Dvrá svrarì nvng Farisirì svng Yesuí ngønò we
“Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaqí nø, gvrō shábv̀n gø, bv̄nzi bv̄nyang zø̄ngløm gø, shvnv̄m dø í rì gø, tiqcé wál kèní tiqwál lòng nø Gvray kaq shèrúngnø̀ng we; dvrálòng taq tété rīng nø̀ gvzà dvkv̀ng we døngman dø dvràlv́m nvng dvsházālv́m nvng nøt tǿng kv́mv́m vrv̄m we; yarì svng nø rá namaqí mècv̀nnøng.
Yadv́ng pv̀n gø dvgá rì dø tiqdvchá cv́n rà we íe. Tvrà shølshú nemànrì namaqé! Shvmǿcøt svng nø ècìnøng nø, Golawu svng nø rá ènaqnønge.”
“Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaq nø kung gwìnrì vtv́nglap wa jøljøl wa zá:lò rì dø nàshv́mnønge. Inìgø namaq vdòng rv́m nø vmupmv̄m we nvng mapnøt dv̀n nàdeqnønge. Farisi nemànrìá, kung gwìnrì vdòng rv́m vzv̀ng shànshàn wa èzv́lnøng, wekvt wa vtv́ng lap gø shèr longe.
Kristu vdòngtaq vpø’ì we pèmè vnvm vchvngmaq Shvngbe svng pamvra wànge. Deni nø (Aug-25-26) ni svng tuqráshà. Deni Gvrayí ziwe rvtø shvlá vdùng taqø dvdvm vjvng nø Pvlacè nvnggùn lūshìlvm Gvray mòngkà nø —
Deni mòngkà taq dvrá svràrì nvng Farisirì svng namaq nø mèhøt lóngnønge. Pawálvm wani vdòng rv́m mvdvm mvdvm shvle svng té nøt etāshìnønge wanø Kàngpè Yesuí angmaq svng ngànòe. Vkvt tiqpvn tín tiqpvn shvlá dvtvnshìe. Mvdvm shvle wa dvtvnshì nøng nø jøngjø’ng vchvk we dang svng nàná nønge vlòe. Mvdvm shvle mvdvmø té vchvk we shóngnøt mvrà zānøt nvng laqyà shvla dvtvnshìlvm nøngmaq shvngbe svng Gvrayí shvdúm dvshvt we íe.
