Kámnøt tvrà svng vsvngrì kaq gònglvm dvdut we nø shvngømré kèní møí Yesu Kristu mvng íe wanø Pope Leo XIV taqkèní dvkám we

January 7-8 2026 ni taq wáshì bøì we Extraordinary Consistory of Cardinals lìpùng taq Pope Leo XIV taqkèní dvkám mòngkà vrìng bøà we íe.

We lìpùngmè taq Pope Leo XIV nø kømngøm ráì we Cardinals rì svng dvtú we mòngkà taq Gvrayí nøngmaq dìlvm tvrà svng èshøl daqì e. Nøngmaq nø rvcángcèrì vløm rà nvng àngmaqò dvzvr shvlá wáshì lvm bvnlì døngjá vlì we íe.

College of Cardinals rì wawe nø svngpvn dvcì rìò màbóng we vtóng laqyà rì, paqzí paqrvt dang, wulaq tvrà rì àngdang dang kèní mvkørm mvdøp vshøp we mvdò tiqlòng ínø Gvray dvbùshvng tvrà taq gønshaq vzíshì shaq rì íe.

Nøngmaq shvngbe nø shvngømré rvcángcèrì kaq kupgvr lvm bvnlì tvrà dvpvt nøngmaq tiqgø nvng tiqgø gø vzø:mìwe ròrá shaq kèní Collegiality wawe mvtú svng dìlvm vchvk we íe.

We lìpùngmè taq Svrabín koqkvm pè taqkèní vzvng kaq wáshì bøì we Vatican Council lìpùngmè nvng singwe tvrà rì, Svrado rìò lvpat mvshøl rì svng vchvngò nø bvnlì tvrà rì kaq dvtú bøà we íe. Ìshøt jèjú wawe nø Christ ínø dvsháza shóngnøt nø Agabe íe wawe tvrà svng shvng shvng wa dvtú bøà we íe.

Evangelii Gaudium sasvna tvrà nø Synod nvng vzøm nø Gvray dvbùshvng bvnlì wárà we svng shvdøm nø Holy see kèní dvtú we Liturgy tvrà rì kèní noqngøm lvm, kadvgvp gø dvtøp shvnvp ràwe dang shvdøm bøà we íe.

Cardinal rì nø Curia kèní nøng vrvm dvtú we Dvbùshvng bvnlì tvrà ku diwe íe má walòng svng gø kadvgvp gø dvtøp shì ràwe dangrì dvtú bøà we íe.

Cardinal rìò bvnlì døngjá wawe nø rvcángcèrì tiqgø vrvmí síng shá lúnwe zìdang kèní shøn vtàn nø tvrà tóngā we nvng dvzvr Peter ò bvnlì tvrà íyvngì we Petrine ministry svng dvgøm lvm íe wanø dvkám we íe.

Døngmvn we ànvm àngchvngrì nøt mvsøn kèní tiqnøt tiq mvyùng wáshì nø bvnlì wawe tvrà nø vzvng kaq lvpat tvrà nvng tuqrawe vbat rvtø rì dvpvt dvtut shvnvpā we tvrà ílonge wanø Pope Leo XIV taqkèní dvkám mòngkà dvtú bøà we íe.