(Pentecost) wàwe Shànshér Pvlàcè lashì daqì we bóy, Shvngømré svng shøq we bóy me lvban àngni
“Sunday Homily, Pentecost Lvban”
Shvngbe mvdvm Pentecost Shànshér Pvlàcèò mongzøl lòng vtoshì laqlúnì.
Vpø’ íwe pèmè vnvmchvngmaq, ya lvban nø (Pentecost) wàwe Shànshér Pvlàcè lashì daqì we bóy, Shvngømré svng shøq we bóy me lvban àngni tiqni gø íe.
Dèni nø, Pentecost bø’n bunglúngì, wáshì lúngì mvshøl nvng Pentecost Shànshér Pvlàcè lashì daqì we shvngømréò bóy svng Nvmlat wá pvngshì lúngì tvrà tiqdongce dvtit tvle taqsórí nònggùn zí mvyøngè.
Vpø’ íwe pèmè vnvmchvngmaq,
Yalòng Pentecost wàwe kàru chvng nø, Greek Kà taqkèní di daqì we, lv’ngshì lúngì we Kà íe.. Àng lvjøm nø “(50)ni vhø’m we àngni”(fiftieth)wā tø’ò we íe. Yuda dvcirì nø shvle bóy mèpvng (50)ni/yaq vlévm mèpvngø, Ya bóy svng wáshì we íe. Yuda dvcirì ínø ya bóy svng “Shavuot”wā tø’ yangà dang shálún shìe. Oqā e wàwe Kà àng lvjøm vl we svng shálún shìe. Yalòng Shavuot àngni svng Yuda dvcirì ínø dvdvm mànálvm rvt, mvsat kūmla ku (3) dang gvlshìe.
Yarì nø;…
(1) Mvzi dvyø rì dvkømvm lún bø’ò mèpvng Yahweh Gvray kaq oqā e wā shvgùn shvringòe.
(2) Gvray nvng Kàgvp gvlshì dang íe.
(3) Sina shigung mvdvm Gvray yv’ngkèní Dvrá tiqcé(10) vtoshì lúnò dang íe. Ya bóy nø, Vshøm nøng taq tiqbaq wáshì we, Noqngøm we bóyme taq vbá we bóy gø íe.
Wervt Vpø’ íwe pèmè vnvmchvngmaq, Ya bóy nø vchvk we dang svng dvdvm màná wáshì we bóy í rvt
Yuda vsvngrì í Gvray kaq Noqngøm we tiqnøng vdòng taq, (3) baq wáshì bóy me taq vbá we bóy àngni tiqni gø íe. Yuda vsvng, lvngarérì nø tiqnøng vdòng taq (3)baq Yerusalem mvring kaq svng dì nø Noqngøm ràe, tuq ràe vtong vlē. Bóy me tiqlòng írvt Vsvng mvngpòng dvkø’mshì nø ngør dø wáshì we bóy gø íe.Yadø íwe rvtø lvngcha bóy me tiqlòng taq Shànshér Pvlàcè lashidaqì, Shànshér Pvlàcè dì yangì we íe.
Nøngmaqí Dvdvm lvm tiqlòng (1) lòng nø;–
Shànshér Pvlàcè lashì daqì we Pentecost Lvban taq… Nøngmaq rvzvngcerì shvngbe ínø, Yuda vtong lòng svng cvn nø Pentecost bóy svng wáshì we nø mø-í. Íni gø, Nøngmaqí Síngrà we nø…. Gvray Shànshér Pvlàcè, Shànshér we Gvray angmè Mari nvng Dvzvr rì mvdvmø Gvray Shànshér Pvlàcè lashì daqì we tvrà svng dvdvm màná wáshì we bóy íe, walòng svng shá dvzvr mvyø’è.
