Shvngbe mvdvm Gvray mongzøl lòng laqtuqdaq. Dèni nònggùn lùshì lvm Gvray móngkà nø Marko 10:46-52 vdòng taqkèní íē.
Nemàn Bartimiu dvbā:nò we
46 Angmaq nø Yeriko mvrìng yv́ng tuq ráì. Vrá Yesu nø Ang coqcv́nrì ó vsvng loksok nvng tiqdø Yeriko mvrìng kèní búngá:mì dvgvp, røtnvm we nemàn tiq pè, Timiu angcè Bartimiu nø tvrà shvnvngø rung dae. v 47 Nazaret pè Yesu dì ráì we a:ngí tá bǿà kvt, “Dawi pvlí pvlaq pè Yesué, ngà svng dvshá èzangàé,” wa vkiqe. 48 Vsvng mvmeí ang svng dø màwá làvl dø ngā:nò we rá dvshàshà vkiq nø, “Dawi pvlí pvlaq pèé, ngà svng dvshá èzangàé,” a:lòe. 49 Wekvt Yesu tø̄nwa rip nø, “Ang svng ègovtnø̀ng,” a:lòe. Angmaqí nemàn pè svng goa:tnà nø, “Shaqshaq wa èvl, èbúng, A:ngí nà svng ègoe,” a:lòe. 50 Wepè nø ang bèlaq zør chutshi dv̀ng tv̀m búng nø Yesu yv́ng svng dì ráì. 51 Wekvt Yesuí nemàn pè svng, “Ngàí nà svng pà wv́ngangnø̀ng?” a:lò ke, nemàn pèí, “Svra pèá, ngà neí yvngshi mvyǿnge,” a:lòe. 52 Wervtnø̀ Yesuí ang svng, “Elo nà kv́mnø:tní nà svng dèzǿm bǿì,” a:lòe. Wela:ngí wepè vneí wà vtán yv̀ng lú:ngà nø, tvrà yvnggùng Yesu mèpvng cv̀n bǿà.
Vpø’ íwe pèmè vnvmchvngmaq
Lvpat taqø tiqlvp vjú zí lún we, Angdèo lvpat taqø vlø’n màshvla we vlún kvng pvn rì nvng vhø’m v-dùe mà? Vkvtdø íwe vlø’n màshvla we vlún vkvng pvnrì Dènio Gvray dvbùshang Mongkà taq, Nē mvyvngshì vsvng dvsháhoq íwe Nēmàn Bartimiu í vtoshì lúnòe. Ang shvnvng kèní léshì nø dì a:mì we, Yesu wa tø’ò vsvng wè pèo Jór Pòngbang dvgùng gùngshang lòng, dvzø’n zøtnà rì svng dvbanò lòng, àng Nē í yv’ng mvlúnò we íni gø tálúnòe. Wervt yalòng vlún vkvng rì svng vwa wa dø màdvzø’m lv’m rvt, vzaqshì taqsórí Vkangpè Yesuò mvré zā lòng svng lúnlvm dvpvt mànar nar vki nø røtnímshì yangì. Vkangpè Yesu nvng tiqdø vbá rì, àng shvnvng yv’ngø vl rì í vgám lòng, vzing lòngí nø Angò vzaqshì lòng svng nar mvlúnò. Lvngdøm taq Vkangpè Yesu Kristuò mvkok dvdí shóngnønt, dvshá zā tùbùm dvban lòng svng vtoshì lúnò nø Nē yv’ngshì yangì. Lvpat taq àngde dvpvt vchvk vtv’ng lòng, lvpat taq vzàng kaq mà-vl mvdaq vl Ra lòng nø pà íe mà? walòng svng shangshang wacè shá lúnlvm gvzà vchvkngè. Shá lúnshì lúng dvgvp gø, àngde shvnvngò vhaq vjvngshì shaq, vtu vgám lòng svng tiqmvlvn we í , àngde svng vjú zí lún pè, Gvray gvsang kaq wā daq v-du ká:m nø røtnímshì, tvleshì lúnì nìnø jø’ngjøngni Nøngmaq lvpat taqgø Nēmàn Bartimiu vtoshì lúnò pàdø Nøngmaq taqkèní vtoshì lúnè vlē , walòng svng dènio Gvray Dvbùshang móngkà taq Shvkse dvtánòe. Shvngbe svng Pmr.
