Muqlang móngdàn nø, gurwang shvlá rvmá háng taq vmyø wønò we dvyø nvng vbóngè

(15th Sunday of the year A)

Kristu vdòng taq Vpø’ íwe pèmè vnvmchvngmaq e, ya lvban nø Angwa Nár (15) lvban wà lvban svng gòng bø’shà.

Ya lvban vdòng taqgø Gvray gvsangí kùpgar we jèjú vdòng taqø gø’ vrvm, rvp v-rvm Mongzøl døcè Pamvra Cúnshì lúnì we mvdvmø dèni vrá tiqkvt Gvray gvsang móngkà svng vrá mvngú nø Pvlàcè kvmnønt nònggùn lùshì lvm dvgø’shì lúnì we gø Gvray gvsangò Shvmv’n jèjú íe.

Ya lvban taq Rø v-du we Mongkà ciqrì:-
(1) Esaya 55:10-11
(2) Roma 8:18-23
(3) Mati 13:1-23

Esaia 55:10-11 ……. Gvray Mongkà nø, mvnggá vl dø tiqdvchá gundvdøp lv’m vchvkngè. “Ngà nonggup kèní bung we Kà nø Ngà yv’ng svng maqhúng vtv’ng lv’m mø-í.” dvkv’m we móngkà svng tashì lúnlvm i daqè.

Roma 8:18-23 ……Pvn mvn we pvn vrvm shvngbe yv’ngkèní Gvray gvsangò angcø angcèrì téwa bung lvm lòng svng shvrúngè, cāòe, wā shvdømè.

Mahte 13:1-9 …… Muqlang móngdàn nø, gurwang shvlá rvmá háng taq vmyø wønò we dvyø nvng vbóngè, wā Kà shvbóng mvshøl taqkèní shvngøt dvtú we tvrà svng tálúnshìe.

Ka shvbóng mvshøl mvmè

Vpø’ íwe pèmè vnvmchvngmaq, Vkangpè Yesuí shvngøt dvtú dvshvngò we Mongkà taq, vjú zi we ‘Ka shvbóng mvshøl ‘ rì mvmè lv’ngò we í shvngøt dvtú dang yv’nglúnshìe. Muqlang móngdàn tvrà svng dvshvngò we taq, Shi wa vsvngrì i cíngràl lúnlvm dvpvt Vkangpè Yesu ínø ‘ Ka shvbóng mvshøl ‘ mvmè taqkèní dvshvngòe. Ya lvban Gvray Dvbùshang Mongkà taq, ‘ Dvyø wønò pè Ka shvbóng ‘ mvshøl tvrà svng vbáè. Nøngmaq Shvngbeí mvmè baq tálún bø’shà we móngkà gø íe. Dvyø wønò Ka shvbóng mvshøl taq, (a) Dvyø nø Gvray gvsangò Mongkà ínø, (b) Wønnò pè nø Gvray gvsang kaq tvnuò nø shø’n Kà íe. (c) Dvyø vjáá:mì we vba só, shvra nø, Mongkà svng tashì lúnì we, vtoshì lúnì we Bāsha rvzvngcerìo Nønt mvsøn svng shø’n we tvrà íē, walòng svng yv’nglúnshìe.

Vrá nø vbá só (4) Pvn

Mati í vrùo we Dvbùshang móngkà taq Dvyø vja we vbà pvn (4) pvn svng dvtánò nø shø’nè. Wè rì nø;-
(i) Tiqmaq nø Tvrà shvmōr taq vjáá:mì
(ii) Dvgá Tiqmaq nø Lóngheq taq vjáá:mì
(iii) Tiqmaq nø bv’nghø’ vdòng svng vjáá:mì
(iv) Tiqmaq nø vbà shvlá ( Só vl shvra) rì taq vjáá:mì, wàe.

Vpø’ íwe pèmè vnvmchvngmaq, Mongkà svng tashì lúnì we vsvng Pvn (4) v-li e.

Shvla we vbà (mø-í ni) rvgaq só vl we shvra yv’ng vjáá:mì we vmyø nø gvzà shvlace te lung nø, angshí rì mvmè shí lungè. Dvgá rvgaq só mà-vl we shvra yv’ngø vjáá:mì we vmyø nø, shvlá wa mvyō. Angshí shí mvlúnò. Yalòng Kashvbóng mvshøl (metaphor)taqkèní Vkangpè Yesu ínø, angí dvshvngò we móngkà svng tashì Vsvng pvn (4)pvn svng vwá:lò nø dvtánòe. Mongkà svng Tashì nø vtoshì lúnò we Nønt mvsøn kūnga, Nønt mvsøn(attitude & disposition) vdòng taqø, Gvray gvsangò Mongkà svng Kv’m we vtoshì lòng nø Ka zidvng taq vlē, walòng svng shálún lvm vlē. Àngde góng svng àngde dvdvmshì nø røtshì lvm nø, vchvkngè. Mø-í ni, shvla we vbà só (soil) vl we bø’n lúnè mà? wàkà íe.

