Shóngshø’ng we pèmè vnvmchvngmaq, Ya lvban nø tiqnøng vdòng Angwa Nár(34) lvban vl yv’ngkèní (27)lvban wà lvban svng gòng bø’shà we íe.
Kristu vdòng taq Vpø’ íwe pèmè vnvmchvngmaq, Dèni vrá Cúnshì we Gvray gvsang Mongkà svng tashì taqsórí Pvlàcè Kvmnønt nònggùn kūnga lùshì lvm dvgø’shì lúnì lòng gø Gvray gvsang jèjú íe.
Dèni rø v-du we Mongkà jømciqrì;-
(1) Esaya 5:1-7
(2) Philip 4:6-9
(3) Mati 21:33-43 vdòng taqkèní íē.
Shóngshø’ng we pèmè vnvmchvngmaq, Dèni tálúnì we móngkà (1)ciq, Esaya 5:1-7.. Gvray gvsangí nø, Israel rvp svng Brimtì kùlwang nvng shvbóngò nø shvngøt dvtúò tvrà svng tálúnshìe.
(Hpilipi 4:6-9) Dvzvr Polo í Hpilipi shvngømré rvzvngcerì kaq shvrìo we shvdøm we nònggùn zì we móngkà taq nø, Vkangpè Gvray taqkèní vtoshì lún bø’shà we, cv’nshì lún bø’shà we tvrà rì svng Døngman dø Kvmnøntní cvndvgøm laqlúnì wā dèkv’mìe.
- Vkangpè Yesu ínø, mvgvm màshvla dø Brim kùlwang bvnlì wáshì rì nvng sing we ‘ Kashvbóng’ mvshøl taqkèní shvngøt dètú íe.Vkangpè Yesuí nø, Gvray gvsangò shóngnønt nø kadv’ngte tēè walòng svng dvtánò taqsórí shvdøm we, dvshat we Kashvbóng mvshøl gø íe. (Mati 21:33-43)
Shóngshø’ng we pèmè vnvmchvngmaq, Gvray gvsang ínø, nøngmaq mvdvm taq gvlò we shóngnønt svng Dènio Gvray Dvbùshang móngkà taqkèní yv’nglúnshìe, Gvray gvsangò mvkok dvdí shóngnønt svng yv’ng dvzvrè. Nøngmaq svng rvgaq yachang mvdvmø vzit vzing dvzvr nø, jèjú angpvnpvn vtoshì dvzvrè, Roqgar nø vzùngè. Yalòng Gvray gvsangò rvnaq we jèjú ìshøt rì svng, oqāe wàì nø jèjú vtv’ngshì lún ràe, Gvrayí zì we angdèo lvpat gønshaq svng gø kùpgarshì nø øpshì lúnlvm gø gvzà vchvkngè. Angdèo lvpat taq Gvray gvsangí àngde svng zi we bvnlì døngja rì gø vpø’ Nøntní rí nø dvnúng rà íē. Nøngmaq taqkèní Gvray gvsang í zi we jèjú (Talen) bvnlìrì svng dvnúng mv-lúnì nìnø, Gvray gvsangí tv’n dvgá ni Kà røtlvm, Mvra dàm zílvm, vlē walòng svng shvdømè. Wervt rvtø angni rì vl dvgvp angdèo Kvmnønt tvrà svng gundvtøp, dvcøp vdv’ngshì nø, shvbóng shvmvtshì, shvnvpshì taqsórí Shvmán jèjú ìshøt rì svng røtním tvleshì laqlúnì.
Vkangpè Yesu Kristu shøn we Kashvbóng taq yadø wàe.
” Brim kùlwang taq bvnlì wáshì rì tvrà”
Yalòng Kashvbóng mvshøl svng Vkangpè Yesuí shø’nòe. Brim kùlwang taq bvnlì wà rì nø, sun ngāshì rì íē. Yarì nø mvgvm màshvla vsvngrì íe. Brim kùlwang angkang pè nø mvré zā shóngnønt dvnzøng pè Gvray gvsang tvle gø íe. Brim kùlwang nø Israel dvcirì svng shø’n mvyø’ dang íe. Bvnlì wáshúrì nø wè rvtø taq dvcirìo tvle rì ínø, Shvrúngshú vji rì, Dvrá svra rì, Parisi rì nvng shaqré shaqtáng rì gø vbá lòng svng shø’n mvyø’ dang íe. Sun kùlwang angkang pè í nø, tiqgø’ mèpvng tiqgø’ dvzvrò we dvzømshú vshuqrì nø, Gvray gvsangò móngkà svng dvshvngò we Kadvtutshú rì íē. Lvngdøm taq dvzvrò we Angcè pè nø, Yesu Kristuní íe.
Vpø’ íwe pèmè vnvmchvngmaq Nøngmaq, angdè taqkèní Gvray kaq shini mvká:mì vzàng kaq Gvray gvsangí nø nøngmaq gø’ vrvm kaq svng kv’mè, vlømshìe. Wervt Gvray gvsangò mvré zā mvkok dvdí shóngnønt svng dvdvm vjáng ì taqsórí Cìpshì Nøntní tvleshì nø Gvray móngdàn dvpvt Shvkse wáshì laqlúni Pvlàcè kvmnønt nònggùn kūnga lùshì laqlúnì wvng dvshat nø nònggùn zí mvyø’è.
Shvngbe mvdvm Gvray mongzøl laqtuqdaq shvngbe svng Pamvra.
