Angwa Nár (34) Sunday Homily Kristuí koqkvm bóy

Angwa Nár (34) Sunday Homily(Nov 23),Shvngbe svng pàmvra. Gvray Jèjú kaqsvng nvmlat oqà waì. Ya lvbvn nø angwa nár (34) lvbán wa nár svng gòng bø’shà. Deni nø Kristuí koqkvm bóy gø íe.(1) 2Samuel 5:1-3,(2) koloshi 1:11-20,(3) Luka 23:35-43,

Mòngkà taq vsvng góng dvcøpshì we vsvng angcèpè svng bøng angpvn pvn zíshì we dang yvnglún shìe. Messiah yø̄tìí vdø̄:rò we vhø’mò pè, Kristu chángkàngpè Yesu, Gvray nvng tiqdø vl pè wawe Emmanuel, Dawiq angcèpè, Vsvng angcèpè, Cømsaq mòngzøllvm zíshúpè, Ya we Gvrayò dvzvrshú, vyvng roqshú, Gvrayò vyvngcè wanø bøng angpvn pvn goò tø’shì we svng yvnglún shìe.

Yadø tø’shì we bøng vrvm shvngbe nø Vsvng góng dvchøpshì daqì we Gvrayò angcèpè Yesu Kristu svng dvtvn shvdøngò dang svng yvnglún shìe. Shvngømré taqkení Kàngpè Yesu svng koqkvm mvdvm koqkvm wawe bøng taqkení dvgùng Shvring shìwe íe. Ang lvjøm nø muqlàng dvzvr rì, vsvngrì nvng mán vhømò pvn vrvm shvngbe ò, koqkvm íe. Kristu koqkvmpè bóy svng 1925 nøng Svrabín koqkámpè Pius (10) taqkení shvdøng mvsat yvngà. Svrabín koqkámpè nø we bóy svng wápàngò we dang nø Vdam nvng Ewa ní taqkení Nat zadan í vsvngrì svng Gvray màbánì gø lvpat yvng gùng v’lshvlae wa yùm yvngà. Kàngpè nø vsvngrì nvng Muqlàng rvgaqri nvng kø̀mgøm dø vl we wàmùn wàyárì shvngbe svng øpshúpè íe. Shvngbe svng angò shvwi taqkení chvngò we íe. Vsvngrì nø Kàngpè Yesu svng cvnkvt wa døngmàn Cømsaq mòngzøl ww svng lúnlvm ídaqe. Kàngpè Yesuí øpkáng we tvrà svng vtù vgám nìnø Nat zadan í øpshøl èyùm we svng vhø’mlvm ídaqe. Nøngmaq nø koqkvm nvng Shvrúngshú íwe Kàngpè nvng tiqdø Kristu rvt Gvray kaq svng té tvpníshì lúnìe.

Dawi koqkvm nø Israel vsvngrìò koqkvmpè írvt nø Kristu koqkvmpè ò, gvza vchvk we vní dang svng dvtvne.
(1) Kàngpè Yesu nø nøngmaq dø vsvng tiqgø’ íe. Nøngmaq gø Kàngpè svng Israel vsvngrìí dawi koqkvm svng ālo dø tiq dvchá nøngmaq nø Kàngpèò ang Sha rø nvng ang Sha íshàe (1ya 5:1) ang lvjøm nø Na nø nøngmaq dø tiq dvchá vsvng írvt nøngmaqò døngku tiq rvp vsvng íe.
(2) Kàngpè Yesu nø vsvng dvci dvgøng tiqpvn dvpvt wa koqkvm mví, (12) dvci dvgøngò koqkvmpè íe.

Nøngmaq nø Kristu koqkvmpè svng Shvringì we dang deni Koloshi shvngømré vsvngrì kaqsvng dvzvr Poloí shvriò Lega taq kømgøm kømzøp we svng yvnglún shìe. Kadø íe wani vl we í dv́ngte nø Ang taq kèní mv́n yà:ngà. Muqlàng taqlapmø vl dv́ngte gø, rvgaq tø̀m taq vl dv́ngte gø, yv́ngshì pv̀n, mvyv́ngshi pv̀n gø; koqkv́m kó, øpshú dùrì, vgo zǿmshúrì, vmíng vkv́ng vl we kapv̀n ínìgø, vl dv́ngte nø Ang taq kèní Ang dvpvt ni mv́n yà:ngà we íe (kolo 1:16).

