“Vkangpè Yesu nø Nøngmaq nvng tiqdø dìe, tiqdø vlē, Nē svng tá:nàe, nøngmaq kaq svng wè pàdø dvzvrè.”

Vkangpè Yesu Zun a:mì mèpvng vshøm (3) lvban wà lvban svng gòng bø’shà. Ya lvban rø v-du we Gvray móngkà jømciqrì nø;-

(1) Dvzvr 2:14,22-24.
(2) 1 Piter 1:17-21
(3) Luka 24:13-35

Ya lvban nø, Emmaus rvwa svng dì we Dvzvr vní pèo mvbø’n tvrà taqkèní ègō íwe lvban gø íe.

“Vkangpè Yesu nø Nøngmaq nvng tiqdø dìe, tiqdø vlē, Nē svng tá:nàe, nøngmaq kaq svng wè pàdø dvzvrè.”

Kristu vdòng taq Vpø’ íwe pèmè vnvmchvngmaq,_ Dèni nøngmaqí tálúnì we móngkà taq, Nøngmaq nø shøm wace v-li we íni gø nònggùn kūnga vl we zaqle wang tvrà tiqlòng ínø, Emmaus rvwa svng dì we Dvzvr vní pèo mvbø’n tvrà taqkèní ègō íē, shèdømì we tvrà gø íē. Yalòng tvrà nø nøngmaqò zaqle wang tvrà gø íē. Mvkv’m la Kv’m yv’ngkèní síngràl lúnshì lòng kaq, Nønt yòr lòng yv’ngkèní vløm ra kaq , shøm wace vl yv’ngkèní dvshvngò lòng kaq svng tvlíngà sórí dì we tvrà gø íē.

Kristu vdòng taq Vpø’ íwe pèmè vnvmchvngmaq, Yadang svng mvtú (3)dang taqkèní dvdvm vjáng nø dvshat mvyø’è.

Nvmlat mvtú (1)taq;-
Nøngmaq mvkv’m la Kv’m v-tiq lvm íwe rvtø taq, Vkangpè nø nøngmaq nvng tiqdø tvp vlē.
Luka 24:13-35 vdòng taq, dvzvr vní pè nø Yerusalem myoq kèní búng lúngì. Àngmaq nø Nønt dvt Nønt yòrè, mvkv’m la Kv’m dvtiqshìe. Vkangpè Yesuí nø Israel dvcirì kaq svng chut èchvng daqìe, wā vlømshìe íni gø .. Vkvt nø, Vkangpè Yesu Kristu gønshaq vpnóngshì nø shì yangì. Íni gø, gvzà vpø’ nø ring we jór pòngbang mvbø’n tvrà tiqlòng bø’nbung bø’ì.

Vkangpè Yesu nø àngmaq shvnang yv’ng tuqdaqì nø àngmaq nvng tiqdø dì bø’ì. Íni gø àngmaqí nø Vkangpè svng mà mvshvlò.

Yalòng nø nøngmaqò lvpat mvshøl mvkøm mvtup tvrà nvng gø vbóng sháòe.

• Nøngmaq lvpat taq tvrà vmà:nìe, wā dvdvm shàì rvtø,
• Nøngmaqò vløm ra, tì:n gvyaq nø vcatnvm rvtø
• Vrá nø, Gvray gvsang nø nøngmaq nvng mà-vl wā dvdvm shàì rvtø rì taq íe.

Íni gø, Dìngman Dvrá lòng taqø- Vkangpè Yesu Kristu nø Nøngmaq nvng tiqdø tvp dì bø’ì lòng íe.

Vkangpè ínø angmaqò Kà svng táāòe. Àngmaqò dvshà mvhøt lòng dvtá:nlvm vmíng kvng svng zíòe. Àngmaq Nønt mvsøn vdòng kèní shø’n Kà rì svng Vkangpè Yesu ínø dvhø yv’ngkèní cvtnà lòng mvwào.

Dvdvm lvm ra;-
Nønt dvt Nønt yòr lvm rì vhø’mshì ra rvtø rì taq, Vkangpè Yesu nø nøngmaq nvng tiqdø tvpwā dì íwe íe, wā nøngmaq Kv’mì mà? dvdvm shvlàe.

Mvtú (2)
_ Cúnshì we Gvray móngkà nvng shvrúng nóngpà rì taqkèní nøngmaqò Nønt mvsøn bvngka rì svng tá:nàe.

Tvrà dì we vdòng taq, Vkangpè Yesuí nø Mongkà svng nvmlat pø’:n nø dvshvng pvngòe. Dvshà mvhøtlvm rì vhø’mò lòng nø Gvray gvsangò gvsvt lòng vbá dang àngmaq kaq svng dvtàn yangà. Wè mèpvng shvbóy taq tiqdø námrùng dvgvp téwa dālvm mvshvlpvrá tiqlòng bung yangì.

