” Vkangpè Yesu shì yv’ngkèní Zuná:mì Happy Easter Zun Bóyò “
Kristu vdòng taq Vpø’ íwe pèmè vnvmchvngmaq,
” Dèni nø Gvray gvsangí dvgøò we, Mònggvn vsvngrì Shiwvt mvra dongjøm kèní chut èchvng bø’shà we Happy Easter Vkangpè Yesu Kristu Shì yv’ngkèní vrá Zun á:mì we Zunbóy angni íe.
Ya lvban taq Rø vdu we Mongkà ciqrì:-
(1) Dvzvr 10:34a,37-43.
(2) Koloshi 3:1-4.
(3) Yohan 20:1-9.
Dvzvr 10:34a,37-43.. taqkèní ínø, Dvzvr Piter í nø Vkangpè Yesuò lvpat mvshøl rì, vrá Shì yv’ngkèní Zun á:mì tvrà mvshøl rì svng dvshangòe.
Koloshi 3:1-4..taqnø, Kristu vl Muqlang móngdànò tvrà svng lá èmvnøng.Namaq svng nø, Kristu nvng tiqdø dvzunshaq èínøng rvt, muqlàng taqlap Gvray vbàngpà rung Kristu Ang taq vl rì svng le Nønt nàdǿnshìnø̀ng. Nàmaq nø rvgaqtø̀m taq vl rì svng Nønt màdǿnshishaq, muqlàng taqlap vl rì svng lè nàdǿnshìnø̀ng, wā shvngøt dvtú, dvkv’mè.
Yohan 20:1-9….. Vdòng taq nø, Maria Magdalena nø Yesu kø’mpvtmà, lóngdùng dvgv̀m yv́ng svng sháng mvgágá dìá:mì kvt, dvgv̀m shø̄ lóng gø̀m vlúshaq í da we svng angí yang bø’à. Wervt, Simon Piter nvng Yesu àng shóngshì we coqcv́n pè ní yv́ng svng tiqdvshaqí vchér á:mi nø dvtáòe.
Dvgvm yv’ng svng tuq ráì dvgvp, Yesu vgo møqò we paqzit dùng gø, laqtun rì nvng tiqyv́ng mø̀í dø, rvdulshaq shènv̀ngø zin we svng àngmaqí yà:ngòe. Wèkvtwā Vkangpè Yesu Hkristu nø shì yv’ngkèní vrá Zun a:mì lòng svng àngmaq Kv’m bø’ì.
Vpø’ íwe pèmè vnvmchvngmaq, Dèni nø Nøngmaq shvngbe dvpvt Jór pòngbang Dvgùng gùngshàng we dvbùlvm Paska Zun Bóy ” Kangpè angni svng gòng bø’shà. Vkangpè Yesu Kristu shì yv’ngkèní vrá zun á:mì lòng nø nøngmaq Ká:mì we kvmnøntnò Nvmlat mvpvng angké nvng chutchvng lòngò mvpvng jór pòngbang gømlā íē.
Vrá nø Yohan Gvray Dvbùshang Mongkà taq, “Vkangpè Yesuò vnàng mà-vl ” dvgvm” svng dvzvrì í yv’nglúnò lòng nø, Vkangpè Yesu shì yv’ngkèní vrá zun á:mì tvrà svng Nvmlat kèní, dvzvr rì í shvláwā mvsíng mv-ràlò rvt íe, wā walòng svng yv’nglún shìe. Dvbùshang Mongkà (4) lòng taq, wè vnàng mà-vl “dvgvm ” ( empty tomb) yv’ng svng Svmaré rì í vzàng yv’ng lúnò nø dvshvngò tvrà yv’nglúnshìe. Vkangpè Yesu shì yv’ngkèní vrá Zuná:mì lòng nø, Ká:mì lòngò dālvm jór pòngbang gømlā íē.
Vpø’ íwe pèmè vnvmchvngmaq, Dèni nø “Nár Té Vtv’ng Kangpè Angni” tiqni gø íe. Dvgá Nár Kangpè angni v-rvm nø zunbóy Nárnice rì íē, walòng svng shø’n mvyøngè.
