Shvngbe mvdvm Gvray mongzøl lòng vtoshì laqlúnì shvngbe svng Pamvra
Vpø’ íwe pèmè vnvmchvngmaq, Dèni nònggùn lùshì lvm móngkà nø Marko 16:9-15 vdòng taqkèní íē.
Shóngshø’ng we pèmè vnvmchvngmaq, Marko 16:9-15 ciq vdòng, dvdvm vjáng taqsórí dvshat nø nònggùn zí mvyø’ we taq;-
Vsvng mvmè nø, lvpat taqø vsøn bye lòng vhø’m v-du ra dvgvp vtoshì kūnga vzàm vlē wā lv’nshì nigø Banchvk Shiwvt rì vhø’m v-du ra dvgvp, mø-í ni vløm ra vròl vcatvm dvgvp téwa Nøntzaq Shvmná rí lòngí dvdólshì sháìe. Vrá nø, Tiqlvp taq téwa Nønt dvt Nønt yúmìe. Vsvng nø vsøn mvbye rvtø taq íni gø, yvklvm rì vhø’m v-du ra dvgvp íni gø, shóngnønt walòng vlvm gvzà vchvkngè. Shø’n mvyø’ we taq, shóngnønt íwe Gvray gvsang nø nøngmaq vdòng taqø vl lvm nø mvdøng vchvk vtv’ng íe. Shóngnønt walòng mà-vl gø’ nø, Gá lòng mvlúnò we nvmpu wvtce pàdø shú:ngvmè.
Vrá nø, Nønt hángshì lòng ígø, Nønt nø’nshì lòng ígø vsvng kaq vjú mvzì, walòng svng yv’nglúnshìe. Vkangpè Yesu Kristu ínø Dvzvrìò Kvmnønt kūnga vzàm Nønt vnø’n lòng nvng Nøntzaq lòng svng mvra shvri mvyø’è. Shvla pvnrì tuq lung dvgvp Nønt mvsøn hángshì we mø-í nø vtoshá ràe. Màshvla lòng tuq ra dvgvp gø, Nønt køn v-nyaq we mø-í dø vtánshì vgám lún ràe.
Nøngmaq lvpat taqø Banchvk Shiwvt rì svng vhø’mshì ra dvgvp Nønt mvsøn hángshì nø Shvmná rí lòng í pvrvn i mà? Mø-í ni, Nønt køn lòng í pvrvnì mà? Shóngnøntní pvrvnì mà? Vpø’ íwe pèmè vnvmchvngmaq, dvdvmshàì nø vnvp we Nønt mvsøn vjang laqyàrì taqkèní dvzøp vdv’ngshì nø Cúnshì laqlúnì wvng dvshat nø nònggùn zí mvyø’è.
Marko 16:9-15 vdòng taq;_
Wenár nv̀mlat ni taq, sháng mvgágá Yesu zuná:mì mèpvng, A:ngí cáng shvngøt lòng lúngaa:pmà mè, Makdala Mari svng vzv̀ng Ang dvtánshìe. c 10 Wemè dìá:mì nø Yesu nvng tiqdø vl yà:ngì rì svng dvtáòe. Angmaq nøt yùr nø ngø da ke, 11 Yesu nø cúnshì we Marií yv̀ng dárà we kà svng angmaqí tá bǿà nìgø werì nø mvkv́m.
12 Yadv́ng pv̀n mèpvng, angmaq kèní vní pè nø vtv́r rvwá svng di ke, Yesu nø dvgá tiq mv̀rshv̀m shvmvtshi dv̀ng angní lvnga svng tvrà rāmø dvtánshie. d 13 Wekvt angní lvngà vtv́ngá:mì nø, dvgá rì svng dvtáò nìnø, angní lvnga svng gø wedøni angmaq mvkv́m. 14 Wemèpvng, coqcv́n tiqcé tiq pè wa v́mpà vm nø námrung dvgvp Ang dvtánshie. Iwe, Ang zun lú:ngì mèpvng Ang svng yv̀ng dárà rì kà svng angmaq mvkv́m we nvng angmaq kv́mnøt màvl nø nøt zaq rvt Yesuí angmaq svng nga:nòe.
15 A:ngí angmaq svng, “Namaq nø móng døngtáng svng èdìnøng nø, svng pv̀n í dv́ngte svng Dvbùshv̀ngkà dèshvng bǿnøng, a:lòe.
Mongkà svng ètashìnøng we pèmè vnvmchvngmaq Shvngbeí Gvray mongzøl lòng jèjú ìshøt vtoshì leqlúnøng Shvngbe svng oqā.
