“Shànshér we Nár Vchuqni”Mati 28:1-10.
Shvngbe mvdvm Gvray ìshøt Gvray mongzøl lòng laqtuqdaq!
Kristu vdòng taq Vpø’ íwe pèmè vnvmchvngmaq Dèni nø Shànshér we Nár Vchuqni Vkangpè Yesu shì bø’ì nø kø’m bø’à, zupvngmóng svng vriqò we angni gø íe. Dèni tāshì lúnlvm Gvray Mongkà nø..Mati 28:1-10 ciq vdòng taqkèní íē.
Shóngshø’ng we pèmè vnvmchvngmaq, Dèni Shànshér we Nár lvban Vchuqni nø, Nøngmaq Catholic shvngømré me kø’mp ínø, Vkangpè Yesu Kristuò dvshà mvhøt lòng, shì lòng , zupvngmóng kaq dì nø vriq bø’à lòng svng dvdvm vjáng taqsórí Vjúrøt cvndvgøm nø Vkangpè vra Zun lvm lòng svng mvrøt taqsórí cāshìe. Dèni Shvngømréme nø, vlømshì ra màdá maqhú:ng í á:mì we, Shànshér we nóng ra mvdvm Zun a:mì tvyø svng tvlú wáshì lòng shini mvhøqò vzàng Missa Kàgvp svng nóngshì we mà-vl. Wè mèpvng wā Paska Zun á:mì lòngò mongzøl lòng svng gvzà Nøntshøm dvbù taqsórí angni (50)ni høqshaq wàlvm í bø’ì. Dèni Nár Vchuqni nø Mònggvn rvgaq mvdvmø Shì lòng vlēvm mèpvng wā Dvciq lvpat gønshaq Cúnshì lúnlvm Jø’ngjøng vlē walòng svng dvtánò we Nár Vchuqni gø íe. ” Nvmbøng mvru me vlēvm mèpvng nø shígwín nvmbøngce dìe “wà pàdø tiqdvchá Nár Bungànī nø yór nēci luq we angni ínigø dèyaq taqø dvbùlvm ra ” Alleluia ” Zaywa ku vpō á:mì. Vpø’ íwe pèmè vnvmchvngmaq, Dèyaq nø, Mvra nvng Shìlvm lòng svng jór a:mì yaq, Gønshaq àngshvr, lvpat àngshvr nvng vlømshì ra Kømzøp we yaq, (Paska) Zun bóyò Jór Pòngbang gømlā svng gòng we tiqyaq gø íe.
Vkangpè Yesu Kristu nø Shì yv’ngkèní Zun á:mì lòng nø, Mònggvn yachang svng chutchvng lvm Vpè Gvray gvsangò rvmvngzøng svng Kømzøp dvzvrò lòng íe. Dvshà mvhøtlvm, yvklvm rì vhø’mò Wurgang mvdvmø gønshaq dvbø’nshì shì bø’ì, dvgv’m yv’ng Kø’m bø’à, vrá Zun lòng ínø, dvciq lvpat Gønshaq lúnlvm vlē, walòng svng vlømshì ra zìe. Vkangpè Yesu Kristu nø Shì yv’ngkèní vrá Zun á:mì rvt Kv’m vsvngrì, nøngmaq shvngbe dvpvt Zun lvm lòng vlē, walòng íe. Dvshàlvm lòng, mvhøtlvm lòng, yvklvm lòng , krvtzø’m lvm, màcíng màza kè we, shvnip shvnar kè we, rvweng vhø’m we.. vkvtdø í rì dvnzøng we Nár Bungànī svng shvlē lúnlvm vlē. Íni gø yalòng nø lvngdøm mø-í nø, Zun á:mì we Vkangpè Yesu Kristuò jór pòngbang taqø lúmrì í bø’shà. Nøngmaqí vtoshì lún bø’sha lòng Tìløp Sacramentu nø, Vkangpè Yesu Kristu shì lòng nvng Zun lòng taqø lúmì lòng íe. Tìløp kámshàì dvgvp vtánshì we dvkv’m Kà svng vrá dvzøp vdv’ngshì taqsórí lvpat àngshvr, Mvra nvng vcar we lvpat taqø Cúnshì lúnlvm rvt dvzaq dvkvngshì nø Vkangpè Yesuí dvgø’à we Shvmv’n Jèjú ìshøt ìgvn rì svng vtoshì laqlúnì wvng dvshat nø nònggùn zí mvyøngè. shvngbe svng oqā.
