Dvshà vsvngrì svng dvbvng mvkok ràwe
Kà dvtutshú Eliya nvng Memàmè kà dvmàn we svng yv:ngì (1koqkvm 17:10-16) taq nvmlvt aqtì cvmaqcè røtshì ke memàmèí nø kà dvtutshú Eliya svng masháò ínìgø aqtì zíòe. We mepvng vrá zidòng røtshì dvgvp memàmèí nø màdáng ngà nvng ngàcèpè nø zidòng wehvncè yev́mlvm shǿng rvkulshø̀ng we íe, wàe. Eliyaí vrá tiqkvt røtshì dvgvp memàmè nø Gvrayò kū:ngà rvt kà dvtutshú pè dvpvt zidòng nvng yøtì tiq hvncè yeàò nø zíòe.
Marko dvbù shvng mòngkà taq memàmèò gv̀msùng nø mvgàmrìí zá:ngò we vlū nvng mabúng we dang shvngøtnòe. Mvgàmrì mvme gǿí nø gv̀msùng mvmeme zá:ngòe. Iwe dvshà we memà tiq mèí nø kàmø gv̀msùngshicè vní gø̀m wa zá:ngòe. Ngàí namaqí svng v̄la:tnìni, gv̀msùng zv́nglv́m shøpdik taq zá:ngò rì angmaq shvngbe mvdv̀mø nø, dvshà we memà yamèí té zv́ng bǿà. Kadø íe wani dvgá rìí nø, angmaqí zǿm vchéò rì taqkèní zá:ngò we wa íe. Yamèí nø ang dvkúmshìlv́m shvngbe, angò v́laò dv́ngte zv́ng bǿà,” a:lòe.
“Mvshámhoq dèshànøng rì namaqí nø ìshøt ìgv̀n lúnlv́m íá:mì; pàwálv́m wani Gvray móngdàn nø namaqò èíanø̀nge (Marti 5:3, Luka 6:20). Nøngmaq mvshámhoq dvshà we svng kàngpè Yesu dvbù wenømví. Angmaq nø Gvray dvhø taq pavdáng vgámlvm màvl rvt íe.
Kadø íe wani nøngmaq Vkàngpè Yesu Kristu Ang jejú svng namaqí èshánønge.
Ang nø mvgàm í nìgø Ang dvshà daqì yv́ng kèní, namaq mvgám lúnlv́m rvtnø, namaq dvpvt mv̀ng dvrvt daqì (2kor 8:9).
Nøngmaqí kadø waìnì, dvshà nø yatn:gì ìe, wanø eshø:nìmá. Nøngmaq Nazareth wamà kèní kà dvtutshú pè svng shvvm shvaq lvm ang dvkúmshìlv́m shvngbe, zíò we memàmè dvngte dvshànøngmá, Vrá dvbù shvng mòngkà taq kàmø gv̀msùngshicè vní gø̀m wa zá:ngò we memàmè mvdv:mø dvshànø:ngèmá dvdvmlvm waì. Nøngmaq nø lvngdøm shìni høq dvløt we vhø’mlvm svng vná mvdaq. Wedø dvløt we svng vsóm zíò nìnø krvtsómv:mè, jòrvmnì nø muqlang móngdan taq Gvray nvng tiqdø dvciq lvpat mòngzøl nø v’lún lvm íe, wang dvshat we íe.
