Shóngshø’ng we pèmè vnvmchvngmaq Dèni tashì lvm Gvray dvbùshang Mongkà nø,Yohan 17:20-26 ciq vdòng taqkèní íē.
Ya mvdò dvpvt wa Ngàí røtnangò we mø̀í, angmaq kà taqkèní Ngà svng kv́m ra rì dvpvt gø røtnangòe. r 21 Ngà nø Nàí dèzv́r dakngà we svng rvgaqí kv́mlv́m rvt, angmaq shvngbe nø tiq lòng wa ívm nø; Vpè Nà nø Ngà vdòng taq èv̄l nø, Ngà gø Nà vdòng taq vl dø, angmaq gø Nøngmaq vdòng taq v̀llv́m dvpvt Ngà røtne.s 22 Vrá, Nøngmaq nø tiq lòng wa íshà dø, angmaq gø tiq lòng wa ílv́m rvt, Nàí Ngà svng èzǿng yv̀ngà ngø̀r dvgùng nø angmaq svng zǿng bǿngà. t 23 Ngà svng Nàí dèzv́r dakngà we nvng Ngà svng Nàí èshònga dø tiqdvchá, angmaq svng gø wedøni vshóngshaq Iwe svng, rvgaqí shálv́m dvpvt Ngà nø angmaq vdòng taq v̄l nø, Nà gø Ngà vdòng taq èvl yv́ng kèní, angmaq nø tiq góng tiqnøt taq wa kø̀mgøm vrv́m vrálv́m rvt Ngà ngø̀r dvgùng angmaq svng zǿngòe. u 24 Vpèá, Nàí Ngà svng vzíshaq rì angmaqí, Nàí èzǿngà we Ngà ngø̀r dvgùng yv́ng lúnlv́m dvpvt nvng Ngà vl yv́ngø angmaq gø v́l lúnlv́m lòng svng Ngà shònge. Pàwálv́m wani rvgaq angké shini màshvzøngshaq vzv̀ng kèní Nàí Ngà svng èshòngae. v 25 Døngman pè Vpèá, rvgaqí Nà svng mèshá nìgø, Ngàí Nà svng shánge. Yarìí gø Ngà nø Nàí dèzv́r dakngà we svng shá bǿà. 26 Nàí Ngà svng èshòngà we shóngnøt angmaq vdòng taq v̀llv́m dvpvt nvng Ngà gø angmaq vdòng taq v̀llv́m dvpvt, Nà bø̀ng nø Ngàí angmaq svng shá dvzv́r bǿngà. Tv́n gø shá dvzv́rlv́m íe,” wae.
Shóngshø’ng we pèmè vnvmchvngmaq Vkangpè Yesuí nø dèni Yohan Dvbùshang móngkà taq, Angò jór pòngbang dvgùng gùngshang lvm rvt Dvzvrì dvpvt nvng Gvray kaq Kv’m we rvzvngcerì shvngbe dvpvt vjúrøt dvbvng lòng svng yv’nglúnshìe. Vrá nø Dènio Gvray Dvbùshang móngkà taq V-rvm vrá lvm nvng shóngnønt, Vpè Gvray gvsang nvng Angce pè Gvray dvhø vdòng taqø vl we rvnaq we vzøm vzap lòng svng dvtánòe. Vkangpè Yesu Kristu mvdøng Àng Nønt shvrúng lòng nø pà lòng i mà? V-rvm vrá lòng nvng Muqhøm vzøm vzap lvm lòng íe. Vkangpè Yesu Kristu shvrúng we V-rvm vrá lvm lòng nø mvdvm dhvlē wā mø-í, Gvray gvsangò Shóngnønt nvng Døngman we Dvrá lòng mvdvmø mvdøng mvtú shì we Dìngman we V-rvm vrá lvm lòng íe. Vkangpè Yesuí vjúrøtnò lòng nø tiqgø’ dvpvt wā chutchvng lòng lúnlvm rvt wā mø-í nø, Kv’m we, noqshì we rvzvngcerì vdòng taq vl we shóngnønt lòng, V-rvm vrá lòng yv’ngkèní Mònggvn rvgaq ínø Gvray gvsangò Shóngnønt lòng svng síngràl lúnlvm dvpvt nvng Gvray gvsang jø’ngjøng vl lòng svng síngràl lúnlvm dvpvt íē. Shvngømré me Dinggvng nø V-rvm vrá mongzøl lúnlvm dvpvt Nøngmaq taqø bvnlì døngja V-pvtnì pàdø vjúrøt dvbvng laqlúnì.
