May shvlá 13 ni Fatima Mari bóy àngni taq Pope Leo XIV ò dvtú mòngkà
13 May 2026 ni taq wáshì bøì we Fatima Gvray àngmè Mari bóy ni taq Pope Leo XIV taqkèní Mariò mvshøl shøp rìnvng shvngømré vdòng àngdang nvmg singnø kadø vchvk we tvra dvng dvtú mòngkà shøn bøà we íe.
Shvngømré dvpvt Gvray àngmè Mari nø shvbóng shvmvtshì rà àngmè tiqgø íwe dvng dvtú we íe. Rvcángcè tiqgø ò lvpat tvrà taq shvngømré svng kadø shóngshì ràwe nvng Gvray bvnlì tvrà taq kadø dvzøm dvzaqshì ràwe dang àngmè Mari yvngkèní cvnshì ràe wanø dvtú we íe.
Mari nø Gvray dvkám kàsvng cvndøng nø Gvray kàta we ínø Gvray àngò tvrà taq kám vlømshì we rvcángcè rìò pvlàcè dvng dvsháza mvkokā lvm ìshøt jejú rìsvng dvtit tvlē vjúrøt dvzaq shì we gø íe.
Mari nø shvngømré dvpvt jvmnā tiqlòng gø íe. (II) Boq waboq Vatican lìpùngmèò mvsat dvrá íwe Lumen Gentium taq Mari dang vtán shaq íe. Mari nø chømyo vjøng, àngmè tiqgø ò shóngnøt, Gvray nvng kàciq wáshì we pvlàcè, kámnøt tvràò shvbóng shvmvtshì rà svmaré, wanø lvjøm vtàn ráà we íe.
Mari nø Yesu Kristu tvrà kèní rvgaq mvdàmø dvgùng gùngshvng ráì nø Gvray ò chutcháng we tvrà svng tvrà tóngā shú tiqgø íe.
Vdè tiqgø taqkèní àngò tvrà svng shvbóng shvmvtshì lvm nvng cvndøng dvzaqshì vdu we dvng Svrabín koqkvnpèí dvtú we íe.
Mari ò nøt mvsøn jàng laqyà dø Gvray dvsháza shóngnøt svng dvgùng shvring shálvm Kristuò coqcvnrì dø bønlún lvm Mari yvngkèní dvtit tvlē vjúrøt shì lvm dvtú we íe.
Kristu nvng tiqnøt wáshàì nø vzøm vzvp lúnlvm, Kristu nø chutcháng pè ínìgø rvcángcè rì kaq àngnvng vzøm lvm tvrà taq Mari nø tvrà tóngāshú íwe svng shvdøm nø vdèò shvngømré svng gø shóngnøtí roqgvr dvzaqshì lvm dvtú bøà we íe.