Kristu koqkvmpè í nøngmaq shvngbe svng chutchvng bø’shà rvt nøngmaqò koqkvmpè íe. Gvrayí Angcè pè rvgaq tø̀m svng dvzv́r daqà lòng nø, rvgaq tø̀m svng kàngélv́m dvpvt mø̀í, rvgaq tø̀m nø Ang taq kèní gø̀nshaq shvlut lúnlv́m dvpvt mv̀ng íe (Yohan 3:17). Vrá, Kristu Ang wurgang taq vyǿ bǿì we shvwi kèní mòng dvzø̀:lò dá:ngí, Gvrayí nø Ang taq kèní, rvgaq mvdv̀m taq vl pv̀n ínìgø, muqlàng taqlapmø vl pv̀n ínìgø, vl dv́ngte shvngbe svng Kristu taq kèní Ang nvng shvrv́m shvrálv́m shvrúng we íe (koloshi 1:20). Dø̄lòng jórnònggùn kení, A:ngí nøngmaq svng shèlut daqshà nø, Ang shóngshì we Angcè pè móngdàn vdòng svng dègòng bǿshà. Angcè yapè vdòng taq gø̀nshaq chutchv́ng we nvng mvrà chutna we nøngmaqí lú:nìe (koloshi 1:13-14).
Ngà nø bìmrøng ǿngàe, namaq nø dvgv̀ngrì èínønge. Ngà vdòng taq v̄l nø Ngà gø ang vdòng taq vl we wegǿ mv̀ng nø angshí gvzà zíe. Pàwá wani Ngà taq mècaqshìnø̀ng nìnø namaqí pà gø wá mèlúnnøng (Yohan 15:5).

Wurgang mvdvm kení Yesuí nø koqkvmpè tiqgø’ dø té vtvng we gømpaq zíshà ìe.
Kàngpè Yesuí nø mvrà chutchvngāe. “Vpèá, angmaq mvrà èchutnāò; pàwálv́m wa nìnø angmaqí wàò long svng angmaqí mvsháò,” wae (Luka 23:34).
Kàngpè Yesuí vkø’ tiq pèí røtshì we Muqlvng móngdan svng zíòe. Wekvt Yesuí ang svng, “Ngàí nà svng jø̀ngjǿng v̄lvtnøng, dèni nà nø Ngà nvng tiqdø Paradis yv́ng v̀lv́mshìe,” a:lòe (Luka 23:43).
Kàngpè Yesuí angmèò shóngnøt svng vsvngrì kaq zíshìe. Yesuí angmè nvng Ang shóngshì we coqcv́n pè nø shvnvng yv́ng rip we yv̀ng bǿà kvt, A:ngí angmè svng, “Svmaré mèá, èyà:ngò, nvcèpè,” a:lòe (Yohan 19:26).

Shvmán jèjú ìshøt vrvm nvng gønshaq shvlut we svng zíshú nø Kàngpè Yesu ni íe. “Yesuá, Nà móngdàn ètuqv̄m dvgvp, ngà svng gø dvdv̄m èrǿnàé,” a:lòe. Wekvt Yesuí ang svng, “Ngàí nà svng jø̀ngjǿng v̄lvtnøng, dèni nà nø Ngà nvng tiqdø Paradis yv́ng v̀lv́mshìe,” a:lòe (Luka 23:42-43). Vkø’ vrá tiqpè í ngà svng gø dvdvmā ngà wa røtshì ninø røtshì weó chvng dèni nà nø Ngà nvng tiqdø Paradis yv́ng v̀lv́mshìe,” a:lvm wa íe. Iwe Ang svng shvyǿ:mò sórí, “Nà nø Kristu mèí ma? Nà vdè svng gø nílvngà svng gø shèlutshà lè,” wae.

Bashà rì nø weyv́ng rip sórí dvjaqòe. Øpshú dùrìí gø Ang svng vhø̄ò nø zershì sórí, “Vsvng gø̀nshaq nø A:ngí chv́ngāòe; Gvrayí rvcv́ngshaq pè Kristu nī í kvt kèní nø, Ang nø Ang gø̀nshaq laq shvlutshi,” wae. Iwe ang bashà rì nø ang svng shvngōshì rvtnø ang mèpvngpvng vsvng dvzá:rò nø, ‘Nøngmaq nø yapè svng nøngmaq mvdv̀m koqkv́m wáshìlv́m lòng svng mvshù:ngì,’ wae (Luka 19:14).

Yesu Ang nø,kv́mv́m daq we shvkse wáshì pè, shìrì dvhø̀ kèní nv̀mlat zun lú:ngì pè nvng rvgaq tø̀m koqkv́mri svng øpshú pè íe. Nøngmaq svng èshù:ngì nø, nøngmaq mvrà kèní Ang shvwií ni shèlàng bǿshà nø, nøngmaq svng móngdàn tiq lòng í dèzá:rì nø, Ang Gvray nvng Ang Angpè dvpvt shvrúngshú í dèzv́r bǿshà pè nø, dvgùng gùngshv̀ng nvng øplv́m vmíng vkv́ng dvcìq lvpat laq vl dvr. Amen, (dvtvn 1:5-6).
Nøngmaq nø Kàngpè Yesuí øpwe vdùng cvnìni nø mòngzøl lvm wa íe. Nøngmaq shvngbe nø Kàngpè Yesuò mòngkà svng tashàì dvbulvm nvng mòngzøllvm mòngkà nø dèni nà nø Ngà nvng tiqdø Paradis yv́ng v̀lv́mshìe,” shvngbe í, nøntløm nøntshøm we jèjú ìshøt gømpaq svng vto leqlúnòe. Shvngbe kaqsvng oqà.