Gvrayí nø nøngmaq mvdàm kámnøt kadvgvp gø vlnø èzíì we íe

Pope Leo XIV taqkèní ya lvbán vdòng dvtú we mòngkà taq vjúrøt dvzaq shì lvm vrà nvng Gvray mòngkà vdòng zøm shvngángshàì nø we tvrà svng rvtø zíì só:rí lvpvt cúnshì lvm dang dvtú we íe

Chutcháng we tvrà dvpvt lòngzàpè Gvray kaq kàngpè Gvrayí dvtú bøà we ínø shìlòng svng jórlún bøà we chángshú Gvray àngò mòngkà vdòng kèní dvzciq lvpat gønshaq tvrà mvzi dvyø svng mònggvn vsvngrì dvpvt dèni dèyaq høq shaq èzíì wedang dvtú mòngkà kèní shvdøm we íe.

We chutcháng tvrà Gvray mòngkà nø nøngmaqò dòng nøt mvsøn svng rvtø vrvm tuq rawe ínìgø we mòngkà svng vtoshì we bashà vsvngrì vdòng vsháy we gø gvzà vl we dang shvdøm we íe. Mòngkà taq yvnglún shì we vmyø kà shvbóng døni àng mòngkà lòng nø nøngmaq bashà vsvngrì mvdàm vtoshàì we tvrà mà bóngvm we svng dvshat nø shvdøm bøà we íe.

Nøngmaq kaqsvng Gvrayí èzíì we ìshøt jejú nø síngshá nøt nvng rvwvl nøt svng rvtø vrvm èzíì we ínø nøngmaq tiqgø vrvmò shvla we nvng màshvlawe dòng nøt mvsøn rì shvngbe svng àngí yvnglún shálúnò we dang shvdøm we íe.

Gvray àngò mòngkà vdòng køqzøl shàì nø cipshìwe nøt mvsøn rì taqkèní vto lú:ngì kvt shvnshér pvlàcè Gvrayò shóngnøt, dvbù nøt mòngzøl lòng, døngmvn we nøt tøng nøt yvngwe nvng nvng vdèò lvpat tvrà svng vdè roqgvr shì lúnwe zitnøt rì shvzvt lún lvm íwe dang shvdøm we íe.

Ya dang shvngbe nø dèniò mònggvn dvjà taq dvshit dvsher lvm laqni vchvt bøì we írvt rvcángcèrì shvngbe Gvray yvngsvng vløm shàì nø vjúrøt dvzaq shàì wanø dvtú mòngkà kèní shvdøm bøà we íe.