Vkangpè Yesu Zun á:mì lòng ínø, Shì lvm lòng svng jór lúnshì bø’ì, jø’ngjøngni jór lún bø’shà. Kristu nø Gvray Jø’ngkvp í lòng svng dvtanò lòng gø íē. Vkangpè nø jór pòngbang taqkèní zun á:mì. Àng zun á:mì lòng ínø, nøngmaq shvngbe svng vløm ra èzí bø’shà. Ang tiqgóng shvngbe vpnóngshì nø, àngò mvkok dvdí shóngnøntní nøngmaq kaq svng Mvra dòngjø’:pm kèní èchut èchvng bø’shà. Vkangpè kaq Ká:mì we Nøngmaq shvngbe gø Vkangpè Yesu dø zun lúngì nø, dvciq lvpat jèjú gønshaq lvpat taq cúnshì lúnlvm íe. Cúnshì dezá:r bø’shà walòng svng dènio Gvray Dvbùshang móngkà taqkèní yv’nglúnshìe.
Vkangpè Yesu shì yv’ngkèní vrá Zun á:mì we “Zunbóy Nø Nvmlat Vzàng wáshì we Bóy ” gø íe, walòng svng yv’nglúnshìe. Shvngømré taq wáshì we Kvmnønt tvrào Bóy rì shvngbe taqkèní yalòng Zun Bóy nø Nvmlat Vzàng wáshì lúngì we bóy me tiqlòng gø íe. Shvngbe mvdvmø ring vtv’ng gø, Zun Bóy lòng íe.
Vkangpè Yesu Hkristu shì yv’ngkèní Zuná:mì we Zun Bóy svng nø (2) Yamvzùq bé lúngì lvp taq ” Zun Bóy” svng wá pv’ng yangà dang shvngømréò lvpat mvshøl taq yv’nglúnshìe.
Yuda vsvngrì ínø ” Shvle Bóy” wā shønò lòng svng shálún shìe ( Bung 12:13). Hkristan rì dvpvt Shvle Bóy, Zun á:mì we Yesu nvng vzø’m lòng svng dvzvr Polo ínø dvshvngòe ( 1Kor5:7).Jø̀ngjǿng èshø̀:nò nìnø namaq nø butdvshi màshú pv̀n èínøng dø tiqdvchá, zidòngsér angshv́r ílv́m rvt butdvshi anglí svng chut ègurnø̀ng. Pàwálv́m wani nøngmaq Shvlē Bóy núnglv́m vyv̀ngcè í pè Kristu gø̄, nøngmaq dvpvt shvrúnglv́m shvt yà:ngà wàe.
Vpø’ íwe vnvmchvngmaq , Yesu Hkristu shì yv’ngkèní vrá Zun á:mì lòng nø, gvzà ni vchvk ngè.” Vrá Kristu Ang svng màdvzūn yà:ngò pà í nìnø, nøngmaqí dvshā:ngì lòng gø vshø̀ng í nø, namaq èkv́mnøng we gø vshø̀ng íe, wā (1Kor 15:14) Dvzvr Polo í
Shvdømè.
Wervt Vpø’ íwe pèmè vnvmchvngmaq, nøngmaq Ká:mì lòng nø Yesu Kristu Zun á:mì, dvciq lvpat gønshaq èzí bø’shà lòng íē. Shvngømré taqkèní shvngøt dvtú we Dvrá Mongkà rì vdòng taqø Kvmnønt shvdik shàì lòng, cvndvgømì lòng nø, Vkangpè Yesu kristu shvngøt dvtú we lvpkà me rì svng ká:mì nø vtoshàì long, dvgùng shvring nø dvciq lvpat gønshaq Pvlàcè kvmnønt nònggùn kūnga lùshàì lòng íe.
Shóngshø’ng we pèmè vnvmchvngmaq, Rvtø vrvm kūnga shaq vnø’n ni we, vléshàì we Mvra rì svng tiqdvshaqí vroqshàì nø Vkangpè Yesu Zuná:mì we Zun Bóy taq Nønt mvsøn àngshvr dvbù Nøntní, Kvmnøntní lúm nø Pvlàcè jór nònggùn kūnga lùshì laqlúnì wvng dvshat nø nònggùn zí mvyø’è.
Shvngbe í Zun Bóyò Gvray mongzøl lòng vtoshì laqlúnì. Shvngbe svng oqā.
