Mònggv̀nò shìwvtrì svng shvzǿm lúnlv́m dvpvt nø shvnvt mvzørì lángnø mòngzøl we tvrà svng vrang lv́m wawe mvdàm kønmvn tvrà kèní vrashì nø mvtú lá we tvrà svng mv̀ng tóng dvzaqshì lv́m Pope Leo XIV taqkèní dvkám we
Vatican kønmvn gvsa róng (Holy See) kønmvn gvsa àngshv́r rvsvngwe tvyø taq Pope Leo XIV taqkèní mònggv̀n mòngzø̀l lv́m tvrà nvng singwe vchvk we tvrà rì dvtú bǿà.
Mònggv̀n móngdàn vrv̀m kèní kø̀mngǿm ráì we móng kønmvn gvsarì kaq svng dvtú mòngkà taq døngmvnwe mvtú lánø̀ vrashì lv́m tvrà rì cvn cvn wá dvzaq shìlv́m shvnvt mvzørì nvng øpkángwe tvràrì taqkèní mòngzø̀l tvrà svng vrang we dènilaò mònggv̀n dvjà taq tiqmóng nvng tiqmóng nø kønmvn tvrà kèní vtoq vtip nø̀ mvtú lálv́m mòngzø̀l we tvrà svng vrang lv́m vnílvp kèní shvrv́m shvráā shú kønmvn tvrà taq ripwe gvsarì gvzà vchvk bǿì.
Vdè dè vjú lúnlv́m tvrà svng wa nøt vyuq nø bv̀nlì wawe tvrà svng mvwá shàì nø̀ vsvng shvngbeò vjú dvpvt wawe nøt kèní vdu vbóngwe dvrárì cvn dvgøm nø svngpv̀n vko vkángrì svng vpǿ shvring we tvrà wani døngmvn we vsvng lvpat tvrà kèní cúnshì we íe walòng svng síngshá lv́m vchvk we dang shvdǿm we íe.
Mònggv̀n móngdàn rìò shølshú àngké mvdò rì vdòng taq bv̀nlì àng dvlàrì svng vrá rvmø shvnvp lv́m tiqmóng nvng tiqmóng vtù gvsat we, vzi vrùng we tvrà rìrvt mònggv̀n svng zá vtøp dvzv́r we shìwvt tvrà rì svng dvcøp shvnvp lv́m shølshú mvdò rì v́l vdu bǿì.
Vatican kèní kønmvn rì nø mònggv̀n móngdàn vrv̀mò móng kønmvn gvsa rì nvng vzø̀m vzvpnø̀ bv̀nlì wàlv́m gvzà vchvk bǿì. We kønmvn gvsa mvdòrì nø mònggv̀n svngpv̀n dvcìrì shvngbe dvpvt ripā nø bv̀nlì rìwe shvngbe svng shvrv́m shvráā we vzø̀m vzvp dvzv́r we bv̀nlì svng wáā ràwe dang dvkám bǿà we íe.
