Pán vshat ca rà we
Shvngbe mvdvm Gvray mongzøl lòng laqtuqdaq! vtoshì laqlúnì, shvngbe svng Pamvra.
Kristu vdòng taq Vpø’ íwe pèmè vnvmchvngmaq Dèni August shvlá Nár vbì ni dèni nø St. Monica bóy àngni gø íe.
Dèni dvdvm vjáng taqsórí nònggùn lùshì lvm Gvray móngkà jømciq nø
Mati 24:42-51 ciq vdòng taqkèní íē.
Vkǿ nø yaqdø̀ng kārí kālvng taq di rā we svng, chø̀m angkàng pèí lā sháò nìnø, ang chø̀m svng lamvgòng ra dø ang pán dvshatshì nø vsù:ngò we svng namaqí èshánønge, a:lòe.
Vpø’ íwe vnvmchvngmaq, Vkvtdø Cúnshì we Gvray gvsang móngkà svng mvdvm vjáng taqsórí mv-ngú nø Pvlàcè Kvmnønt nònggùn kūnga lùshì lvm rvtø shvlá vtoshì lúnì rvt gø Gvray jèjú svng oqā.
Vpø’ íwe pèmè vnvmchvngmaq Mongkà taq, “Pán vshat ca rà we” dang shvdømè.
46 Angkàng pè vtv́ng daq kvt, welòng dø tiqdvchá wà dáò lòng svng a:ngí yv̀ng bǿò we vshuq wegǿ mv̀ng nø ìshøt ìgv̀n v̄le, wàe.
Angdèo angkang lō ra rvtø svng tvlú wáshì nø, dvgø’shì nø cāò we dvzømshú ínø, ìshøt ígvn lúnò gø’ íe, wā shø’nè, shvdømè.
Vpø’ íwe pèmè vnvmchvngmaq, Nøngmaqò lvpat taq gø, Vkangpè Yesu Kristu nø rvtø vrvm tiqgø’ nvng tiqgø’ò àngdvja taqø mvtu nø rvtø vrvm dì lòng svng dvdvm vshat ra íe. Nøngmaqí Vkangpè Yesu Kristuò Kàgvp svng vtoshàì rvtø taqgø, Vrá nø, lvngdøm àngni taqwā dì daq we mø-í nø, Nøngmaq ni vrvm Cúnshàì we lvpat taqgø, Nøngmaqò dvmū bvnlì wàng taqgø, Nár shì rvtø, Døngku vsvngrì mvzuq mv-ngúshì rvtø taqgø, Vjú røtnì rvtø taqgø, Tiqdvng vsvng tiqgø’ kaq (mø-í ni), nøngmaqí vtōlvm rvzaq we shvngōshàì we tiqgø’ ( mø-í ni) shvla we Kàru tiqbok røshàì rvtø taqgø, Gvray nø lashìdaq nø, Nøngmaq nvng tiqdø vlē, walòng svng dvdvm vshat dvzvrè. Wervt pán vshat wáshì nø Dvdvm vshatnì taqsórí shvla we jèjú ìshøt rì svng mvng vtoshì, dvgø’shì laqlúnì. Shvngbe svng Pamvra.
