Noqshi bø̀ng wa ríò rì
Shvngbe svng Pamvra!
Dèni dvdvm vjáng nø nònggùn lùshì lvm Gvray móngkà nø
Mati 7:21-28 vdòng taqkèní ínø,
Noqshi bø̀ng wa ríò l vsvngrì kaq svng Vkangpè Yesuí shvngøt dvtú we móngkà taqkèní íe.
Kristu vdòng taq Vpø’ íwe pèmè vnvmchvngmaq, Dèni tálúnì we Gvray dvbùshang móngkà taq, Vkangpè Yesu ínø kvmnønt walòng nø nonggup taqkèní wā shø’n we, Kà shvdiq zíshì nø shøn lòng wa mø-í lv’m, àngde lvpat taqkèní chaqdvp cvndvgøm ra we bvnlì tiqlòng íe, wā dvkv’mè. Kristu kaq svng Vkangpèa Vkangpèa wā goshì lòng í, Muqlang móngdànò zaqshøp svng vtoshì lúnlvm mø-í walòng svng dvkv’mè.
Wervt àngde èkv’m we Kvmnønt tvrà nø nonggup taqkèní wā shø’nshì we mø-í dø, jø’ngjøngni chaqdvp nònggùn kūnga taqkèní cvndvgøm lúnlvm Ra vchvk dang shálúnshìe. Kv’mè, wàwe taq Nønt mvsøn vdòng taqkèní vtoshì lòng mvdvmø, Angdèo ni vrvm Cúnshàì we lvpat yv’ngø, àngde shvnvng gurgur taq, Mònggvn taqø dvtàn lúnlvm cvndvgøm lúnlvm gvzà Ra vchvkngè.
Vkvtdø cvndvgøm shì dvgvp nøngmaqò lvpat nø, lòngtv’ng mvdvmø vrvngshì we Chøm pàdø ínø, Dø’ngvng lúnlvm íe. Àngde èkv’m lòng svng mvdvm shvle nonggup kèní wā Cúnshì vsvng nø zishil mvdvmø Chøm vrvngshì we svngdál nvng vbóng lv’m ínø, Nvmbøng mvru me wà ra dvgvp vtùngvm nø angshí vrømlvm dang Mongkà kèní vkvtdø dvdvm dvzvrè.
Vpø’ íwe pèmè vnvmchvngmaq, Dìngman we Kvmnønt, wàwe nø Nøngmaqò vjang laqyà, mvnggá rì nvng V-toq V-tip vzøm vzapmì tvrà svng téwa vháng dø tvlíngà lún we kūnga vzàm vlē. Vkangpè Yesuò dvbùshang móngkà kèní nøngmaqò lvpat svng mvdvm shvle wā mø-í dø, Dø’ngvng we lòngtv’ng Kristu vdòng taqø Kvmnøntní dvgø’shàì nø dvzaq dvkvngshàì, dvzaq dvkvngshì taqsórí vrvngshì nø Kvmnønt Pvlàcè nònggùn kūnga lùshì laqlúnì.
Ngà svng, ‘Kàngpèá, Kàngpèá, wa go vsvng shvngbeí muqlàng móngdàn góng lún lú:ngò we mø̀í. Muqlàng taqlap yv́ngò Vpè Ang nøt cà:nò rìí wa góng lún lú:ngòe.’ Kàngé we angni taq, vsvng mvme nø Ngà svng, ‘Kàngpèá, Kàngpèá, nøngmaqí nø Nà bø̀ng taqkèní kàdvtut yv̀ngshà. Nà bø̀ng taqkèní cáng lùng yv̀ngshà. Nà bø̀ng taqkèní jórnònggùn bv̀nlì rì gvzàzà wà yv̀ngshà we mø̀í ma?’ wa longe. Wekvt Ngàí angmaq svng, ‘Ngàí namaq svng kadvgvp gø mvshá dá:rì. Dvrá mècv̀nnøng rì namaq nø, Ngà yv́ng kèní èrv́lshìv́mnøng,’ v̄llv́m íe. o
Chø̀m wáshú vní pv̀n
Wervtnø̀ Ngà kà yarì táò nø cv́n dø̄ng vsvng kagǿ ínìgø, lóngtv́ng mvdv̀m taq chø̀m vrv̄ngshì we, zitnøt v̄l vsvng nvng vbónge. Shø̄ zaq nø, tì tø̀ng nø, nv̀mbø̀ng mvrù mut ra weí chø̀m wechø̀m svng vtøp ra nìgø, we chø̀m mvpv̀ng angké nø lóngtv́ng mvdv̀m taq vrv̄ngshaq í rvtnø màtūngv̄m. Ngà kà yarì táò dá:ngí mvcà:nò gǿ nø, zishìl mvdv̀mø chø̀m vrv̄ngshì we svngdál nvng vbónge. Shø zaq nø, tì tø̀ng nø, nv̀mbø̀ng mvrù mut rā weí chø̀m wechø̀m svng vtit rā kvt, vtūngv̄m nø angshí vrø̀mv̄me,” a:lòe. Yesuí kà yarì shǿn dv́ng bǿà kvt vsvng loksokrì nø A:ngí shvngø:tnò kàrì svng gvzà dàá:mì.
