Regina Caeli vjúrøt tvyø taq Pope Leo XIV taqkèní dvtú mòngkà shøn bøà we
Shóngshøngwe vnvm vchvng maq Solemnity of the Ascension of the Lord Yesu muqlàng svng ngvngá:mì we bóy svng mònggvn døngí wàì we íe.
Dvzvr 1:1-11 taq vtánshaq íwe dø tuqdvchá Yesu muqlàng svng ngangá:mì we dàlvm mvshøl shøp nø nøngmaq taqø kadvgvp gø køqzøl rà àngnvng tiqdø vzøm lvm tvrà tiqlòng ni íráì.
Yesu muqlàng svng ngàngá:mì we tvrà nø nøngmaq bashàrì shvngbe gø làngdøm àngni taq Yesu àng vrá tuqra nø nøngmaq nvng tiqdø we shvrà svng vrá loá:mì we tvrà vlrawe írvt dvgøshì we íe.
Yesu vsvng shagóng lushì nø rvgaq mvdàm tuqráì we tvrà nø bashà vsvngrì kaq mvrà døng kèní chutchvng lvm tvrà svng diwe íe.
Yesu Kristu ò ngànshà pè, mvrà døng kèní jòr we Easter Victory svng vsvng shvngbe dvbú dvzvr we mvtaq vsvng shvngbe svng gø we jór nvnggwòn kù:ngà èzíì we íe.
Yesu muqlàng svng tuqá:mì we nø nøngmaq nvng kadvgvp gø vtoq vtip shìnø tvrà ètóngāì we íe
Yesu muqlàng svng nga:ngá:mì we mvshérpvrá svng àngmè Mari nvng shvnshér vsvngrì mvme taqkèní gø svkse dvtanā ráshà we íe
We dangrì svng dvda:mì nø nøngmaqò lvpat tvrà, pvlàcè lvpat gø dvciq lvpvt gønshaq svng vtoshì lúlvm dvpat tìløp kámshàì nø nvmlat nvmpvng mvrà svng chutshì bøì mèpvng gø muqlàng svng lo lúnlvm dvpvt àngí shèngøt ràshàwe cvndøng tvrà rì svng cvn dvgøm dvzaq shì lvm laqni vchvk íe. Wekvt wa dvciq lvpvt gønshaq svng mulàng móngdàn taq vtoshì lún lú:ngìe.
Dèni taq World Communications Day svng mònggvn døngtáng shvrà vrvmø wáshì we àng lvjøm nø Yesu muqlàng svng ngaá:mì we màná dørø svng vrá tiqkvt nønt mvsøn kèní dømshá lvm dvpvt íe.
Tuqrawe mèpvng lvbán kèní nø Laudato Si’ lvbán svng tuq bøì nø ya lvbán vdòng taq nøngmaq shvngbe nøt mvsøn taq Yesu muqlàng svng ngang we tvrà shvngbeí dvdam shàì nø pvlàcè tvrà taq dvgøshì lvm íwe dang shvdøm bøà we íe.