Vpø’ íwe pèmè vnvmchvngmaq,
Vkangpè Yesu shøn yangì;- Shànshér Pvlàcè svng dvzv:rà daqìe wā dvkv’m yangì, Kà shvdiq vl dø tiqdvchá Zunbóy lvban mèpvng (50)ni Dèni taqnø Jø’ngjøngni Gvray Shànshér Pvlàcè lashì yangì. Shànshér Pvlàcè lashì daqì rvt nø Vkangpè Yesuí vrvng yangà we, Shvzøng yangà we Shvngømré me nø Ngør dvgùng pòngbang nvng Jórnònggùn dvnzøng nø kømzøp á:mì. Wervt, yalòng Shànshér Pvlàcè lashì daqì we bóy àngni svng shvngømrémèò shøq àngni ( birthday) wā nø gø tøshì we íe.
Mongkà taq;-
(1) Yerusalem taqø mv-ngushì we Coqcvnrì mvdvmø Gvray Shànshér Pvlàcè nø lashì daqì wā shøn yangà (Dvzvr 2:1-11).
(2) Shànshér Pvlàcè kèní nøngmaq shvngbe nø Vkangpè Yesu vdòng taq tiqlòng wā íshà we dang dvtánòe (1Korintu 12:3a-7,12-13).
(3) Vkangpè Yesu ínø Coqcvnrì mvdvmø shaqí vhē:rò nø “Shànshér Pvlàcè svng nàtōnøng” a:lòe. Mvra rì Chutnàlvm vmìng vkang gø àngmaq svng zíòe. Vpè í ngà svng dèzvr dø tiqdvchá ngà í gø namaq svng vrá dvzvrìe a: lòe. Yalòng nø Dvzvrì svng àngò Shvngømré bvnlì døngja rì svng tvlèo we, Vpmò we gø íe (Yohan 20:20-26).
Vpø’ íwe pèmè vnvmchvngmaq, Dèni Shànshér Pvlàcè lashì daqì we Nárni lvban taq, Shànshér Pvlàcèò tvrà svng gvzà rvnaq dø dvdvm vjáng lvm vchvkngè , dvdvm dvzvrè. Shànshér Pvlàcèò Hàng mvsvt gømlā rì, Shànshér Pvlàcèò jèjú gømlā rì, Shànshér Pvlàcèò angshí rì svng nøngmaqí angdungce ku dvdvm mì. Shànshér Pvlàcè nø Trinity taqø Vshøm gø’ tiqgóng taq tiqgø’ íe. Vpè, Angcè pè nvng Gvray (divine nature) taqø tiqdø mv-ngushì lòng íe. Nøngmaq rvzvngcerìò Kvmnønt taqø Gvray tiqpè wā vlē. Íni gø, wè Gvray tiqpè yv’ng ( divine nature) tiqlòng, ( person) àng gø’ ku vshøm gø’ vlē,.. walòng svng ká:mì we íē.
Shànshér Pvlàcèò jèjú Kønpaq rì nø pàlong í mà?( Gifts of the HOLY SPRIRT)
Kadvtutshú pè Esaia 11:1-3 taq Shànshér Pvlàcèò jèjú Kønpaq rì svng (7) dang vrù yangà. Shànshér Pvlàcèò jèjú Kønpaq rì gvzà luqè ( 1Kor 12:4-11). Íni gø (7) pvn svng dvtan mvyøngè ;-
(1) Zitnønt shánønt Paqzí Byinyā ínø,
(2) Záyv̀ng dvbānlv́m gønpaq íe.
(3) Dìngman lòng svng dak rvdoq rvwv̄n shálvm Dvdvm nønt ínø,
(4) Vzaqshi lún we jórnònggùn kūnga shaq rì íē.
(5) Shá vpá:n we jèjú Kønpaq rì ínø,
(6) Dìngman dø Noqngøm lúnlvm Pvlàcè Kønpaq íe.
(7) Gvray kaq vpø’ Svre sha we nønt, Nyan Byinyā…. yarì svng ziè.
