Shvngbe mvdvm Vkangpè Yesu Gvray mongzøl lòng vtoshì laqlúnì. Shvngbe svng Pamvra.
Shóngshø’ng we pèmè vnvmchvngmaq, Ya lvban nø Vkangpè Yesuò Sha nvng Shvwi Kàgvp Bóy (Solemnity of the Body and Blood of Jesus Christ) lvban àngni íē.
Ya lvban taq Rø v-du we Gvray móngkà jømciqrì:–
(1) Esaya 6:3-6.
(2) Roma 4:18-25.
(3) Mati 9:9-13 vdòng taqkèní íē.
Vpø’ íwe pèmè vnvmchvngmaq,.. Dvrá dvshat 8:2-3,14-16 …… Moshi í Israel dvcirì svng shø’n we taq, Ejip móng, Vshuq lvpat yv’ngkèní Gvray gvsang ínø kadø wā chutchvng lòng svng dedvmnøng, wā shvdøm ya:ngà.
1Korinhtu 10:16-17 ……. Nøngmaq nø mvmè luqì nigø, wè Muk lòng mv’ng nø tiqlòng wā íe. Vrá nø Muk tiqchang svng wa Mv-ngu á:mì rvt, Nøngmaq nø Shagóng tiqlòng wā íshàe, wā Dvzvr Polo í korintu shvngømré rì kaq svng shvri we móngkà taq gø shvdømè.
Yohan 6:51-58 … “ Ngà nø Muqlang kèní døngdaq nga we Cúnshøng we Gønshaq Muk ǿngàe.” wā Vkangpè Yesu shø’nè.
Vpø’ íwe pèmè vnvmchvngmaq Dèni Shànshér we Vkangpè Yesuò Sha nvng Shvwi Kàgvp Muk bóy svng Catholic shvngømré kèní mvsat shì nø wáshì we lvban àngni íe.
Shóngshø’ng we pèmè vnvmchvngmaq Vkangpè Yesuò Sha nvng Shvwi Kàgvp “Bóy” angni wā mvsvtshì nø, Kv’mnøntní, Noqngøm shvgùn shvring shì lúngì tvrà nø yadø íe. Svrabyín Koqkvm Pope Urban IV pè wà pè taqkèní (1264)nøng taq Dvrá shang Vkangpè Yesuò Kàgvp Muk bóy svng wàlvm rvt Kà dvkvng yangà. Svrabyín Koqkvm Pope Urban IV nø Gvray Paqzi langlì St.Thomas Aquinas svng Vkangpè Yesuò Sha nvng Shvwi íwe, Shànshér we Vkangpè Yesuò Kàgvp Muk Sacramentu svng shvgùn shvring we Mvkun Zaywa rì svng vrù nø mv’n dvzvr ya:ngà. Vzàng kaq nø, “Corpus Christi” Bóy wànø tø’ yangà we íe. Ya Kà nø Latin Kà taqkèní íē. Kristuò Góng Kàgvp bóy wàwe àng lvjøm íe. Ya bóy svng AD. (13) Yá mvzøq rvwe dung taq Fransik Móng (France) taqkèní wá pvngshì lú:ngì we íe. Catholic shvngømré móngdàn rì shvngbe taq, Vkangpè Yesuò Sha nvng Shvwi Kàgvp Bóy svng, angni tiqni ku vpø’ shvring nø Noqngøm lvm 1264 nøng taq mvsatnò nø wá pvng lú:ngà we íe. Vkvtdø Vkangpè Yesuò Kàgvp Muk Bóy wá pvngshì lúngì tvrà mvshøl svng èyvng lúngò dvgvp gø, Kàgvp Muk taq Vkangpè Yesu nø Jø’ngjøngni vlē walòng svng jór pòngbang gømlā rì taqkèní gø dvtánò rvt íe, walòng svng shálúnshìe.
Wè dø tiqdvchá Dèni Vkangpè Yesu Kristu svng Kv’mì we, vtoshàì we shvngømré rvzvngcerì shvngbe taqkèní gø Pvlàcè gønshaq Vmpà íwe Vkangpè Yesuò Sha nvng Shvwi Kàgvp Muk svng vpø’ shvring ínø Kvmnøntní vtoshàì sórí Noqngømì lòng íe.
Vrá nø, Kagø’ nø vgo i mà?
