Nøngmaq rvcángcèrì nø shvla we dang rìsvng wàlvm shvngòshì mvdaq

Nøngmaq rvcángcèrì nø shvla we bvnlì wàlvm shvngòshì mvdaq wàlvm Svrabín koqkámpè Leo XIV í, Vatican Jubilee bóy taq tuqráì we vsvngrì svng dvshvt bø’à. Vkvt dø dvshvt we taq Gvrayò dvzvrshú íwe doradi day (1897-1980) dang svng shvngøt we íe. Wurlaq bvnlì dang krvtsúm we rvtø vdùng Catholic Worker svng shvdøng mvsat bø’à.

Dvshà vsvngrì, vsérshì nø vlwe vsvngrì nvng bvnlì wáshúrì dvpvt angí wàò bvnlì dang mvshø’l pvrá rìsvng gún dvtøpmò nø Shvringòe. Shvdiq dønglvm nvng tøpnì tøpwa vtvnglvm deni dvbū shvng mòngkà nvng tiqdø dvgá vsvngrì kaq dvbvnglvm nønt rvtshì rae.

Ang nø dvgá vsvngrì kaq vdeí lúnì we jèjú rìsvng mòngkà taqkení shvdúm we shóngnøt rìsvng døngmvn dø shvgaq we vsvng mvdò rìsvng shvgùn shvring lvm dvpvt vdeò lvpat ngàngdøng lvm Gvray kaq vjúrøtlvm dvshvt bø’à.

Doradi dé nø Catholic shvngømré vsvngrì dvpvt vpø’ vtvng we laqyà dvtvnshú íe wanø Svrabín koqkámpè Leo XIV í dvshvt we íe. Kristu svng cvnshàì nø vsvng mvdò nvng móngdan vhánglvm tvrà shøl lvm yvngò dang ang taq paqzí nyàn vle. Dorvdi dé nø we gálong nvng kømzøp we íe wanø Svrabín koqkámpè Leo XIV í shønòe.

Dorvdi dé nø vsvng dvci dvpvt svre dvké we rvcángcè tiqgø’ lvpat sóm dvzvr we wurlaq bvnlì dang taqkení gòl vhømòrì, bvnlì wáshúrì nvng vzøm vzvplvm tvrà lúnòe wanø Svrabín koqkámpè í, shønòe.
Dorvdi dé nø angò nvrøm, nønt, hø’ Wur nvng Sasvna taq kadø dvzaq dvkángshì we svng shvring shvgùn we íe.

Vlø’mshìrà dang nø Kàngpè Yesu nvng tiqdø vzøm vzvp we íe, Kristuò shóngnøt svmi málàm nø nøngmaqò svmi íe wanø Svrabín koqkámpè Leo XIV í, shønòe. Wervt vlø’mshìlvm Jubilee bóy nø nøngmaq nvng shvngømré vdùng taq gø svmi málàm gálúnlvm vjúrøt bø’ì we íe.