Vrá nø, Shànshér Pvlàcèò angshí rì (Fruits of the Holy Spirit) wàwe taqø;-
Shóngnøt, dvbùnøt, mòngzø̀lnøt, nøtyv̄ng nøt, mvkok dvdí nøt, nøtshvlá nøt, nøttǿng kv́mvm vrvm we nøt, køn nøt, vdè góng svng øpdv́ngshì we Nønt, yarì íe(Galatia 5:22-23). Yalòng Pvlàcè angshí rì svng, Nøngmaq taqkèní gø Gvray Dvrá móngkà rì cvndvgøm shvdik shì nø, Cunshaì we lvpat taq yv’nglún shì lòng nø, Shànshér Pvlàcè lvpat taqgø Cúnshàì lòng íe, walòng svng dvdvm nø nònggùn lùshì ra íe. Nònggùn lùshì dvzvrè.
Vrá nø, Shànshér Pvlàcèò Hàng gømlā (Symbols)rì nø;-
(1) Svmi mv’làm taqkèní dvtánshì we, Dvzvr 2:1-4
(2) Nv̀mbø̀ngmè vhershì ra dø muqlàng kèní shaq tiq lòng dvraq daqì dang, Dvzvr 2:4, Yohan 3:8
(3) Gvray Pvlàcè nø kāø dø lāshì daqì, Mati 3:16
(4) Cúnshi tì angwàng vyø̄ we gømlā,(water) Yohan 7:37-39.
Vrá nø, Dvgá dø dvzik (seal), só nvmàn(oil) nvng gø Shànshér Pvlàcè Hàng gømlā dvtanòe. Ìshøt lún we jèjú gømlā rì svng ziè. Yalòng svng Vtoshì dvgvp, shvmánshaq íwe Shànshér we só svng lvngshì lòng nø, yalòng àng lvjøm rì svng dvtánshì we íe. Vkangpè Yesuò Sasvna bvnlì dvpvt dvgø’shì lòng ànglvjøm rì svng dvtàn lúnlvm dvpvt, Pvlàcè taq mà-mø’l mà-mang we dvzik svng shvgvpshì lòng vtoshì lúnè.Tìløp kámshì lòng, (N-gunshaja) Shànshér Pvlàcè Kønpaq vtōshì lòng, Zā vsvng dvban nø mvtnà we só, yarì shvngbe ínø jór kūnga lúnè, shiqshàn lúnè…. Vkvtdø Ànglvjøm Pvlàcè ìshøt rì vbá we íe.
Vkangpè Yesuí nø, Dvzvrì dvpvt vjúrøtnà we taq, Vpè a, nào dìngman lòng taq dvshàn dèshé:ràò, Na Mongkà nø dìngman lòng íe, wā vjúrøtnàòe (Yohan 17:17).
Iwe Vpèí Ngà bø̀ng taqkèní dvzv́rlv́m dá:nò we, nøt shvlǿmshú Shànshér Pvlàcèí namaq svng Shvngbe shèngøtnvtnøng nø, Ngàí namaq svng dvtá bǿshà rì ídv́ngte gø dvdv̄m rǿn dèzv́rvtnønge, wā Vkangpè Yesuí dvkv’mè (Yohan 14:26).
Wervt, Kristu vdòng taq Vpø’ íwe pèmè vnvmchvngmaq, Vkangpè Yesu Kristuò dvkv’m Kà, lvpkà, Shànshér Pvlàcè Jèjú Gønpaq Talen svng vtōshì lún yangà we Shànshér we Maria nvng Dvzvr rì, Kv’m vsvngrì svng dvdvmì taqsórí Pvlàcè kvmnønt nònggùn kūnga lùshì laqlúnì.
Shvngømré taqkèní zi we (Sacramentu) Pvlàcè jèjú Gønpaq ìshøt rì svng vpø’ shvringshì taqsórí Dvzvrì dø lvpat be ni høqshaq Shvkse wáshì nø Kvmnønt shvdø’ngshì laqlúnì. Vkangpè móngdàn dvpvt Shvkse wáshì laqlúni wvng dvshat nø nònggùn zí mvyøngè. Shvngbeí Pentecost Shànshér Pvlàcèo Gvray Mongzøl lòng, Pvlàcè kvmnønt ìshøt vtoshì laqlúni. Shvngbe svng Pamvra.