Vkangpè Yesu Kristu wā Shvngbeo rvwe ( center) nvng vgo íe. Vkangpè Yesu Kristu nø kadø wā nøngmaq nvng tiqdø vlē mà? Shànshér we Kàgvp Muk taqkèní Vkangpè Yesu nø Nøngmaq nvng tiqdø vlē. Shànshér we Vkangpè Yesuò Kàgvp nø Shvngømréò mvdøng mvsøn nvrøm (center and heart of Church) gø íe. Nøngmaq Kvmnønt tvrào vløm ra mvdøng angké lòng gø íe. Muk nvng Brimti svng Missa Kàgvp nóngshì dvgvp, Shànshér Pvlàcèo jór nònggùn kūnga vzàm taq, Yesu Kristuò Sha nvng Shvwi svng Shvmv’n nø shvbø’n we í, vtoshì lúnìe. Wèlong svng Shànshér we Vkangpè Yesuò Kàgvp Muk wā shø’ni lòng íe. Shànshér we Kàgvp Muk nvng Yesu nø vwál mà shvla, tiqlòng wā íe.
Gønshaq Muk (LIVING BREAD)
Vpø’ íwe pèmè vnvmchvngmaq,
Vkangpè Yesu Kristu í Shiwa vsvng mvngpòng mvrdvng yv’ng mv’nò we taq, Ngà nø ” Gønshaq Muk” ǿngàe wàe (Yh 6:51a). Yalòng Mongkà kèní, Yesu ínø Muk Bungà Chàng nvng Ngā vní go svng Shvmv’nò sórí, Shiwa vsvngrì Bungà kíng mvdvm shv-vmò mèpvng shøn we Kà íe. Yalòng Dālvm lvmik gømlā svng yv’ng lún bø’à mèpvng, Shiwa vsvng mvngpòng ínø téwa Yesu kaq svng lá man lúngà. Íwe tiqmaq í nø, Vmpà vm lúnlvm nvng Lvmik gømlā svng yv’nglúnlvm dvpvt wā shvrúngè. Vrá nø, Shiwa vsvng mvngpòng svng shø’n we taq, ” Ngà nø muqlàng kèní la daqà we cúnshi we zidòng lòng ǿngàe. Zidòng yalòng v́m bǿò gǿ nø dvciq lvpat cúnshìlv́m íe.”(Yh 6:51).
Yalòng nø “Ngà Sha íe” wàe
“..Vrá rvgaq tø̀m vsvng gø̀nshaq cúnshilv́m dvpvt Ngàí zílv́m Zidòng lòng nø, Ngà sha íe,” a:lòe. (Yh 6:51b). Shiwa vsvng mvngpòng ínø Yesu shøn lòng svng mvcí:ng mvràlò. Dvtut Vkangpè Yesu shøn we taq, ” Ngà sha ke nø Ngà shvwi aq vsvng wegǿ nø dvciq lvpat gø̀nshaq Cúnshì lvm íe,” wàe.
Vrá nø, Vkangpè Yesu shøn yangì Kà svng v-ní Wál vwál shvlàe
Wèlong nø, ” Kvmnøntní Ngào Sha svng vm nø, Ngào Shvwi svng gø èaq “, walòng íe. Vkangpè Yesuò Mongkà svng vtō nø Kv’m lòng nø Kvmnønt lòng íe. Àng Sha svng ke nø Shvwi svng gø aq shì lòng nø, Cúnshì we Gønshaq Muk svng á:mì lòng, vtoshàì lòng íe. Catholic shvngømré me taqkèní shvngøt dvtú we taq, Shvrúngshú Wajau, Svrado, Svrabyín taqkèní Shvmv’n nø shvbø’n we Muk nvng Brimti taqø Vkangpè Yesuò Sha nvng Shvwi jø’ngjøngni, vlē walòng íe. Wèlong svng Shànshér we Vkangpè Yesuò Kàgvp Muk wā shø’ni lòng íe. Shànshér we Vkangpè Yesuò Kàgvp Muk svng Kvmnøntní vtoshàì lòng nø, Pvlàcè Vmpà á:mì lòng, àng nvng tiqdø vzømì lòng íe.
Wervt, shóngshø’ng we pèmè vnvmchvngmaq, Vkangpè Yesu Kristu svng Kv’mì nø, angí zi we Muqlang gønshaq Muk, Pvlàcè Vmpà svng vtoshì lúnì kvtwā dvciq lvpat Gønshaq Cúnshì lúnlvm íe, Àng nvng tiqdø bóngzøp wáshì lúnlvm í daqè. Wervt Vkangpè Yesu Kristuò Kàgvp Muk svng vpø’ shvring nø vtoshì taqsórí Pvlàcè kvmnønt nònggùn kūnga lùshì laqlúnì.
Vrá nø, “Shànshér we Kàgvp & Missa Shvrúng Nóngpà” Gønpaq dang dvtit tvle mvyø’è.
