St. John Capistran Confessor (1386-1456)
St. John Capistran n; Italy móngdàn Edbruzi rvzì rvgaq Capestrano taq shøq yv̀ngà nø Peru móngdàn taqø dvrá Ubvdi paqzí svng cvnshì dá:ngí àng lvpat (27) nǿng taq Peru móng ò øpshú tiqgǿ bø̀n ráì we íe.
Àngnø mà dvrá we bv̀nlì rì vsv̀ngrì kaq vmupvm we bv̀nlì tvrà rì svng àngtaqkèní vgám lún ráà we ínìgø AD (1416) nǿng taq Malatesta taqkèní we wamà svng gvsat vtøl we vhǿm yv̀ngà we íe. St. Joh Capesran àng taqkèní móngdàn mòngzø̀l lv́m tvrà nvng shvrv́m shvrá shìlv́m tvrà dvpvt dì ráì wekvt àng kaq svng rvgaq vdòng dvjáò we gø vhǿm yv̀ngà.
Wedø rvgaq tung vdòng rúng vdu we rvtø̀ taq àng vdè tiqgóng nøt mvsø̀n rì svng gø shvlá wa dvtøp shì lún ráà we íe. St. John Capistran nø we shvrà kèní pø̀í chv́ngshì nø lut shì lún yv̀ngà. St. John àngò yøpnv́ng shø̀ngran taq vtánshì ráì we St. Francis ò kàtāwe taqkèní mònggv̀n rvgaq svng bvttut káng lv́m nøt rvt shì yv̀ngì.
St. John Capistran nø àng tung shi mvrung dvgvp Peru mvgàmcè tiqmè nvng dø̀ngku shvzøng shì yv̀ngì wegø íe. Ínìgø welòng døngku shvzøng shìwe tvrà svng cvtnò nø St. John svng Francis shvrúng shú mvdò svng zv́ngshì lv́m dvtú yv̀ngà. We rvtø̀ taq St. John nø lvpat (31) nǿng íyv̀ngì. Ciana wamà kèní St. Bernardine nø̀ àngò shølshú svra tiqgǿ íyv̀ngì.
St. John Capistran ò zùng rúng rv̀m nvng tiqpè íwe Yaku taqkèní 40 nǿng døp St. John Capestran ò dvbushvng bv̀nlì tvrà taq tubúmā ráà wegø íe.
St. John Capistran nø St. Bernardine nvng dvbùshvng bv̀nlì taq 9 nǿng døp cv̀n bǿì mèpvng AD 1425 nǿng taq Shvrúng shú vya svng kv́mshì lún yv̀ngà. We mèpvng Italy móngdàn ò myuq gvbà rì íwe shvrà vrv̀m rì taq àngò dvbùshvng mòngkà svng dvshvr ráà we íe.
We rvgaq taqø St. John Capistran gvzà bø̀ngshvng ráì nø àngtaqkèní noqngø̀m tø̀ngnø vtáng lvp shvrà rì taq vsv̀ng go rø 20000 nvng 30000 gǿ rvzé høq dvkǿm shìlún we shvrà rì taq mòngkà dvshvng yv̀ngà. Italy móngdàn tìbo lvp vlwe Brescia myuq taqgø vsv̀ng 126000 gø svng Latin dvcì kà kèní mòngkà túnā nø kà tvleā yv̀ngà.
Àngí mòngkà tun lú:ngò we rvtø̀ taq záyv̀ng ziqyv̀ng àngpv̀n pv̀n gø shvzǿmā we ínø àngò shvngkà rì nø móngdàn vtv́ng rì svng gø vshvng yv̀ngì we íe. St. John Capistran nø St. Bernardine døni kàngpè Yesu ò ngór dvgùng svng shvring shvta we dang rì kèní gvzà bø̀ngshvng wegø íe.
St. John Capistran svng AD 1426 nǿng taq Svrabín koqkv́m nvng singwe gùn dvtøp shú tiqgǿ ku dvtú ráà nø Italy móng Sisly zø̀nlung rì taq vshvr we vléshì we kv́mnøt tvrà rì svng dvcøp nø̀ tvrà shvdøngā ráà we íe.
AD 1431 nǿng taq St. John nø Franciscan shvrúng shú mvdò ò shølshú vgo tiqgǿ bø̀n yv̀ngì nø Buhemia, Autria, France, Poland nvng Palestine móngrì kaq svng Svrabín koqkv́m vbat 4 bat høq Svrabín koqkv́m gvsa ku bv̀nlì ri we tiqgǿ gø íyv̀ngì.
Constantinopel vrø̀l bǿì mèpvng AD 1453 taq àngtaqkèní Hangary nvng Europe móngdàn rì svng shvrv́m lv́m nvng Turkey svng gvsat lv́m dvpvt cìldvp taqgø shølshú tiqgǿ ku dvzaq shì yv̀ngì we íe.
St. John Capistran nø Hengary dvcì rì dvhø̀ taq Curses mvjàn svng vrìng yv̀ngà. Àngtaqkèní mvjàn vgwé pa svng shøl nø Yesu wurgáng hang svng hàngò taqsórí mvjàn svng jórlún høq shvre tiqgǿ wáshì yv̀ngì. We mvjàn 3 shvlá vle bǿì mèpvng nø St. John tiqgǿ lvpat zíshì vdu yv̀ngì.
