Pope Leo XIV taqkèní Roma móng vsvngrì kaq dvkám mòngkà
Roma shvngø̀mré rì kaq Svrabín koqkv́mpè taqkèní Àngmè shvngø̀mré vdòng dvbùshvng bv̀nlì rì téwa vháng vlún lv́m dvkám mòngkà vtàn bǿà we íe.
Mv́n dvmø̀ svng kvm vlǿm shìlv́m
Pope Leo XIV taqkèní Gvray nø rvcángcèrìò lvpat tvrà taq rvtø̀ vrv̀m tiqdø vlwe ínø̀ we mv́n Gvray svng kadvgvp gø kvmnø̀ noqngø̀m lv́m dvkám we íe. V́m-aq vnvt shàì we lvngcha taq rvcángcèrì kaq kv́mnøt tvrà svng tvrà èshølì we tìløp kv́mshì we ìshøt jejú svng vrá tiqkvt lálv́m gø dèkámì we íe.
Vsvngrì shvngbe nø mòngzø̀l lòng nvng vrv́m vráwe tvrà svng tóng dvzaq shìwe vsvngrì bǿn daqwe wa íe. Svrabín koqkv́mpè Roma Torreevicchia taq vlwe Santa Maria della Presentazione svng dvbùshvng zaqlè tvrà vriq bǿà we íe. We shvrà taqø shvngø̀mré vsvngrì, shølshú vgo rì nvng shòlaqré rì nvng vhømnø̀ àngmaq kaq svng dvtú mòngkà rì kèní gø vrìng bǿà we íe.
shòlaqré rì nvng cv̀mrérì nvng vhøm we tvyø taq dvtú mòngkà vtàn bǿà we nø cv̀mré rì nø Kristu nvng vhøm lv́m kadøwa dvgǿ shìrà we nvng yvklv́m shìwvtrì dvhø̀ tiqgǿ nvng tiqgǿ kadø tubúm dvbangke lv́m dang rì vhøm nø dvmvn bǿì we svng shálún shìe. Shòlaqré rì kaq svng mònggv̀nò vzi vrùng we shìwvt tvrà rì svng shvzǿm shvnvp lv́m tvrà rì taqgø dvzaq shì ràwe dang nòngwòn zi mòngkà dvtú bǿà we íe. Vsvng tiqgǿ vrv̀m gø mòngzø̀l we tvrà svng vrang lúnwe vsvngrì wa íwe dang shvdǿm we íe.
Nv̀mlat Kristuò kàgvp svng vtoshì lv́m dvgǿ shìwe cv̀mré rì kaq Svrabín koqkv́mpè taqkèní Kristu nø cv̀mré rì svng shóngshìwe dang mòngkà rì taq yv́nglúnì we døni vdèò dòngnøt mvsø̀n rì taqgø àngsvng shvrà dvgǿā ràwe dang shvngøt dvtú we íe. Kristu nø dvsháza shóngnøt àngkàng íwe vzø̀m vzvpwe tvrà taq rvmjà shvlápè gø íwe rvt kadvgvp gø àngnvng tiqdø vzø̀mnø vl lvm dvkám we íe.
Pope Leo XIV nø Cardinal Beldorina nvng tiqdø we shvrà taq Mass vjúrøt núngkùng gvbà svng gø núng bǿà we ínø̀ kø̀mngǿm ráì we shìwà vsvngrì kaq pvlàcè nùnggwòn ziwe mòngkà kèní vtoshì we tvyø svng gø mòngzø̀l dø wálún bǿà we svng dvtú bǿà. Gvray mòngkà nø vsvng mv̀ngpòngrìò lvpat tvrà dvpvt nvng we shvrà rìtaq vkǿn we shìwvt tvrà rì, mvshv́m hoq vsvngrì, mvhøt lv́m tvrà rì dvpvt gálòng dø wáā nø̀ vsvng lvpat rì svng shømløm we køqzøl rà tiqlòng ku vlǿm rà íwe dang dvtú bǿà we íe.
