Dèni rø v-du we Cúnshì we Gvray móngkà nø Yohan 21:15-19 vdòng taqkèní íē.
Yesu nvng Piter
Angmaq sháng v́mpà v́m bǿì dá:ngí, Yesuí Simon Piter svng, “Yohan angcè Simoná, yarì mvdv̀mø té Ngà svng nà èshóngshìe ma?” a:lòe. A:ngí ang svng, “Íe, Vkàngpèá, ngàí Nà svng shòng* we Nàí èshángae,” a:lòe. A:ngí ang svng, “Ngà vyv̀ngrì shèv́māngà,” a:lòe. h 16 Mèpvng vrá tiq kvt Yesuí ang svng, “Yohan angcè Simoná, Ngà svng nà èshóngshìe ma?” a:lòe. A:ngí Ang svng, “Íe, Vkàng pèá, ngàí Nà svng shòng* we Nàí èshángàe,” a:lòe. Yesuí ang svng, “Ngà vyv̀ngcèri èrokngāngà,” a:lòe. i 17 Vshø̀m kvt wakvt Yesuí ang svng, “Yohan angcè Simoná, Ngà svng nàí èshònga* ma?” a:lòe. Yesuí ang svng vshø̀m kvt wa kvt, “Ngà svng nàí èshòngà ma?” a:lò rvtnø Piter nøt dvshà lú:ngì nø Ang svng, “Vkàngpèá, í dv́ngte shvngbe Nàí èsháoe, Ngàí Nà svng shòng we nø Nàí èshángàe,” a:lòe. Yesuí ang svng, “Ngà vyv̀ngrì shèv́mangà. j 18 Ngàí nà svng kàdøng v̄lvtnøng, nà gùchàngré èí dvgvp nø, nà nø nà wa juqnv́m ènv́mshì nø, kayv́ng di mèyǿ nìnø weyv́ng dí èlú:nòe. Iwe nà cèrǿng ra dvgvp nø, nà wur nàgàng nø, Vsàngí nà svng juqnv́m ènv́mavt nø, nà di mèmèyǿ yv́ng svng èshøl bø̄e,” a:lòe. k 19 (A:ngí yadø shø̀:nò we nø, Piter nø kadødø shì weí Gvray ngø̀r dvgùng shvring lúnlv́m í we gø̀mla dvta:nò kà íe.) Yakà shø̀n bǿà dá:ngí Yesuí ang svng, “Ngà mèpvng ècv̀n ra,” a:lòe.
Vpø’ íwe pèmè vnvmchvngmaq,
Gvrayò Shóngnønt Svmi nø Nào Nønt mvsøn vdòng taq vcór e mà? Gvray nø shóngnønt ínø, Angò shóngnønt gø shvdun mvlúnshì we dvciq lvpat Dø’ngvng we shóngnønt íe. Dèni Kristu í dvzvr Piter kaq pàrvt Ngà svng èshóngàe, wā Vshøm (3)baq høq røtnò e mà? Vkangpè Yesu svng vsvngrì mvrdvng yv’ngø (3)baq høq māò we dvzvr Piter, ídv’ngte shvngbe svng langò nø Gvray gvsang móngdàn dvpvt Vyvng roqshú shvlá wáshì lúnlvm røt Kà ínø, Dvzvrì tiqmaq Vkangpè Yesu yv’ngkèní rálshì we íni gø Àng nø kadvgvp gø mvrálshøng wàwe Dvzvr Piter dvkv’m Kà gø íe. Vshøm baq wà baq taq Cìpshì we í dvzømshú ku Vkangpè kaq shóngshø’ng we èshángàe wā Cìpshì we shóngnøntní dvzvr Piter vtánshìe. Nøngmaq gø rvtø vrvm shaqcvmì we íni gø, Mvra v-li we íni gø pvn vrvm ídv’ngte shvngbe mvdvmø Gvray gvsang kaq shóngwámshì lvm rvt ègō íwe Mongkà gø íe. Shànshér pe Augustine’s shøn yangì we taq, Gvray gvsang kaq vlé á:mì mèpvng wā vtoshì lúnòe wā shø’n yangì. Wervt Oh.. Gvray gvsang e nøngmaqò Nønt mvsøn bvngka rì svng Vkangpèo shóngnøntní Tá:nà nø, Tiqdvng vsvng kaq mvshóngshì, dvshá zā Nønt mà-vl lòng, Oqā wá màsháì lòng, mvsher lòng nvng Vkangpè àng Nønt i lòng svng vtu vgámì rì shvngbe svng dèshérà shà wàì nø Kv’mnøntní vjúrøt tvleshì laqlúnì shvngbe svng Pamvra.
