Nepal móngdàn taq bøn we vtì tøng bøì dvjáng taq mvhøt lvm vhø:mò vsvngrì dvpvt Pope Leo XIV taqkèní vjúrøtā we

Himalaya rvzì kèní tvwàn zønø tiq dvshaqí vtì tøng we dvjáng vhøm bøà we vsvngrì kaq Pope Leo XIV taqkèní vjúrøt dvbangā we svng shálún shìe.

We vtì tøng ráì we shìwvt rvt Mìwà móng dvrøt Nepal móngdàn shvrà rì taq vsvng gorø àngkyíng rvzé rìò lvpat rì vmáng bøì we nvng móng vsvngrìò mvrìng, wamà, chøm, dvzà dø íwe dvrè rì shvngbe vrøl gvyaq shì bøì wegø íe.

Pope Leo XIV ò wángzà móng vtoq vtip kønmvng íwe Cardinal Pietro Parolin kèní tiq dvtang vrìngvtnà we Svrabín koqkvmpèò yòl kàru taq shìwvt vdòng vtøp kebøà we chøm vsvngrì tiqgø vrvm Gvray yvngkèní nøt shvløm we jejú vtoshì lúnlvm vjúrøt dvbangā we nvng svngpvn dvsháza tubúm bvnlì wawe mvdò rì shvngbe gø chutcháng tubúm dvbangā we bvnlì rì tiq dvshaqí wáā lvm dvkám bøà we íe.

We shìwvt rvmè vkøn bøì we dvjà svng UN nvng mònggvn móngdàn vrvm kèní svngpvn dvsháza tubúm dvbangā we mvdò rì tuq ráì nø cháng we bvnlì rì Helicopter, nvmbøngshø rìí wámvnò we ínì gø vtìrvt vrøl bøì we chømrì vdòng svng tuqlún lvm tvrà rì yvkwe vl we dang dvtú shvngkà rì taqkèní shálún shìe.

Mònggvn lvngcha vlíng vpo ráì wervt Himalayan tvwvn rvzì kèní tvwvn zøwe shìwvt rì gø tiqni mvdàm tiqni svre dvké ráì we svng shálún shìe.