Shànshér we Kàgvp Muk Tvrà svng èshøn lúngò dvgvp, Missa Kàgvp Nóngpà Shvrúngshì lòng nvng tiqdø shø’n v-dùe. “Ngà svng dvdv̄m rǿnlvm rvt yadø èwànø̀ng,” (Lk 22:19b). Vkangpè Yesu àng íni shøn yangà, bvnlì døngja shvri dø tiqdvchá, cvndvgøm shì lòng nø Missa Kàgvp nóngshì lòngni íe. Vkangpè Yesu Nvmlat kèní shøn we taq;.. Ngào Sha nvng Ngào Shvwi svng aq ràe, wā dvkv’m nø shø’n lòng svng Yuda vsvngrì í mvcí:ng mvràlò. Vkangpè Yesu dvkv’m Kà svng, Shiwa vsvng mvngpòng ínø Nønt yv’nggúng wáshì nø tashì mvlúnò. Lvngdøm taqø, Vkangpè Yesuí Muk nvng Brimti svng Vkangpè Yesuò Sha nvng Shvwi zidong Muk shvbø’nò sórí tvlíngò nø zíòe.
Vpø’ íwe pèmè vnvmchvngmaq, ” Ngà svng dvdv̄m rǿnlvm rvt yadø èwànø̀ng,” wànø Vkangpè Yesu shøn yangì dø tiqdvchá, Catholic shvngømré taqkèní dvtut wáshì lòng nø, Mònggvn rvgaq yachang vlēvm nī høq íe. Shànshér we Vkangpè Yesuò Kàgvp Muk svng vshøm wál ku yv’nglúnshìe.
Wè rì nø:-
(1) Yesu jø’ngjøngni vbáè.
( Real presence of Jesus).
(2) Nóng we shvrúng nóngpà lòng íe (Sacrifice).
(3) Zi we Pvlàcè Vmpà lòng íe(A meal). Shóngshø’ng we pèmè vnvmchvngmaq, Nøngmaq Missa Kàgvp nóng we Noqngøm rvtø taq lúmì lòng nø, Yesu svng Noqngøm lvm dvpvt nvng Àng svng vtoshì lúnlvm dvpvt íē.
Nøngmaqí shø’ni we Shànshér we Vkangpè Yesuò Kàgvp svng English Kà taqkèní nø Eucharist wā tø’shìe. Yesu nø wè Eucharist taq jø’ngjøngni vlē. Nøngmaqí ni vrvm Missa Kàgvp nóngì we, Muk nvng Brimti taq Yesu nø Nøngmaq yv’ng svng dìe. Yesu nø Nøngmaq svng kadv’ngte shóngwámshìe, walòng svng Missa Nóngì we taq dvdvmìe. Wurgang mvdvmø gønshaq dvbø’nshì nø Shvwi vshòr bø’ì we Vkangpè Yesuò Shvwi svng dvdvm mà ná vpø’ shvring ínø oqā wàì lòng íe. Shànshér we Vkangpè Yesuò Kàgvp nø, Nøngmaq mvdvm taq vl nø, Tē we, rvnaq we Vkangpè Yesuò shóngnønt gømlā í rvt, Shànshér we Kàgvp Muk svng vtoshàì dvgvp, Sher we Kvmnønt, shóngnønt, Vpø’ Nønt, Cìpshì we Nønt mvsøn vdòng taqkèní vtoshì ràe.
” Vkangpè a, Na ngà Chøm vdòng gòng lvm rvt, Ngà màpøng; Íni gø Kà tiqkà wā èshø’n, wekvt ngào Pvlàcè shervmè..” wàe.
“Ngà svng èvm we wegǿ gø welòng døni Ngà taqkèní cúnshìlv́m íe ” wā (Yh6:57)taq Vkangpè Yesuí dèkv’mìe.
Vpø’ íwe pèmè vnvmchvngmaq, Vkangpè Yesuò Mongkà svng vtoshì nø Kv’mì lòng nø “Kvmnønt” lòng íe. Àng Sha svng ke nø Àng Shvwi svng gø aq shì lòng, Shànshér we Vkangpè Yesu Kàgvp Muk svng vtoshàì lòng nø, dvciq lvpat Pvlàcè Gønshaq Muk Vmpà svng vtoshàì lòng íe. Wervt Nøngmaq nvng nī vrvm tvpwā vl we Shànshér we Vkangpè Yesuò Kàgvp Muk svng vpø’ shvringì taqsórí, Pvlàcè kvmnønt nònggùn kūnga lùshì laqlúnì,.. wvng dvshat nø nònggùn zí mvyøngè, shvngbe svng oqā.