” Vkangpè Yesuí nø Muk svng lùo sórí Vpè Gvray kaq dvgùng shvring nø vmøtnò weí àngmaq svng zíòe. “
Wèlvng íni angmaqò Nē nø vtán a:mì nø, Vkangpè svng mvshvl bø’à. Yadang nø 1Piter (1:17-21)ciq vdòng vl, rvnaq we Shvngkà àng lvjøm nvng vzømè. Vrá nø,
_ Nøngmaqí nø Shé, gvmsung pàdø vmv’ng sháò lòng í chutchvng lòng svng vtoshì lún bø’shà we nø mø-í.
_ Vkangpè Yesuò vpø’ we shvwi shóngnønt taqkèní le chutchvng lòng svng vtoshì lún bø’shà we íē.

Vkangpè nø, angtiqgóng svng v-ní dang kèní dvtán shìe.
(1) Mongkà taqkèní dvtánshìe,
(2) Muk vmøtnò lòng ( Vkangpè Kàgvp Sacramentu ) taqkèní dvtán shìe. dènila nøngmaq lvpat taqgø Missa Kàgvp vrvm yv’ngø Vkangpè Yesu nvng Emmaus rvwa dì tvrà mvshøl pàdø vhø’mì tvrà gø íe.
_ Nøngmaq nø Cúnshì we Gvray móngkà svng tāshì lúnìe,
_ Vkangpè Yesu Kristuò Kàgvp Sacramentu taqø Kristu nvng vhø’m lúnìe.

Nøngmaq í Dvdvm lvm:-

Ngàí nø Gvray gvsangò Cúnshì we móngkà svng jø’ngjøngni tāshì lúnòe mà? Vtoshì lúnòe mà?

Vrá nø, Vkangpè Kàgvp Sacramentu taqø Yesu Kristu svng Na, ngà í mvshvl lún bø’sha mà? dvdvm shvlàe.

Mvtú (3)
Vkangpè Yesu shì yv’ngkèní vrá Zun a:mì lòng svng dvshvng lvm rvt Vkangpè ínø Na,ngà svng dèzvrè.

Vkangpè Yesu svng mvshvl bø’à mèpvng Dvzvrì ínø dālvm lvmik gømlā rì svng dvtánòe. Àngmaq nø Yerusalem mvring kaq svng tiqdvshaqí lo a:mì. Àngmaq gvzà mvjor, dørøm rvtø gø í á:mì, íni gø vkvtdø dvbù lvm Shvngkà rì svng àngmaq tiqgø’ taqkèní wā Shø’mwace vl nø vgám mvlúnò.Yadang nø Dvzvr 2:14,22-23) vdòng taq, Dvzvr Piter vzaqshì sórí rip nø shø’n lòng svng yv’nglúnshìe.
_ Yesu Kristu nø Wurgang mvdvmø shì yangì.
_ Gvray gvsang ínø Vkangpè svng dvzún yangà.
_ Vkvtdø Vkangpè nø cúnshì we Gvray nvng Mesia chutchvng angkang pè íe. Vrá nø, Dvzvr Piter kaq svng Kapà lòng í vlí:ng vpō dvzvròe mà?

Zun a:mì we Vkangpè Yesu Kristu nvng vhø’m lòng ni íē.

Wervt vpø’ íwe pèmè vnvmchvngmaq, nøngmaq lvpat taqgø wè pàdø yv’nglún lvm vlē.
_ Vhø’m lòng yv’ngkèní vlíng vpō lòng, vlíng vpō lòng yv’ngkèní Sasvna bvnlì wàò lòng,
Vkangpè Yesu nvng Dìngman dø vhø’m lòng nø Rvtø vrvm shvkse wáshì lòng svng tvnuò lòng íe.
Dvdvm lvm:-
_ Nøngmaqò Kvmnønt svng Tiqdvng vsvngrì kaq dvtit tvle lúnì e mà? Mø-í ni Kristu svng angdè tiqgóng dvpvt wa shøpshàìe mà? dvdvm shvlàe.

Dvdøm:-
_ Kristu vdòng taq Vpø’ íwe pèmè vnvmchvngmaq, Emmaus
rvwa svng dì we tvrà taq bø’n bø’ì we mvbø’n tvrà nø nøngmaqò lvpat tvrà ni íē.
_ Vkangpè nø Nøngmaqò mvkv’m la Kv’m v-tiq ra rì taqø tiqdø vlē walòng svng dvdvm dvzvrè.
_ Mongkà nvng Vkangpè Yesu Kàgvp taqkèní nøngmaqò Nē svng tánàe.
_ Dvbùshang Mongkà svng dvshvng lvm rvt nøngmaq kaq svng dvzvrè.

Nøngmaq taqkèní Gvray gvsang jèjú svng rvtø vrvm røtnímshì laqlúnì-
(1)_ Ni vrvm lvpat taqø Kristu svng dvdvm røtlvm
(2)_ Mongkà nvng Vkangpè Kàgvp taqø Vkangpè nvng vhø’m lúnlvm
(3)_ Dvzvr Piter pàdø vzaqshì Nøntní Kristu svng vchàng nø shvkse wáshì lúnlvm Kvmnøntní røtním tvleshì laqlúnì wvng dvshat nø nònggùn zí mvyø’è shvngbe svng oqā.