Vrá nø, Nøngmaq í Cvndvgøm Ra we Tvrà taq;–

Gvray gvsang móngkà svng tāshà ínø, Angdèo Nønt mvsøn vdòng taqø shøpshì lún bø’ì kvt, vrvm bø’ì wā dvdvmì vsvng gø vl v-dùe. Vrá nø yalòng í wā mvkøm mvzøp, mvluq wàì vsvngrì gø vl v-dùe. Tiqdvng vsvngrì kaq svng vrá tiqkvt dvtit tvle lún ra íe. Dvtit tvle lvm rvt Vkangpè nø shvrúngè. Mongkà taqkèní Gá lòng svng zi pàdø, chaqdvp gø cvndvgøm lún ra íe. Vnvmchvng tiqmaq nø, Mongkà svng mvmè shá bø’ò dvgvp gvzà vhaq vjvngshì we shaq dvtánòe. Àngde í èsháò rvt rvmnvng kaq vtu nø shø’n we Kà nø, Angdèo Nønt mvsøn vjang laqyàrì nø Gvray gvsang Mongkà nvng shini mvmè vcārè wàwe anglvjøm svng dvtànshì lòng íe. Gvray gvsang kaq shá lúnè wàwe taq, wè Mongkà kèní shvngøt dvtú tvrà rì svng chaqdvp cvndvgøm shvdikshì(practice) lúnlvm, shvkse wáshì lúnlvm gvzà vchvkngè.

Vrá nø,’Mongkà wøn gø’

Vkangpè Yesu Kristu ínø, Cúnshì we Gvray móngkà svng nøngmaqò Nønt mvsøn taqø wønàe. Àngde nø angdè vrá gun dvtøpshì lúnlvm gø vchvk ngè. Mongkà taqkèní dvkv’m we vbà (4) pvn yv’ng kalòng taqø Ngà nø vbángè mà? dvdvmshì dvzvrè. Kà dvtutshú Esaya Mongkà taq shø’n yangì we nø, “Ngà nònggøp kèní bung we Ngà kà nø maqhúng vtv’ng lv’m mø-í.”( Esaya 55:11). Gvray gvsangò Mongkà nø wønò dø tiqdvchá, yō lungè. Íni gø, shvlá wace yō lung nø, shí nø zvrshìlvm gø Nvmpøn vl we vba yv’ngø vja vm kvtwā bø’n bungè. Nøngmaqò Nønt mvsøn rì ” vbà só shvlá” bø’n lún kvtwā angshí shí lún we íe. Wè dø mø-í nìnø, Nvmpøn mà-vl we ” vbà” wā í lvm íē, walòng svng shvdømè.

— Denila taq, Mònggvn taqø vlíng vpō we mvmè vlē. Pàdang taq íni gø tiqdvshaqí vlíng vpō lúnè. Shvla pvn rì mvmè vl pàdø màshvla pvn rì gø vbáè. Lún mvká Nønt, Shøp wā shøpshì mvyø’ we Nønt laqyà vjang laqyàrì svng dvzøp vdv’ngshì lúnlvm dvdvm vshat dvzvrè. Wervt Vpø’ íwe pèmè vnvmchvngmaq, Pvn mvn Gvray kaq shvgùn shvring mvyø’ we Nønt mvsøn vjang laqyàrì Rvtø vrvm dvzøp vdv’ngshì taqsórí tvleshì nø Pvlàcè kvmnønt nònggùn kūnga lùshì laqlúnì.

— Kadvtutkà Esaya nonggup kèní Gvray gvsang shøn we taq, ” Ngà nonggup kèní bung we Kà nø Ngà yv’ng svng maqhúng vtv’ng lv’m mø-í”wàe. Vpø’ íwe pèmè vnvmchvngmaq, Nøngmaqò Nønt mvsøn vdòng taqø èwønà bø’shà we Gvray Mongkà dvyø yalòng nø, shvlá wace dvté taqsórí, angshí shí lúnlvm dvpvt Gvray gvsang nø shvrúngè. ‘Vbà ‘ (Nvmpøn vl we) “vbá só” bø’n lúnhøq dvzaqshì tvleshì laqlúnì.

(Mt 13:8) “Iwe tiqmaq nø, vbā shvlá taq vjáá:mì nø, angshí shí lú:ngì kvt, tiqyá dvtv̀ng, vchuqcé dvtv̀ng, vshø̀mcé dvtv̀ng høq shóng lú:ngì. Tálv́m vnà vdá vsvng wegǿí nø laq táò,” wā dvkv’mè.

Cúnshì we Gvray Mongkà svng tashàì we gø’ v-rvmì Vkangpè Mongzøl lòng Mongkà ìshøt svng vtoshì laqlúni shvngbe svng Pamvra.