Yerusalem dvpvt Yesu nøt dvshà we
Vpø’ íwe vnvmchvngmaq, Dèni tashì lvm, nònggùn lùshì lvm Gvray dvbùshang móngkà nø Luka 13;31-35 vdòng taqkèní íē.
Mongkà tiqciq (Roma 8:31-39) Dvzvr Polo shøn we taq, ” Kàpa tiqlòng íni gø, Gvray gvsangò shóngnøntní rvweng màshvla “wā shø’n yangì. Gvray gvsangò Shóngnønt nø pvn vrvm shvngbe svng jór lún nø, dvpø’ màdá èzí íwe shóngnønt íe, walòng svng shálúnshìe. Nøngmaqò Nønt mvgør lvm rì, nøngmaq í vhø’mì we dvshà mvhøt lvm rì, bung ra we banchvk rì mvdvm téwa dvgùng vlē. Vpè Gvray gvsangò Shóngnønt dvbùshang Kà svng dvshér nø shvkse wáshì we Kristu Gvray taq, gvzà shvre dvkélvm pvn nvng vhø’m sháòe. Angí dvbùshang Mongkà dvshvngò yv’ngkèní Búngà lvm rvt Farishi rì í Shvre dvkut nø dvkv’mòe. Íni gø Kristu Gvray nø Shvre we mà-vl, Angò Sasvna bvnlì døngja íwe Vpè Gvray gvsangò mongkà svng dvtut dvshvng lvm, zā rì dvban lvm nvng chutchvng we tvrà svng lvngdøm høqshaq dvnúng lvm dang, Vtv’nshì nø shøn yangì. Yadang nø rvgaqtøm Bāsha vsvng rì shvngbe svng dø we vdòng kèní chutchvng lvm rvt kadv’ngte shóngwámshìe, walòng svng dvtánò dang íe.
Vpø’ íwe pèmè vnvmchvngmaq, Nøngmaq, angdèo lvpat taq gø Gvray gvsangò gvsat, Vkangpè Yesu Kristuò dvkv’m Kà svng cvndvgømì we taq Ka lòng ínø, Ka rì ínø mvgv’m màshvla dø v-tu vgám lúnè mà? dvdvmì nø Døngman dø shvkse wáshì laqlúni. Dvzvr Polo shøn yangì pàdø Gvray gvsangò Mvkok dvdí Dø’ngvng we shóngnønt lòng svng kádvgvp gø Nønt vtøp zā we vl mvdaq, wā shvdøm dèkv’m yangshà. Wervt kvmnønt tvrà taqø Døngman dø Vkangpè Yesu Kristu mèpvng cvn nø, Angò dvkv’m Kà vdòng taq rvtø vrvm rvshøngshì Shvkse wáshì laqlúni.
