“Dvgø’shì lvngcha àng lvjøm dvtán we”
(First Sunday of Advent year A) -2025
Cúnshì we Gvray gvsang móngkà svng etashinøng we, vnvm vchvng rì Shvngbe mvdvm Gvray mongzøl lòng laqtuqdaq!
Kristu vdòng taq Vpø’ íwe pèmè vnvm vchvngmaq e, yalvban kèní nø Noqngøm rvtø nøng àngshvr (A)nøng, Adventu kaq svng gòng bø’shà we íe.
Mongkà ciqrì:-
(1)Esaya 2: 1-5…. Kàdvtutshú Esaya Mongkà taq, Mongzøl dø Vkangpè ínø Dvci vrvm kaq svng gō nø gálòng vdòng taq dvnúng lvm shingrvn yvngò nø Kà dvtut yangà dang yv’nglúnshìe.
(2)Roms 13 :11-14…. Roma shvngømré rvzvngcerì kaq svng shvrìo we móngkà taq, Dvzvr Polo í nø, chutchvng lòng nø tuq lúngì, Pan vshat dègø’shìnøng,
Pàwálv́m wani nøngmaq chutchv́ng lúnlv́m lòng nø, nøngmaq kv́m yv̀ngshà rvtø̀ mvdv̀mø akvt téwa níshì ráì, wā shø’n nø dvkv’mè.
(3)Mahte 24 : 37-44… Vkangpè Yesuí nø Angò dvzvrì kaq svng shø’nè; Rvtø angni rì svng mvsháshì rvt, wè Vkangpèo angni dvpvt tvlu dvgø’shìnøng, wā shø’n nø dvkv’mè.
Vpø’ íwe pèmè vnvm vchvngmaq, yalvban kèní nø Noqngøm rvtø Nøng àngshvr (A)nøng, Adventu dvgø’shì we rvtø lvngcha kaq svng gòng bø’shà we íe. Wè dø tiqdvchá dvgø’shì dvzvr dang nvng singdø dvtán mvyø’è.
Dvgø’shì Rvtø, lvngcha ( Yalòng dvgø’shì rvtø taq nø mvdøng nø Krismat Angni kaq svng Mongzøl dø Nønt mvsøn tiqgóng àngshvr wáshì nø góng lúnlvm dvpvt dvcøp vdv’ngshì dvzvr dang íe)
Yalvban kèní nø, (Adventu) wàwe dvgø’shì dvzvr we Rvtø lvngcha svng gòng bø’shà.
Wervt nø, dvgø’shì dvzvr we àng lvjøm rì svng angdùngce shá dvzvr mvyø’è. ‘Du Sa Ladaw’ wàwe nø vpoq Kà ínø, English Kà ínø “Season of Advent” àng lvjøm íe. Advent nø Latin Kà ru ‘adventus’ Kàru yv’ngkèní lúnshì lòng íe. Lvjøm nø Tuqdaq ì (coming/ arrival) wàwe íe. Wervt nø vpoq Kà taqkèní gø Advent wànø lv’ngshì lòng íe. Vkvt nø anglvjøm svng téwa síngràl lúnlvm dvpvt, ‘Du Sa Ladaw’ Rvwang Kà taqkèní nø ‘Dvgø’shì’ rvtø lvngcha wā vrùshì shø’nshì lòng íe.
Vpø’ íwe pèmè vnvmchvngmaq,
“Dvgø’shì Nár rì”
Yalòng dvgø’shì rvtø lvngcha Nár rì taq, Nár (4) vbí lòng vlē. Wè yv’ngkèní yà lvban nø Nvmlat Nár lvban gø íe.
Vrá nø, Yalòng dvgø’shì rvtø lvngcha taq (2) wál wànø vwálshaq íe. December (16)ni høq nø Nvmlat tiq wál ínø, December (17)ni kèní December (23) ni høq nø v-ní wál wā vwálshaq íe.
Nvmlat tiq (1) wál taq nø, Vkangpè Yesu Kristu jór pòngbang í vrá tiqkvt tuqlvm lòng svng Nønt mvsøn vdòng taqkèní vlømshì sórí Nønt mvsøn vjang laqyà Pvlàcè svng Pan vshat dvgø’shì dvzvrè, dvgø’shì dvzvr dang íe.
V-ní (2) wál wàwál taq nø, Svngzāce shvléshì nø Nina kok taq gvl bø’à we Chvngkang pè Yesu Kristu svng dvbù Nøntní, Kvmnøntní vtoshì lúnlvm dvpvt dvgø’shì dvzvr we tvrà íē.
“Dvgø’shì lvngcha àng lvjøm dvtán we”
Yalòng dvgø’shì lvngchaò àng lvjøm gømlā svng vjáng nø dvtánà lòng nø, Dvgø’shì lvngchaò ‘Nvmpu shingwvt hang’ ( Advent Wreath) wā tøshìe.
Mongkà rì nø;–
_ Vlømshìe (Hope),
_ Shóngshìe (Love),
_ Dvbù e (Joy) nvng
_ Mongzøle (Peace) yarì íe.
Mvshøl angdùng svng dvtan mvyø’ we taq;-
4 Yá-mvzøq (4th century) dvgvp kèní Adventu nvng singdø Kàru taqkèní vrù yangà lega gømlā rì svng yv’nglúnshìe. Téwa nø dènila rvtø, Spain móngdàn nvng Gaul wà gø tø yangà France móngdàn taq yv’nglúnshì we kàrù taqkèní dvtánòe. Yalòng taqkèní vzàng kaq vlé dø mvshøl svng dvtán lúnlvm rvzaqè. AD. 380 nøng dvgvp wà yangà we Lìpong me (the Council of Sargossa) taq Adventu nvng singdø wa yangà we vtóng svng yv’nglúnshìe.
Vkangpè Yesuò Mongkà
Vkangpè Yesu shø’n lòng svng angdùngce ku èshøn lúngò dvgvp;-
_ Pan vshat wáshì nø dvgø’shìe
(watchful waiting),
_ Ra vchvk dang rì svng tvlu dvgø’shìe (preparation),
_ Dvrá Døngman dø cvndvgøm lvm (justice).. yarì íe.
Vpø’ íwe pèmè vnvmchvngmaq, Chvngkang pè Yesu Kristu kaq svng dvbù we Kvmnønt kèní vtoshì lúnlvm dvpvt, Nøngmaqò Nønt mvsøn bvngka rì svng pòqshi taqsórí cā nø dvgø’shì ràe , Nønt mvsøn àngshvr wáshì nø Mongzøl we HKrismat kaq svng góng lúnlvm dvcøp vdv’ngshì dvgø’shì laqlúnì. Vkangpè àng shvrúng dø tiqdvchá cúnshì nø dvgø’shì lúnlvm dvzaq shàì, tvleshì laqlúnì.
(Mt 24:44)” Wervt namaq nø tvlú dègǿshì dánøng. Pàwálv́m wani namaqí di daqe mèlv́nnøng rvtø̀ taq, Vsvng Angcè pè nø di daqe.” Mongkà etashi nøng we gø’ vrvmì Gvray Mongzøl lòng vtoshì leqlúnøng.
