Shóngshø’ng we pèmè vnvmchvngmaq, Dèni nø gvzà Mv’ngsher we Vkangpè Yesu Kristuò Sha nvng Shvwi Kàgvp Muk Bóy angni íe.
Dèni Pvlàcè nònggùn lùshì lvm Gvray dvbùshang Mongkà Yohan 6:51-58 vdòng taqkèní íē.
Yesu nø gø̀nshaq zidòng í we
51 Ngà nø muqlàng kèní la daqà we cúnshi we zidòng lòng ǿngàe. Zidòng yalòng v́m bǿò gǿ nø dvciq lvpat cúnshìlv́m íe. Vrá rvgaq tø̀m vsvng gø̀nshaq cúnshilv́m dvpvt Ngàí zílv́m Zidòng lòng nø, Ngà sha íe,” a:lòe.
“Ngàí kàdøng v̄la:tnìni, namaq nø Vsvng Angcè pè Ang sha
mèkénøng, Ang shvwi mèaqnøng nìnø namaq vdòng taq gø̀nshaq màvl. 54 Ngà sha ke nø Ngà shvwi aq vsvng wegǿ nø dvciq lvpat gø̀nshaq v̄le. Vrá, tìsi lv̀ngdø̀m ni taq Ngàí wegǿ svng dvzunlv́m íe. 55 Pàwá wani Ngà sha nø v́mlv́m mvdø̀ng íe; Ngà shvwi gø aqlv́m mvdø̀ng íe. 56 Ngà sha ke nø Ngà shvwi aq vsvng wegǿ nø, Ngà vdòngø v́l dø̄ng nø, Ngà gø ang vdòngø v́l dønge. c 57 Cúnshi pè Vpèí Ngà svng dèzv́r dakngà nø, Vpè taq kèní Ngà gø cúnshø̀ng dø tiqdvchá, Ngà svng èvm we wegǿ gø welòng døni Ngà taqkèní cúnshìlv́m íe. 58 Yalòng nø muqlàng kèní la daqà we zidòng lòng íe. Nvkop nvkàng maq nø Manna v̄m nìgø shì yà:ngì. Inìgø zidòng yalòng vm gǿ mv̀ng nø dvciq lvpat cúnshìlv́m íe,” a:lòe.
Vpø’ íwe pèmè vnvmchvngmaq,
Nøngmaq Bāsha Vsvngrìo lvpat taqø Shagóng nvng shagóng dvkúmshì lvm vm-lvm Vmpà rì ràe. Wè mvdvmø Pvlàcè gønshaq Vmpà téwa vchvk dang ( Dvrá dvshat 8:2-3,14-16. 1korin 10:16-17.Yohan 6:51-58 ) yalòng Mongkà (3)ciq taqkèní dvtánòe. Rvgaq mvgung móngø Israel vsvngrì nø Gvray gvsang kaq vlømshì pàdø, Nøngmaq gø Chutchvng angkang Vkangpè Yesu Kristu taqø rvtø vrvm vlømshì lúnlvm rvt gvzà vchvkngè. Eucharist nø Tóng laqyà tiqlòng wa mø-í. Wèlong nø Nøngmaq Kv’mì lòng svng Kūnga lùshì lúnlvm rvt dvshat we rvnaq we gømlā tiqlòng gø íe. Eucharist Gønpaq rì nvng Mongkà kèní mvbø’n rì svng vtoshì taqsórí Nøngmaqí yvklvmrì vhø’mì rvtø taq í nigø, nøngmaqí vtoshì lúnì we jèjú ìshøt rì vrá dvtøp nø, Pvlàcè lvpat taq Cúnshì lúnlvm dvpvt mvdøng vchvk lòng íwe, dvciq lvpat Cúnshì lún we gønshaq Muk, Kristuò Sha nvng Shvwi gønshaq Muk svng vtoshàì sórí Pvlàcè kvmnønt tvrà taqø Gvray gvsangò Shvmv’n jèjú ìshøt rì svng Rvtø vrvm zøpshì, vtoshì nø, Lvpat taq rvtø vrvm Vkangpè Yesu Kristu kaq svng dòngnønt mvsøn tiqgóng Shvngbeí, Kvmnøntní tvleshì taqsórí, Vkangpè Yesuí zi we Gønshaq Muk Kàgvp svng rvtø vrvm Kv’m shì nø, lvpat taqø Pvlàcè kvmnønt nònggùn kūnga lùshì laqlúni! Amen.
