Kanan mè angcè mè dvba:nò we mvshøl taqkèní íē.
Kayv’ng màyv’ng èvlnøng we shóngshø’ng we pèmè vnvmchvngmaq shvngbe svng Pamvra. Rvtø vrvm Gvray jèjú vdòng, Gvray gvsangí kùpgar we, roqrèm we Jèjú vdòng taqø mongzøl dø ce cúnshì lúnì rvt Gvray jèjú svng oqā wàlvm ra íe. Ya lvban nø Angwa Nár (20) lvban wà lvban svng gòng bø’shà we íe. Vrá nø, Ya lvban nø Gvray Angmè Maria Muqlang kaq tvm bum bø’à we bóy svng wáshì we lvban angni gø íe.
Ya lvban taq Rø v-du we Gvray
Mongkà jømciqrì nø;-
(1) Esaya 56:1,6-7.
(2) Roma 11:13-15,29-32.
(3) Mati 15:21-28.
Kristu vdòng taq Vpø’ íwe pèmè vnvmchvngmaq, Dèni, ya lvban nøngmaqí tá lúnì we Vkangpè Yesuò Mongkà, Mati dvbùshang Mongkà svng mvdøng dvdvm vjáng taqsórí nònggùn zí mvyø’è.
Mati 15:21-28 ciq taq;–
Kanan mè angcè mè dvba:nò we mvshøl taqkèní íē.
Vpø’ íwe pèmè vnvmchvngmaq, Rvmnvng Rvmja rì dvhø taq í nigø, angpè angmèmaq nvng angcèrì dvhø taq í nigø, angri angrvp rì nvng rvmnvng rì dvhø taq í nigø Døngman we shóngnønt vl bø kvt mongzøl lòng, tø’nzv’n lòng, vjú zí lún lòng svng dvbung lúnè, dvtàn lúnè. Dènio Mati Gvray dvbùshang Mongkà taq, Kanan mè angcè mè svng dvba:nò tvra mvshøl svng nøngmaqí tálúnìe.
Yalòng nø, Gvray gvsangò Shóngnønt nvng Døngman we Angmè tiqgø’ò shóngnønt svng vkvtdø yv’nglúnshìe. Vkangpè Yesu kèní Kannan me svng Cìpshì Nøntní shø’n lòng nø Àng kaq timvlv’n nø shø’n we nø mø-í. Vsvng shvngbe shvbóng shvmvtshì lúnlvm dvpvt le íe. Kanan me angdèo angce mvdvm taqø gvlshì we Døngman we shóngnønt svng vwawa dø yvklvmrì, banchvk rì dvhø taq krvtzø’m lvm mø-í walòng svng gø Vkangpè Yesuí vsháshaq íe. Døngman we shóngnønt nø tvløt lòng vhø’mshìe. Døngman we Gvray gvsangò Shóngnønt rvt, nøngmaq pv’nmvn we vhø’mì nø, Døngman we angpè angmèmaqò shóngnønt rvt nøngmaq nø Vsvng wàwe vlún vkvng taqkèní cúnshì lúnì lòng íe.
Døngman we shølshú shvlá tiqgø’ò shóngnønt rvt móngdàn vháng vdá mvgam lún nø, Døngman we dvzømshúrìo shóngnønt rvt móngdàn zøle, mongzøl nø V-toq V-tip dvmv’n lúnlvm bø’n lúnè. Wervt Na Ngà Nøngmaq shvngbe taqkèní gø Døngman we shóngnønt svng zí vlø:tnì Na dvpvt, vsvng shvngbe dvpvt vjú zílún lòng svng yv’nglúnlvm í lungè. Gvray gvsang nø shóngnønt ínø, shvla pvnrì svng wa bø’n dvzvr lòng nø Jø’ngjøngni Dìng lòng íe. Shvngōshì lòng ínø kagø’ dvpvt gø vjú mvzì, màshvla we tvrà kaq dvtòl lòng svng yv’nglúnshìe.
Dèni kanan mèo Gvray kaq Kv’m we Kvmnøntní Angce me mvdvm taq shóngshì we shóngnønt lòng svng shvbóng shvmvtshì lúnì nø, Nøngmaq taqkèní vsvng shvngbe dvpvt vjú zílún gø’ wáshì lúnlvm vlē. Wervt shóngnønt walòng svng vpø’ shvring i taqsórí chaqdvp cvndvgøm nø Gvray móngdàn dvpvt shvkse wáshì laqlúnì.
