Kristu vdòng taq Vpø’ íwe pèmè vnvmchvngmaq Dèni nònggùn lùshì lvm móngkà nø,(Yohan 6:1-15) vdòng taqkèní íē.
Vkangpè Yesuò dvshá zā mvkok dvdí shóngnønt lòng nvng tùbùm dvbvng lòng íwe shvla lòng svng Dènio dvbùshang Mongkà taq, Muk Bungà Chàng nvng Ngā vní go svng Shvmv’nò yv’ngkèní lvmik gømlā svng yv’nglúnshìe. ” Cúnshì we angmaq vl shvra yvngø Gvray gvsangò ring we ìshøt ìgvn svng yv’nglúnlvm vlē, wā Ngà Kv’mè . Shvgùn Zaywa ( 27:13-14)
Kristu vdòng taq Vpø’ íwe pèmè vnvmchvngmaq, Vkangpè Yesuí wà bø’à we dvzøt zøtnà rì svng dvban we, lvmik gømlā rì svng yv’ng lún nø Vkangpè mèpvng vlømshì taqsórí cvn lúngì Vsvng mvngpòng kaq svng yvngò nø mvré zā weí, Gvray gvsang Dvrá móngkà taqkèní Nønt shvløm nø Pvlàcè nònggùn kūnga zíòe. Wè mèpvng Nvmvlē ráì dvgvp Svríbang lòng màhø’mlvm rvt jór pòngbang gømlā taqkèní” Muk Bungà Chàng nvng Ngā vní go ” svng jèjú shvgùn shvring nø ( Vpè Gvray gvsang nvng vzàm vzap jèjú shvgùn we) luqtvm dvzvrò nø, Vsvng mvngpòng svríbang lòng svng Shagóng dvpvt vm-lvm lòng dvkøm dvzøpmaòe. Vsvng mvngpòng kaq svng Shv-am shv-aqò dvgvp Mvshøng we shønriqtøm mvdvmø angí rúng dvzvrò lòng nø ” Mvshøng we shønriqtøm taq mongzøl we shvra taq nøngmaq svng narshì dvzvr lòng íe. Ngà dvpvt Vm shvbóy degø’ngangè( shvgùn Zaywa 23:2-5) vdòng svng dvdvm dvzvrè.
Muk Bungà Chàng nvng Ngā vní go wàwe nø tiqcenøng mvlím cvmréce tiqgø’ò vyvng shaqnar dv’ngte wā íe. Wè cvmré gø’ò shóngnønt, Kv’m nø vlømshì lòng í Gvray kaq vp tvleshì nø vyvng shaqnar svng zíòe. Gvray kaq vp tvle we, mvluq we Muk nvng Ngā nø Dālvm lvmik gømlā vpō á:mì, gvzà luqtvm we ìshøt ìgvn rì í a:mì. Nøngmaq røtnímshàì we mvtú v-rvm taq Gvray gvsangí nø zì we mà-vl nigø, Nøngmaq taq zø’mdvng we, ra vchvk lòng svng Gvray gvsangí nø Tiqlvp kèní mvkok dvdí shóngnøntní tùbùm dèbvng íe. Dvzvr Polo shø’n Kà taq” Gvray ìshøt nø ngà dvpvt luqbø’ngè” wā shø’n Kà nø Nøngmaqò Kà ni í bø’ì. Nøngmaq taq nònggùn kūnga vzàm mà-vl li lòng svng Gvray gvsangí nø nònggùn kūnga dvnzøng we lvpat tiqlòng svng tvlíngàe. Nøngmaq shvngbe gø cvmré pè pàdø Kv’mnøntní vp tvleshàì, Ni vrvm cúnshàì we lvpat taqø shvla lòng, màshvla lòng, shaqcvmì rì ídv’ngte shvngbe svng vp tvleshàì we taq jø’ngjøngni Vkangpè í dvtánò we Jór Pòngbang lvmik gømlā taqø zø’mdvng rì wáshì lúnlvm vlē.
Vkangpè Yesu ínø Muk nvng Ngā svng vmøtnò nø Dvzvrì taqkèní tiqdvtang vsvng mvngpòng kaq svng Shv-am yangà. Yalòng nø Missa Kàgvp nóng we rvtø taq Vkangpè Yesuò Kàgvp svng vtoshàì lòng nvng vbóngè. Shóngnønt svng mvdøng tiqtaq gvl nø dvtit tvleshàì lòng íe. Nøngmaq gø’ v-rvm gø Dvzvrì nvng tiqdø Vkangpè Yesu mèpvng cvn we dvzømshú rì í shà rvt Nøngmaqò Nønt mvsøn vjang laqyà, V-toq V-tip shø’ni we Kà, Dak dvdvm nønt rì taqkèní Vkangpè svng zí lún gø’, Vkangpè Yesuò dvshá zā mvkok dvdí shóngnønt svng dvtán nø dvsher gø’, Shvkse wáshì gø’ wáshì nø cúnshì laqlúni. Amen.
