Yesu nø Narni Angkàng pè í we
Shvngbe mvdvm Gvray mongzøl lòng laqtuqdaq, shvngbe svng Pamvra.
Kristu vdòng taq Vpø’ íwe pèmè vnvmchvngmaq, Dèni tashì nø nònggùn lùshì lvm Gvray móngkà nø, Mati 12:1-8 vdòng taqkèní íē. Mongkà vzàng røshì lvm wàì.
Wemèpvng, Yesu nø Narni taq zōng rvmá hv́ng dangdang léshì ke, Ang coqcv́nrì svríshi rvtnø zōngshí rvtnv̄m nø v̄me. 2 Welòng svng Farisirìí yv̀ng bǿà kvt Yesu svng, “Ku, Nà coqcv́nrìí nø, Narni taq wá mvdaq pv̀n wàòe,” a:lòe. 3 A:ngí angmaq svng, “Dawi nvng ang lamboqrì svríshi lú:ngì kvt kadø wa yà:ngà we mèrø dv́rnø̀ng ma? d 4 Ang nø Gvray chø̀m svng gòng nø, ang nvng ang mèpvng zv̀n rìí nø shvrúngshúri wa mø̀í nìnø v́mlv́m dvrá màvl we, Mv́rdvtān zidòng lòng v́m yà:ngà. e
5 Shànshér tø̀ngnø svng mvshèr dø Narni taq shvrúngshúrìí vcaqò nìgø mvrà màvl we svng, Dvrá kàru taq mèrø dv́rnøng ma? f 6 Namaq svng Ngàí v̄la:tnìni; Noqngø̀m Tø̀ngnø mvdv̀m té rīng we tiq pè yayv́ng v̄le. 7 ‘Ngà nø, shvt núngpà mvdv̀mø mvréza lòng mv̀ng shònge,’ wa we yakà angmvshǿl namaqí èshánøng pà í nìnø, mvrà màvl vsvng kaq namaqí kà mèrvtnøngni we íe. g 8 Kadø íe wani Vsvng Angcè pè nø Narni Angkàng pè íe,” a:lòe.
Vpø’ íwe pèmè vnvmchvngmaq, Dèni Vkangpè Yesuò dvbùshang Mongkà taq, Vkangpè Yesuí nø shvrúng Nóngpà lòng mvdvmø dvshá zā tùbùm dvbvng lvm lòng svng mv’ng téwa shvrúngè, dèkv’mìe. Gvray gvsang shvrúng lòng nø, dvshá zā mvkok dvdí shóngnønt lòng íe, walòng svng vkvtdø shangshang wacè yv’nglúnshìe. Vbør vkvng we mvbø’n dvja, màbóng we lvpat rì vkvtdø luq we àng dvja rì vl nigø, Gvray gvsang dvpvt Tiqdvng vsvngrì mvdvmø gvlshì we, dvshá zā mvkok dvdí shóngnønt lòng mv’ng íe, walòng svng vkvtdø shvdømè.
Dvci rø (28:1-11) yv’ngø Gvray gvsang kaq shvt Nóngpà shvrúngshì lòng nø Nárni nvng sing we Dvrá rì mvdvmø vpø’ shvringò tvrà svng yv’ng lúnshì pàdø, ( Esaya 6:6) Gvray nø Shvrúng Nóngpà lòng mvdvmø dvshá zā mvkok dvdí shóngnønt laqya svng gø, Shvt Nóngpà lòng mvdvmø téwa Gvray gvsang nvng vzøm vzaplvm lòng svng shvrúngè dvtánòe.
Wervt vpø’ íwe pèmè vnvmchvngmaq, Gvray gvsang mvrdvng yv’ngø dvshá zā shóngnønt lòng nvng mvkok dvdí shóngnønt lòng nø vchvk vtv’ng íe, walòng svng dvdvmì taqsórí nònggùn kūnga lùshì nø Shvkse wáshì laqlúni, shvngbe svng Pamvra.
