Angwà Nár (26) Sunday Homily(Sep-28)

Shvngbe svng pàmvra. Deni deyaq høq roqgvl mvkok shawe Gvray Jèjú kaqsvng nvmlat oqà waì. Ya lvbvn nø angwa nár (28) lvbán wa nár svng gòng bø’shà.
(1) Amos 6:1, 4-7,
(2) 1Timoti 6:11-16,
(3) Luka 16:19-31,

Mvgàm pè nvng Lazaru, mvdø̀ng mvngv̀ng we pø̀shi pø̀mè
Zaqshøp vdá Mvgàm wenø အန္တရာယ် zie sere dvkée wawe kà vgo taqkení nvnggùn zì mvyø’nge.

Ya lvbán taq shvngømré kení nøngmaq rvcángcèrì svng pø’ zaqshøp vdá mvgàm dang nø sere dvkée wanø shvdúm we íe. Vdámvgàm we nvng sing nø vni dang taqkení shvdúme.
1/ Ja, Gumsòngrì svng màdvrá we dang taqkení lún we (mvíninø) Gumsòng lvng we dang taq kadø lángnøngmá? mvdø̀ng mvngv̀ng we pø̀shi pø̀mè Jà, Gvmsòngrì svng vtúna lvng we nø cancer yóga zinli dø tìngvyaqshae.
2/ Kám we rvcángcèrì nø Kristuí èzíshà we talen nø vpø’ vtvng we vdámvgàm we dang mví, Pvlacè dang taq vdámvgàmlvm svng nøtløm nø lá dvzaq dvkáng shìlvm dvshvte.

Mòngkà 1 tut kàdvtutshú Amosí shvdúm we taq Shvlá vtv̄ng we yøpjv̀m taq vyálshì nø, vyv̀ngcèri Sha, nungwà Sha, yøtìí vdè góng kaq matshì sórí; núnglv́m gwìnrì taqkèní bìmtì nø̀ aq we yarì nø mvhøt longe. Vwawa dø bǿmdv̀ng warì angmaq shòrkungrì gø vlev̄me wa shvdúme (Amos 6:4-7). Vmlvm aqlvm nvng bìmtì shvláírì nvng vmbóy aqbóy wa wāshì nø rvtørì svng vwawa dø shvleòe. Lvngdøm nø byòlvm tvrà taqkení lvpat shvleshìe.

Kàdvtutshú Amosí tøptøp wa shvdúm we íe. Vde vdámvgàmlvm dang svng wa nøtshì nø vde nvng tiqdø vl we Gvray nvng dvshà mvhøt we vsvngrì svng yv’ng mvtvm we timvlánshì we dang nø gvza nøtmvbyòlvm høq vléò we dang íe.

Pø’ zaqshøprì nø vsv:ngò nøtsvng rvtø vrvm taq tìn gvyaq dvzvre. Kàngpè Yesuí vsvngrìò nøtsvng sháòe. Kàngpè Yesuò mòngkà svng tā we vsvng vnípvn vle. Kàngpèò mòngkà svng tā nø cvn we vsvng témvlùng nø kadvngte dvzaq dvkángshì nìgø v’m mvluq we, døngmvn nø dvshà we vsvngrì íe. Farisirì nø mvgàmrì íe, wervt angmaq nø Gvray jèjú loqpø’ng we Moshi ò, dvrá svng cvn rvt vdámvgàm we íe, wa dvdvmshì nø dvshà we vsvngrì mvng nø Gvray dvrá svng mvcvn rvt dvshà we wa nø angmaq kám we íe