí angmaq svng, “Namaqí pàgø mèshánøng. Nøngmaq dvcì køp màmv́nglv́m dvpvt, bashà rì tvle vsvng tiq gǿ shì lòng nø namaq dvpvt té shvla we svng mèdaknø̀ng ma?” a:lòe.
Ang yadø shø̀n lòng nø, ang nø:tní shø̀n we mø̀í; ang nø wenǿng taq shvrúngshú vgo wáshì rvtnø, Yuda vsvng rì tvle Yesu shìlv́m í we à:ngí kàdvtu:tnò we íe. Iwe tiq dvcì dvpvt wa mvtaq, kayv́ng màyv́ng vshin we Gvray angcèrì svng tiqpóng dvkø̀m lúnlv́m dvpvt gø Ang shí vdu we íe. Wervtnø̀ weni kèní angmaqí nø, Ang svng shvtlv́m gvcvt vjøn ma:nòe.Wervtnø̀ Yesu nø weni kèní kukaq Yuda vsvng rì dvhø̀ø neyv́ng negv̀m nø màgwanshìá:mì. Weyv́ng kèní Ang búngá:mì nø rvgaq mvgung, Efraim tǿò mvrìng yv́ngø, Ang coqcv́nrì nvng v́ldv̀ng wae.
Yuda vsvng rì Shvle bóy tuq yùl ráì dvgvp, vsvng mvme nø angmaq góng dvshàn dvshérshìlv́m dvpvt, Shvle bóy mvwàò vzv̀ng, vtv́r rvwá rvgaq kèní Yerusalem svng ngangá:mì.6 Angmaqí Yesu svng láò nø, Noqngø̀m Tø̀ngnø taq rip sórí tiq gǿ nø tiq gǿ vrùng nø, “Kadø dèdvmnøng ma? Ang nø yabóy svng bvttut mvdìlv́m dø í ma?” wae. Mongkà ètashìnøng we Shvngbeí Gvray mongzøl lòng vtoshì leqlúnøng,Shvngbe svng Pamvra.
