Yesu nø Narni Angkàng í we
6Narni tiq ni taq Yesu nø, zōng rvmá dangdang léshì vdū ke, Ang coqcv́nrì nø zōng shírùng rvtnv̄m nø, angmaq wūr taq vzøpmvm nø v̄me. a
2 Wekvt Farisirì tiqmaqí, “Namaqí nø narni taq wá mvdaq pv̀n pawá èwànø̀nge?” a:lòe. b 3 Yesuí angmaq svng vtà:ngò nø, “Dawi ó ang nvng tiqdø vl rì angmaq svríshi lú:ngì kvt angmaqí kadø wà yà:ngà we mèrø dv́rnøng ma? c
4 Ang nø Gvray chø̀m svng gòng nø, shvrúngshúrìí wa mø̀í nìnø kagǿ gø v́m mvdaq we, dvtān zidòng welòng lùò nø á:mò dá:ngí, ang mèpvng zv̀n rì svng gø shvv́m yà:ngà. d 5 Vsvng Angcè Pè Ngà nø Narni Angkàng pè gø ǿngàe,” a:lòe.
Wur dvsiq vsvng dvbā:nò we
6 Narni dvgá tiq ni taq, Ang nø júrøt chø̀m svng gòng nø shvngø:tnòe. Weyv́ng nø ang wūr vbàngpa dvsiq nø shì we vsvng tiq gǿ v̄le. e
7 Dvrá svrarì nvng Farisirìí nø, Ang svng cèlv́m mvtú lúnlv́m dvpvt, Narni taq Yesuí zarì dvbān daqò má, wa nø Ang svng dvjà:mòe. f
8 Iwe angmaqí dvda:mò rì svng Yesuí sháò rvtnø, wūr tiq pa dvsiq pè svng A:ngí, “Ebúng nø vzv̀ng kaq èrip long,” a:lòe.
Wekvt wepè búng nø rip lú:ngì. 9 Yesuí rá angmaq svng “Namaq svng Ngàí tiq kà røtna:tnìni; Narni taq nø, bv̀nlì shvlá wàlv́m, mø̀íni bv̀nlì mvgv́m wàlv́m; gø̀nshaq shvlutlv́m, mø̀íni gø̀nshaq shvmv́nglv́m; kapv̀n wàlv́m dvráe ma?” a:lòe.
10 Angmaq shvngbe svng gùrhømhøm yà:ngò dá:ngí, A:ngí wepè svng, “Nà wūr èzúshi long,” a:lòe. Wekvt wepè wūr zúshi lú:ngì chàng, vrǿng baná:mì.
11 Iwe angmaq nø shv̀mná høp nø:tní zø̀ngá:mì nø, Yesu svng kadø wàlv́m vrāshìe.
